1WAMANGI 12 - Bibilia Kui Mdedie fo Kimochi

Madeko ha njoshari tsa ora lo mtsudu

¹ Kyasia Reheboamu kahenda Shekemu, kundu Waisraeli wose wawekuumbie, kundu wamhaluo Mangi.

² Na Yeroboamu mana o Nebati kekimanya mbonyi tsi (kipfa nawei Misri mṟasa ilyo, nyipfo aledichia nakae kuleshe na Mangi Solomoni), Yeroboamu kawuya iwuka ipfo Misri.

³ Waleduma wandu wahende imlaha. Kyasia Yeroboamu na wandu wose wa oshari lo Israeli wakahenda, wakawia Rehoboamu, wakahamba,

⁴ “Ndeo naleludika ṟio ling'anyi, wulalu iyo ululeheṟe wusinga wu wulemeri ndeo aleludika, naso lochikuṟundia.”

⁵ Kawawia, “Kuhendiyenyi mṟasa mkonu fo kaṟaṟu, kiidima muche.” Wandu wakahenda kowo.

⁶ Mangi Rehoboamu kakunda mbonyi ko wameku wawekehoṟoka oshangunyi lo Solomoni, ndee, kiheri awei na moo, kawawesa, “Mohamba muda kya mbonyi ii kundu njihaluo wandu wa?”

⁷ Wakamhaluo wechihamba, “Koidikia iwa mṟundi o wandu wa inu, na kowaṟundia, na iwahaluo, na ideda nawo madedo mecha, wo wechiwa waṟundi wapfo maheri hose.”

⁸ Kyaindi o kada mbonyi iya ya wameku, chandu walehamba kakunda mbonyi ko wanake walya wa rika lyake, na ihoṟoka sumhana nawo.

⁹ Kawawesa, “Mohamba muda kya mbonyi ii kundu njihaluo wandu wa, walededa na inyi wechihamba, ‘Luanguṟie mhanda lulediko nyi ndeo.’”

¹⁰ Wanake walya wa rika lyake wakambia, wechihamba, “Nyi udi ochiwia wandu wo walekuwia, waanguṟie mhanda ndeo alewadika, nochiwawia kudi, kimnyo kyako kya machengela nyi kikishimbi kota kitsi kya wande oko.

¹¹ Na wulalu chandu wande oko alemudika mhanda mlemeri nyi njechiengeṟia mhanda fo, kokoya wandeako nalemkapa na ngowa, inyi njechimukapa na ngowa tsa shisuwa.”

¹² Kyasia Yeroboamu na wandu wose wakachea Rehaboamu mkonu fo kaṟaṟu, chandu Mangi alewawasa, kechihamba, “Munjiwuuye mkonu fo kaṟaṟu.”

¹³ Mangi kahaluo wandu walya ai mbawo, kada mbonyi iya ya wameeku wamwongoya.

¹⁴ Kawahaluo chandu alewio nyi wanake walya wa rika lyake kechihamba, “Wande nalemudika ṟio lilemeṟi, inyi njechiengeṟa ngoseṟa, wande nalemukapa na ngowa, inyi njemkapa kui ngowa tsa shisuwa.”

¹⁵ Kyasia, Mangi alaadanyie wandu kipfa kindo ki kiwukie ko Mndumii, kundu kihoye idedo lilya Mndumii alewia Yeroboamu mana o Nebathi kui dumbu lya mwikimbi Ahiya Mshiloni.

¹⁶ Kyasia Wasraeli wekiwona ke Mangi awaadanyia pfo, wandu wo wakahaluo Mangi wechihamba, “Luwode ohawi lui kiidi kya Dawidi! Ma luwode kyoṟa kiidi kya mana o Yese-pfo. Kyasia hendenyi mahemenyi hanu, lanye Israeli, wulalu ringa mba yapfo kumonyi iyo Dawidi.” Nalyo Israeli wakahenda mahemenyi hawo.

¹⁷ Kyaindi kui mbonyi tsa wana wa Israeli wawei mṟinyi ya Yuda, Rehoboamu nalewaitoṟia.

¹⁸ Kyasia Rehoboamu kaduma Adoramu, awei mhoṟoki o maṟunda, na Waisraeli wakamkapa na maho mṟasa kapfa. Mangi Rehoboamu kakambiṟa idoya igarinyi nadichie Yerusalemu.

¹⁹ Nyi wudo Israeli walelekana na mba ya Dawidi mṟasa inu.

²⁰ Kiidima Israeli wose wekiicho ke Yeroboamu nawuya, wakaduma wandu wahende imlaha nache na chilenyi, wakambia nawe Mangi huye ya Israeli yose, ma kuwode mndu ose alewadana na mba ya Dawidi pfo shile na Oshari lo Yuda tupu.

Wuikimbi wo Shemaya

²¹ Rehoboamu kekishika Yerusalemu, kalaha wandu wa mba ya Yuda na Benyamini wose, wandu wasambuṟe shiku ihana limu na makumi nyanya (180,000) wawei wandu wa shida, kundu wakapane na mba ya Israeli, kulako wewihiṟa wumangi ko Rehobomanu mana o Solomoni.

²² Indi kukacha idedo la Ruwa ko Shemaya mndu o Ruwa lyehamba,

²³ “Wia Rehoboamu mana o Solomoni Mangi ya Yuda, na wandu wose wa Yuda na Benyamini na wandu wo waletsuhaa, kochihamba,

²⁴ ‘Mndumii nahamba adi, mulahende, ma mulakapane na wana wa mayanu, wana wa Israeli, wuyeni orio mndu kanyi koke, kipfa kindo ki nyi koko kimuwukie.’” Kyasia, wakaicho idedo lya Mndumii, wakawuya, wakahenda kowo, chandu idedo lya Mndumii liwei.

Yeroboamu adekio Mndumii-Ruwa

²⁵ Naalyo Yeroboamu kawika Shekemu kiidi kya fumvu lya Efrahimu, kakaapfo, kawuka pfo kawika Penueli.

²⁶ Yeroboamu kahamba mrimenyi foke, “Wumangi wuiwuuya mba ya Dawidi.

²⁷ Kokoya wandu wa wechido ihenda iwuta mwano kiidi kya mba ya Mndumii ipfo Yerusalemu le, nyi lyondi mrima ya wandu wa yechiwuya Mndumii owo, Rehoboamu Mangi ya Yuda, nawo wechinjiwaha inyi, na iwuya Rehoboamu Mangi ya Yuda.”

²⁸ Mangi kawika chila kasungusia mahache hawi ha mmbe tsa sahabu, kawia wandu, “Kikilemeri konu ido ihenda Yerusalemu, ambuyenyi iha nyi ho maruwa hanu iyo Israeli, halekudosa wuka Misri.”

²⁹ Kawika limu Betheli na lya kawi Dani.

³⁰ Kindoki kikawa wunyamaṟi kipfa wandu walehenda iindia oshangunyi lo orio limu, mṟasa ipfo Dani.

³¹ Ngoseṟa, kawika mba tsa handu ha huye, kawika na wandu wa mbaṟi tsose, wandu walai wana wa Lewi wawe makohanyi.

³² Yeroboamu kawawasa iwada mfiri mnene meri fo nyanya 8 mkonu fo ikumi na katanu fo meri ifananyi na mkonu mnene iwei kiidi kya Yuda. Kado huye kundu nahendie rasio. Kawewika ado kiidi kya Betheli kechiwuta mwano mba tsilya alesungusia, kawika makohanyi walya handu ha huye ha Betheli.

³³ Kawuta mwano fomaya modonyi huya kitaṟa kilya alekiwika Betheli mkonu fo ikumi na katanu fo meri fo nyanya 8; meri alekusaṟa mrimenyi foke; kawawasa wana wa Israeli wawade mkonu fo mnene, kado kashika rasionyi napfamiṟe uvumba.