1WAMANGI 10 - Bibilia Kui Mdedie fo Kimochi

Kyaṟo kya mkamangi o Sheba

¹ Mkamangi o Sheba kekiicho kiṟumi kya Solomoni, kipfa kya rina lya Mndimii Ruwa, kahendia Solomoni kundu namheshe na maweso maumu.

² Kaafukia arianyi na wandu wafoi hamu na ngamia tsikudikie opfudano, shindo shang'a shifoi mnu na shindo sha wahuru.

³ Solomoni kahaluo shose aleweso, ma kuwode sa alelemo ihaluopfo.

⁴ Mkamangi o Sheba kachihiyo mnu kekiwona wuṟango na wulaanyi wo Solomoni, na mba iya awewikie;

⁵ Ngoseṟa kekiwona kando kaleendo na mesenyi koke, chando wanjama waledamia mesenyi, chandu waṟundi wawehidie na mṟaye yawo, na walya weṟutsa na mwaano yekoṟa aleinenga Mndumii-Ruwa, nalewa mkahai na iṟihiyo ling'anyi.

⁶ Kyasia, kawia Mangi “Mbonyi tsose njiletsiicho orukenyi loko tsii tsa maṟunda hapfo na wuṟango wapfo nyi lohi.

⁷ Kyaindi ndeidima iidikia mbonyi tso-pfo mṟasa ili ndeshika ngawona inyi njimonyi. Ate njilewio ma keenga-pfo ke wuṟango wopfo na shelya sha mso fopfo shiidie shilya njilewio.

⁸ Ungusu waka wapfo! Ungusu waṟundi wapfo waikuhidia kitsitsi na iadanyia wulaanyi wopfo!”

⁹ Mndumii-Ruwa opfo, naṟumisho ichu alechihiṟo nyi iyo, kakuwika loṟikehu lo wuitoṟi lo Israeli. Kipfa Mndumii-Ruwa nalekunda Israeli, mlungana, nalekuwika iyo uwe Mangi, kundu nuwanze wulohi na wahendeli.

¹⁰ Kyasia Mkamangi kainenga Mangi Solomoni ngoseṟa ya shilo (4,000) tsa sahabu, kiheo king'anyi kya opfudano na shindo sha wuhuru. Mafuda ho ha opfudano hafoi iho Solomoni aleinengo hawefoi mnu ma kuwode msa alemeinengo kiheo king'anyi kidi pfo.

¹¹ Na wudo, oṟoṟio lo meli tsa Hiramu tsikaende sahabu wuka Ofiri, wakaende na mashidi ha “msandali” na shindo sha wuhuru.

¹² Mangi kaṟunda na mashidi-ho-ha msandali kahahaluo ngo tsa mba ya Mndumii-Ruwa na mba ya Mangi hakawa hesungusia shinanda na uda loimba. Kiheo kyo kya msandali kilemewoneke-se mṟasa inu ipfo pfo.

¹³ Mangi Solomoni kainenga Mka Mangi ulya o Sheba orio kindo alekilanga na ikunda, hamu na shindo shingi alemneenga ai cha Mangi. Kyasia Mka Mangi kawuya na urukenyi loke hamu na waṟundi wake.

Wusuṟi wo Mangi Solomoni

¹⁴ Orio maka Solomoni nawekedaayo sahabu shilo (22,000).

¹⁵ Kiheo kyo kisanganyi na sahabu aleambia ko wekapa mbucha na wetengetsa, ko wa Mangi wose wa Uarabu na wanene wa shidembo sha Israeli pfo.

¹⁶ Mangi Solomoni kasungusia ngawo tsing'anyi 200 ko sahabu injisanje, orio ngawo kilo 7 tsa sahabu.

¹⁷ Kasungusia ngawo njitutu 300 ko sahabu injisanje orio ngawo kilo 1:5, kiidima Mangi katsiwika kiidi kya mba injilahe mba ya Ngeṟa ya Lebanoni.

¹⁸ Mangi kasungusia loṟika lo wuitoṟi lung'anyi lo ndumba, kaluchopa na sahabu njicha mnu.

¹⁹ Kitima kyo kiwewode shitengu shiṟandaṟu. Ora lo huye luweilusungusie mbiṟi na kuwewode handu hehekia mawoko njora tsose tsi tsiwi, na sanamu ya miiso tsiwi tsihoṟoki imu mbai ya handu hehekia owoko.

²⁰ Kuwewode se sanamu tsa miiso 12 tsihoṟoki, imu mtsitsionyi fo orio kitengu. Kitima cha ikyo kilemesungusio kiidi kya Mangi ungi ose-pfo.

²¹ Shihia shose shenyo mvinyo sha Mangi Solomoni shiwei sha sahabu, na shihiya shose shiwei mbenyi Ngeṟa ya Lebanoni shiwei sha sahabu njicha, kuwewode kindo kiwei kisungusie kui maho ha fesa-pfo kipfa maho ha fesa hawei kindo kya wuhuru wung'anyi mandi-ho-pfo.

²² Mangi Solomoni nawewode oṟoṟio lo meli tsa Tarshishi tsiwekehendesana na meli tsa Hiramu, orio maka fo 3 meli tsa Tarshishi tsiwekeendie Mangi sahabu, fesa, membe, mapfuwe na tausi.

²³ Ko ikyo Mangi Solomoni kaida wamangi wose wuyanenyi kui masaa na wuṟango.

²⁴ Wandu wa njoruka tsose wakawado nyi msiha fo ihendia Solomoni kundu waadanyie wulaanyi woke iwo Ruwa awemsumbie.

²⁵ Orio umu nawerie shindo sha nga shihiya sha fesa, sha sahabu, maṟao, manemane, opfudano, frasi na shihongo. Shindo shi sha nga naleshiambilia orio maka.

²⁶ Solomoni kasanyia magari ha frasi, na wandu wehenda na frasi, nawewode magari ha frasi (1,400) na wandu wa frasi (12,000) kawawika kiidi kya mṟi iwode handu hewika magari ha frasi, na ipfo Yerusalemu.

²⁷ Nahong'u Solomoni kahaluo maho ha fesa kiidi kya Yerusalemu nyi kindo kilawode wuhuru cha maho na mbau tsa meresi tsiwefoi cha mbau tsa mkuyu na ya Shefela.

²⁸ Solomoni kaduma frasi tsiche tsiwuka Misri, na Kilikia alehuṟa ko wekapa mbucha wakakumbia waṟundi wake.

²⁹ Igari limu lekuruo lileidima ihuṟo wuka Misri ko fesa ishikie kilo 7, na frasi imu ishikie fesa kilo 2. Wekapa mbucha na Mangi waleidima iduo magari na frasi wakakumbia wamangi wose wa Wahiti na wa Wasiria.