1TIMOTEO 6 - Bibilia Kui Mdedie fo Kimochi

¹ Iwa wai masinga shi ya olio waidikye iwikya wenyi wawo wuindi wose, kundu rina lya Ruwa na kiloshyo shilahende irumo.

² Indi iwa wawode wenyi wai waidiki manya walawamine ili wai wanawawama, kya indi waengeṟe iwapfuṟukanya ili wai waidiki na wakunde wechitaa kui isumba. Losha ishi na itutuma.

Mloshye ya wongo na wusuṟi wo lohi

³ Kokoya kwipfo ailosha kiwungi alakuwada na madedo ha oru ha Mndumii odu Yesu Kristo na kiloshyo kilya kiende wuindi wusumhanyi.

⁴ Ichu aimlahutse, alaichi kindo indi aluye mrima kui kitoṟongocho kya mahio na pfumu lya njolimi, nyihondo kowuka wunyeng'i na mlusano, na shirumo na mawewedo mawicho;

⁵ na masingano ha kitsitsi ha wandu wai wafurunjie mhie waiwasoke wukilohi, nyiwo wehamba ke wuindi wulya wowa woikapa nawo mbucha.

⁶ Mbuchai ng'anyi wuindi wulya wuendye mndu naa ipfo; nyi mkukarishie.

⁷ Kipfa luwerie kindo ilindi lulecha wuyanapfo na wudo loidima iduo kindo mandi lochiwuka-hopfo.

⁸ Kokoya luwode kyelela moo na kyeshikya mbihu sho shilufoi.

⁹ Kya indi iwa walanga ifeṟa masaa wekeoloka kitewyonyi na mshihodinyi na langonyi tsifoi tsa mteecho tsiwichuṟye mndu, natso tsekeolotsa wandu odetsonyi na orumatsonyi.

¹⁰ Ipfo kundo, mawicho haṟukie hose nyi ipfo wukuwunyi wokuwa fesa. Kuweepfo waleiwingya wakawedekio-ho wuidiki wakawekutochio m mawawio hafoi.

Mapfundo maata ko Timoteo

¹¹ Indi iyo ili ui mndu o Ruwa, dicha ishi, ke wingya-wo wuhoṟotsu na wuindi na wuidiki na mkundie na mutirisie na wuoloṟu.

¹² Kapana ngapano iya njicha ya wuidiki, ke-wada moo fo mlungana, ifu omelahyo ndaho yafo kowefuṟingisha mṟingishie sa mcha oshangunyi lo wangochi wafoi.

¹³ Ngakuwawasa oshangunyi lo Ruwa mowonya shindo shose moo na lo Kristo Yesu aweṟingishie mringishie fulya mcha odatsinyi lo Pontio Pilato.

¹⁴ Ke uwade iwawaso lilya lilawode paṟi lilawa idedyo hando itane mndumii odu Yesu Kristo echiwoneka.

¹⁵ Kiwonesyo iki ichu ai Mwitoṟi amonyi menyi osu echikiloṟa maheri halya aichi, ichu ai mangi ya wamangi na mndumii o wandumii.

¹⁶ Nao amonyi akaa elechipfa aitsinda ipfo senyi ilechiwa ida. Kwipfo mndu o wandu alembonapfo ma kwipfo echiidima imbonapfo. Kiṟumi kicha na wuitoṟi wo mlungana shii shake. Amenyi.

¹⁷ Iiwa wawode masaa hafoi maheri ha kiwulalu uwawawasie ke walakusaṟe kyekaa mdonyi, ma walakusirie na wusuṟi wo masaa wokeweṟuka weṟu indi na Ruwa ichu aluinengye shose kui nguka shelisiṟa moo.

¹⁸ Wawe wechisumba, wafeṟe mfeṟa fo mawuto mecha, wawe makitomoka wakundi ilekia.

¹⁹ Wechikusanya wawenyi kisa kiwe kechiwawiia kiwanja kicha maheri halya hecha, kundu wakuwonye moo fulya fui moo lohi.

²⁰ Hoi Timoteo, ringa kilya ulekidambikyo, dicha sumu tsa msaṟakambo tsa melemele na maambikyano ha wulaanyi wulya wuisendo wulaanyi wongo.

²¹ Na kwipfo wakuhambie nawo wakadekio wuidiki. Wutonga wukae nanyo.