1TIMOTEO 5 - Bibilia Kui Mdedie fo Kimochi

¹ Mndu meku ma ulampomye, kya indi umwikimbe cha ili ai wande, iwa wakoho uwadedie cha wanawawama.

² Iwa wakeku cha wamayo, iwa wakoho cha washiki kui sonu njicha tsose.

³ Waka wakusu, iwa wai wakusu lohi uwahonerye.

⁴ Indi kokoya mka mkusu awode wana ang'u wachuku, wo wakupfunde kuwoka iwika wuindi wo ipfo kanyi kowo kwenyi wechitaa sile tsilya walie ko wafee wawo. Kipfa iki kichihianyi na Ruwa.

⁵ Indi ichu ai mka mkusu o lohi aimdee amonyi o akusirie na Ruwa echitsinda shiterewionyi na shifuhionyi kio na mfiri.

⁶ Indi ichu mseke ai mpfu, ma ili mbihu foke fuwode moo.

⁷ Ishi ushiongoye kundu wakae walawode hewadedya.

⁸ Indi kokoya mndu alalisiṟie mbaṟi yake, mnu wa kanyi koke, nyio alekaana wuidiki awichuo kota mndu alaidikye.

⁹ Mka mkusu nalahende iṟehio kambenyi shila ainutsye ma maka makumi haṟandaṟu nawe awei mka o msoro umu mfi.

¹⁰ Nawe mṟingishie kui mawuto mecha ili ametoṟishya wana ili ameekya necha wahenu ili amesanja waele walya madende ili ameikanya wafoye ili amewinya orio ṟunda icha lyose.

¹¹ Indi wakusu walya wakoho-koho uwalehe, kipfa ilindi wakutimbishye Kristo walanga yaliko.

¹² Wakawada paṟi cha ili walefurunja wuhendeli wo isonguo.

¹³ Hamu na iki wakakuichiwiṟa idokuo na iṟahaṟaha nja tsa wandu. Indi chi wai wadoko tupupfo indi na wemelemele na wadimi-dimi wededadeda shilasumhanyi.

¹⁴ Nkyo kimaduma ngakunda ke walya wakoho-koho wahende yaliko, wawone wana wapfuṟukanye kanyi walaenengye moala mwaanya fo wusutsu.

¹⁵ Kipfa kulemboneka waminduka wewingya Satana.

¹⁶ Kokoya mwidiki mshiki awode wakusu nawalele, nalarohie siṟi kyawo, kundu yo iidime ilela wakusu wawuṟie lohi.

¹⁷ Wameku iwa wakaya siṟi necha wo wahendewikyo kiṟumi kawi, mnu iwa waiṟunda wechilosha na ipfunda.

¹⁸ Kyamba kii-kiṟehie kehamba, nguleta iya ikeri iṟunda yechihuo ngano ulaipfunge dumbu, na kingi; ke mndu mṟundi nawonyo wueri woke wumsumhanye.

¹⁹ Meku akumbo kopfo ulaadanye mondu shila wangochi wai-ho wawi ang'u waṟaṟu.

²⁰ Iwo wadekio kindo uwadedye oshangunyi lo wose, kundu na walya wengi wakuwutie-ho yowuo.

²¹ Ngakututuma na kamu njii oshangunyi lo Ruwa na lo Kristo Yesu na lo wasu waele wasambuṟe ke uringe ishi kulawone kosuya mndu ma kulawute kindo ochikundia mndu.

²² Ulahekye mndu mawoko owin; ulawekaṟana na manyamaṟo ha wengi; kuringe kumonyi ukae ulawado nyi mti.

²³ Ulakinyo mṟinga fumenyi, kya indi wada-ho shi-mvinyo shangu kipfa kya haya lyapfo na kya ndaṟe tsilya tsikuhoya kafoi.

²⁴ Kwipfo wandu manyamaṟo hawo hamanyikie owinyi hechisongoya mwanduye, kwipfo wengi hawo hekemanyika numa.

²⁵ Mawuto halya mecha na wudo hamanyikye, na kya halya kyaho kihendekye kiwungi ma haidima ikaa hai maṟikepfo.