1TIMOTEO 4 - Bibilia Kui Mdedie fo Kimochi

¹ Indi mumuyo ahambie na pata ke shiheri sha numa kochiwoneka wewuka wuidikinyi wechiku-wada na mumuyo idetsa wandu na mhambo ya waṟufu wawicho.

² Kui wulembi wo wamawongo iwo wai-wakoṟie ngoru tsa wumbafu ipfo ngonyi tsa mrima yawo.

³ Weimbikya yalika na ilya shelya shiliwe isho Ruwa aleshiwika kundu shiambyo kui mwaano nyi waidiki walya waichi ki-wulohi.

⁴ Kipfa orio kii-kiwike nyi Ruwa kii kicha, kulaipfo kyechiwa ileha kokoya kikeri yambyo na imwaana.

⁵ Kyamba kyatano kyele kui dedo lya Ruwa na kui kiterewo.

Mṟundi mcha o Kristo

⁶ Komanyishya wanawawama ishi nyi ochiwa mṟundi o Kristo Yesu sa mcha uimlisiṟe na madedo halya ha wuidiki na ha kiloshyo kilya kicha ukioshye.

⁷ Indi sumu tsilya tsa msaṟakambo tsii tsa kiwukeku tso utsilehe. Kya indi ukutsane kumonyi uwe menyi-wuindi.

⁸ Kya ikutsana lya mbaṟi ya kii-nyama mbucha iwukie-ho nyi sa ntutu. Indi wuindi wulya woengeṟia shose mwengeṟya fo wucha ili fumbikie kyasa kicha kya moo fo wulalu na kya fulya fungi fochicha.

⁹ Idedo ili lii icha lyeidikya lishike iwado nyi wose.

¹⁰ Nalyo lyaluenenga lokuwinyisha loira-ho ngapano kipfa lokusirya na Ruwa chu menyi moo ai mkiṟi o wandu wose, kya ngoseṟa o walya wamwidikye.

¹¹ Wawasya ikyo na ikipfunda.

¹² Kulalekie wukoho wopfo wuhendemino, indi uwe kichano kya waidiki kui idedo, kui ohendo, kui kikundano, kui wuidiki, kui wukeha.

¹³ Itane ngashika icha, tsinda ochisomya siṟi na iikimba na ipfunda.

¹⁴ Ma ulaseheṟe kitonga kilya ki na iyo uleinengo kui wuikimbi wuele mandi olehekyo mawoko nyi wameku.

¹⁵ Winya ishi, ukaike nasho kundu maengeṟia hapfo hamanyikie wose.

¹⁶ Kuringe kumonyi keweringa na kiloshyo, utsindikye-ho. Kowa mowuta kudo ochikukiṟa kumonyi na ikiṟa walya wakuicho.