1TIMOTEO 3 - Bibilia Kui Mdedie fo Kimochi

¹ Idedo lii icha lyeidikya likeri lile, ke kokoya mndu akunda iwa moambuya siṟi alanga iṟunda sa icha.

² Na wulalu mndu moambuya kimbaṟi nawe mndu alawode owingo, ai mii o mka umu asanjikie mdo, menyi osaṟe, mndu msanze, mokunda wahenu, menyi njopfundo.

³ Nalawe mkuwi, nalasohuo mondu, indi nawe mwoloṟu alalang'a, alai mweehi.

⁴ Nawe modedya kanyi koke kwenyi mnu necha awodie wana chile wakae na wuindi.

⁵ Kipfa kokoya mndu alaidima idedya kanyi koke kwenyi nyi wuda echipfuṟukanya siṟi ya Ruwa?

⁶ Nalawe mwetsi kundu nalawone echikulandaṟisha nashike ihoya wudehelinyi wo Satana.

⁷ Nakae awode na kiṟumi kicha kya ko walya wai ora lo kya nja, kundu nalahoye wusutsunyi na mtambonyi ya Satana.

Watarami wa Wasongoru wa Siṟi

⁸ Watarami na wudo wawe wandu weindya, walawode olimi lo kuwi walawado nyi olaka walawe wekapa mbucha njipfu.

⁹ Wakae wakomie kyama kii kiṟike kya wuidiki mrimenyi iwode ngo tsihaṟamie.

¹⁰ Na wai wado wahendehesho kuwoka, numa wapfuṟukanye siṟi ili wamchia walawode hewadedya.

¹¹ Waka na wudo wakae weindya, walahende iduo wandu sumu, wawe wasanjikie mdo, wawe wahendeli kya shindo shose.

¹² Watarami wakae orio mndumii na mka oke wechidedya necha wana wawo na wa kanyi kowo wose.

¹³ Na iwa wawetaramie siṟi necha wakuwonya kiwaira sa kicha na wureheri wung'anyi wo ipfo wuidikinyi wo Kristo-hu Yesu.

Kiṟike kya pfinya ya Siṟi

¹⁴ Ngakuṟehya ishi njekusirya ke nshike ipfo kopfo owinyi.

¹⁵ Indi kokoya ngakeleo nomanye njia isumuhanyi yekuidya mbenyi ya Ruwa. Nayo nyi siṟi ya Ruwa ichu menyi-mooo, ii ngo iya yekanza kiwulohi.

¹⁶ Kutambalukye necha kyama kiṟike kya wuindi chando king'anyi. Nakyo kikeri kile: Ichu alekuloṟa kui nyama Kamanyisho mbinzi kui mumuyo Kawonekia wasu Kaweongoyo mkambonyi ya wandu Kaweidikyo wuyana Kairyo wuitoṟinyi.