1TIMOTEO 2 - Bibilia Kui Mdedie fo Kimochi

¹ Wulalu ngamtutuma kisongoe shose ke muterewe Ruwa muwe mochimbikya matu matu na ikukumba ndenyi tsake muimwaana. Muwike mudo mochiterewia wandu wose.

² Muweterewia wamangi na wanene wose kundu moo fodu fudamie necha fui na olele wyoo fo wutechi na wusalari.

³ Ikyo kii kicha kyeidikya ipfo ko Ruwa mkiṟi odu.

⁴ Ichu akundi ke wandu washikekiṟo wose, kii lohi kilya kiwewatambahalukya.

⁵ Kyamba Ruwa nyi umu na msanzi mosanza Ruwa na wandu na umu nyio mndu o wandu Kristo Yesu.

⁶ Nyio ichu alekudambika-ho amonyi ndalai ya italaa wandu wose ihendeṟingishyo ili indi maheri hayo halemshika ikoyo.

⁷ Na inyi njiimbike-ho mwongoyi oyo na msu, ngamba mlosha molosha mkambo ya wandu kui wuidiki na wo-kiilohi ngahamba njido kya lohi njilawongisha kindo.

⁸ Wulalu nyikundi ke womi waterewe orio kundo kose wechiira mawoko ha wuindi walawodo n nyashi ma itautau mdo.

⁹ Na wudo na waka wakusungusie wawenyi kui mṟaye iwamae necha isumhanye sonu na chile, walakuchope na njui njiioke ang'u sahabu ang'u shilukuta ang'u nguo tsekushela.

¹⁰ Indi liwe lya kilya kisumhanye waka wakuhambie na wuowu woowuo Ruwa lii lya mawuto mecha.

¹¹ Mndu mka nakupfunde echiadanya sau ekaa shi ya wuitoṟi.

¹² Kya ilosha ngaenenga mndu mka momu foloshapfo, manya foidedya mndumii, indi nakutsie necha.

¹³ Cha kipfa Adamu alewumbo kya kuwoka, kilemba ikyo nao Ewa.

¹⁴ Chio Adamu aletungopfo, indi nyio mka aletungo na kamu kaweshika ihutso.

¹⁵ Indi nyi echiletso kui ifee lyefee wana ili ekaa wuidikinyi na makundanonyi na wuilishonyi awode osaṟe.