1TIMOTEO 1 - Bibilia Kui Mdedie fo Kimochi

¹ Inyi Paulo njii msu o Kristo Yesu kui iwawaso lya Ruwa mkiṟi odu na lya Kristo Yesu mowedo nyiso.

² Ngaiṟikiṟa Timoteo manoko mcha o kichong'u kya wuidiki. Wutonga wuwe wopfo na osaṟio na ofoṟo ishi shichee ko Ruwa Wande na ko Kristo Yesu Mndumii odu.

Mawawaso ha mloshie ya wongo

³ Lilyandi njiwekure njehenda Makedonyia njilekututuma ke ukae ipfo Efeso, kundu uikimbe wamang'nanya waliwe walawone welosha kiwungi.

⁴ Ma walasumesume shihanu na maitumano ha marika halechidumbuka. Shindo cha isho shekeende mawesano indi shilaende owiko lo Ruwa locha wuidikinyi.

⁵ Indi mṟasa fo wuikimbi wulya nyi ikunda liṟukye ngooyi tsiharami na mrimenyi mcha fuu na ngo tsii teṟe na wuindikinyi wulakulembetseṟye.

⁶ Kwipfo maata waleasha isho wakawedekya sumunyi tsa shindo sha mai.

⁷ Nyi wakutana walosha wa wuwawaso walamanye ma shilya wehamba ma kya shilya wedambuya.

⁸ Indi luichi ke wuwawaso wochia kundo mndu aṟunda nawo kiwuwawaso.

⁹ Echikusaṟa ke wuwawaso wui wuwike kipfa kya mndu asumhanyipfo, indi nyi kipfa kya walya wawuṟie wuchili walai kambenyi; walehanyi na Ruwa, wai wanyamaṟi, wai wambafu wenyi ngafu, iwo wekewuta wande na wama moo, wewaha wandu.

¹⁰ Waṟuhui, wewichuṟa wanake, weiwa wandu, wededa wongo wefunja nyamu;

¹¹ na kya kingi-se kyose iki kikeri ikapana na kiloshyo kyechiṟa mrima kisumhanye ndumi ya okiio iwukie wuitoṟinyi wo Ruwa ichu menyi sia, nayo njileiwawasyo.

Iana Ruwa kipfa kya Isaṟia lyake

¹² Ngaana Mndumii odu Yesu Kristo mbanzi oko ili alenjikusaṟa mhendeli kanjiwika kipfuṟukanyonyi.

¹³ Mandi njiwemnyeṟuo na mterengi na mwaapfinya. Kya indi nyi njilesaṟyo kipfa ngambuta njido kui wutondo njiwewuṟie wuidiki.

¹⁴ Indi wutonga wo Mndumii odu wulefo mnu kui wuidiki na kui kunda lilya likeri Kristo-hu Yesu.

¹⁵ Dedo liṟamtsu lisumuhanyi iindyo nyi wose likeri lile, ke Kristo Yesu amcha wuyana kundu nakiṟe wanyamaṟi, na inyi njii msongoru owo.

¹⁶ Indi nakyo kilenenga ngasaṟyo njidi kundu Kristo Yesu nasonguo imanyishya koko wuhoo woke wose kya ipfungya mtaato walya wechimwidikya wawade moo fo mlungana.

¹⁷ Indi mangi ii ya maheri halunganyi ichu alasia alawono, o Ruwa amonyi nakae echiindyo na iichiko maheri hose na hose halunganyi. Amenyi.

¹⁸ Manoko Timoteo, iwawaso ili ngakuwawasya lirianyi na shisuku shilya shilemsendo huyapfo likeri lile, ke ukupfunge nasho ochiira shia iya njicha.

¹⁹ Uwode wuidiki na ngo njihoṟotsu tsa mrimenyi. Kyatso maata-ho waletsikumba wakawewunduka na wuidiki wowo.

²⁰ Kiidi kyawo kwipfo Himenayo na Aleksandria, wo ngamaa iwadambikya Satana, kundu watsano walakirume.