1SAMWELI 9 - Bibilia Kui Mdedie fo Kimochi

Sauli akumbuhana na Samweli

¹ Kiidi kya kishari kya Benyamini kuwewode mndu umu msuṟi ewio rina lyake nyi Kishi. O nawei mana o Abieli, mana o Zero, mana o Bekorathi, mana o Afia mndu o Benyamini.

² Kishi nawewode mana o kisoṟo elaho nyi Sauli. Sauli nawei manake mcha, na kuwewode mndu kiidi kya Waisraeli awei mcha chao pfo. Sauli nawei mleshe kota mndu ungi ose kulya orukenyi lo Waisraeli; wandu wose waweshikie makosohu hake.

³ Mkonu fumu, nzoi tsa Kishi, ndeyo Sauli tsikadeka. Koikyo, Kishi kawia Sauli, “Duo umu o waṟundi handu hamu na iyo, nohende iwalia nzoi tsilya.”

⁴ Wakatsiwalia kulya orukenyi lo mafumvuhu ha Efraimu na ora lo Shalisha, kyaindi walatsiwone. Numa wakashika Shalimu, na ipfo daa walatsiwone. Wakatsiwalia orukenyi lo Benyameni ma kudo walatsiwone.

⁵ Wekishika orukenyi lo Sufu, Sauli kawia mṟundi oke, “Luwuye na kanyi, sile kudo wande oko nechida alekusaṟa kya nzoi nakusaṟe kyandu.”

⁶ Mṟundi ulya kambia, “Tirima kitutu; kunu mṟinyi kuipfo mndu o Ruwa msa ekeindio mnu; orio kindo ekehamba kekewa kya lohi. Wulalu lumhendie, kofia nechiidima iluwia chandu kyaṟoki kyadu kechiwa.”

⁷ Sauli kammbesa, “Kyaindi lukamhendia, nkiki lochimnenga? Ambuya, mkate ipfo kikunjenyi isiiye luwode kindo kyose kyeinenga mnducho o Ruwapfo. Nkiki luwode.”

⁸ Mṟundi ulya kahaluo kawia Sauli, “Ambuya, inyi njiwode pesa sa ntutu robo shekeli. Njechiinenga mndu cho o Ruwa kundu naluwie kya kyaṟoki kyadu.”

⁹ (Ilyi mawokioonyi kulya ko Waisraeli kokoya mndu akundi iterewa Ruwa kindo, nawekehamba, “Kenjonyi luhende ko mndu ekewona.” Kyamba mwikimbi o wulalu nawekelaho nyi mndu ekewona).

¹⁰ Sauli kamhaluo, “Ikyo nyi kindo kicha; ndepfong'u.” Naalyo wakahenda kulya mṟinyi kundu mndu ulya o Ruwa awekekaa.

¹¹ Kiheri wawedo na fumvuhu wohenda mṟinyi wakakumbuhana na wana wa waka waweihenda idahia mṟinga. Wakawesa wanawo wa kika, “Ngesa mndu ekewona nakeri ipfo mṟinyiṟ.”

¹² Wanawo wa kika wakawawia, “Ee mpfo kundu ai, namusongoye; mukachumia owinyi mochimkoya. Nyi inu acha na kunu mṟinyi, cha kipfa inu wandu waihenda iwika kidaso kulya fumvuhu.

¹³ Oweṟe ili mochiida na mṟinyi, mochimkoya alamedo na rasionyi kulyo fumvuhu ilya kelya; kyamba wandu wechilya shelyapfo mṟasa o nawikie ona kidasokyo; numa walya wai walahe walye. Koikyo chumienyi owinyi oweṟe mochikoyana nao.”

¹⁴ Ko ikyo Sauli na mṟundi oke wakahenda mṟinyi. Kiheri waweida na mṟinyi walewona Samweli kechiwuka kulya mṟinyi, kechido na huye.

¹⁵ Ilyi lya ukou, Sauli alameida na mṟinyi, Mndumii-Ruwa awemewia Samweli kudi:

¹⁶ “Ngama kiheri cha iki, njechikuendie mndu kuwuka kishari kya Benyameni, na iyo nochimshia mafuda nawe msongoru o wandu wako Waisraeli. O nechiashuo wandu wako kuwuka ko Wafilisti, cha kipfa ngamewona matuuro ha wandu wako na kieṟeṟo kyawo kyamenjishikia.”

¹⁷ Kiheri Samweli alewona Sauli, Mndumii-Ruwa kambia, “Ichu nyio mndu ulya njilekuwia. Nyio echichilia wandu wako.”

¹⁸ Naho Sauli kahendia Samweli awe kufui na mongo fo mṟi kammbesa, “Ngakuterewa nonjiloṟe mba ya mndu ekewona.”

¹⁹ Samweli kamhaluo, “Inyi nyio mndu ekewona njisongoyenyi muhende handu ha huye cha kipfa inu mochilya kelya handu hamu na inyi. Ngama ngamenyi maweso hanu hose njechihamarisa

²⁰ kya nzoi tilya tsidekie mkonu iṟaṟu ileida mulawodo nyi makusaṟo hatso; tsamewono. Kyaindi nyiu icho Waisraeli wamkundi? Ngesa, chi iyo na wa mba ya ndeyo wose.”

²¹ Sauli kamhaluo: “Inyi nyi o kisharinyi kya Benyamenyi, kishari kitutu kota shishari shose sha Waisraeli. Na kiidi kya kishari kya Benyameni luwa lyako nyi litutu mnu. Kya indi, nki kitewe odeda na inyi kudo.”

²² Numa Samweli kaduo Sauli na mṟundi oke kiṟihenyi king'anyi, kawawika handu ha kiṟumi, handu wahenu wawei walahe wawedamie. Kuwewode wahenu washikie makumi haṟaṟu.

²³ Samweli kawia mkoṟi, “Ende ohawi lulya ngakuinengia, ngakuwia noluwikye kyaanya.”

²⁴ Mkoṟi ulya kaende nyama ya owa na nyama iwei huye ya owalo katsiwika oshangunyi lo Sauli. Nalyo Samweli kawia Sauli, “Ambuya kilya uwemteseheṟie; na wulalu kyamewiko oshangunyi lopfo. Wulalu kulieng'u cha kipfa kileteseheṟo kipfa kyapfo kundu nokulie na wahenuwa ngawalaha.” Ko ikyo Sauli kalya handu hamu na Samweli mkonufo.

²⁵ Kiheri walewuya na mṟinyi kuwuka handu halya ha mwindie fumvuhu, nalekapa sumu na Sauli kulya kai. Na Sauli kalaapfo.

²⁶ Ili lya ngama ngamenyi kilawo, Samweli nalelaha Sauli kuwuka kulya kai: “Kure, kundu njikuimie nowuye na kanyi.” Sauli nalekure, na wose wawawi, o na Samweli, wakakure wakahenda paṟepaṟenyi.

²⁷ Kiheri waleshika mtsitsionyi fo mṟi, Samweli kawia Sauli, “Wia manakecho nasonguo ihenda.” Manake ulya kekisonguo, Samweli kaengeṟa ideda kechihamba, “Tirima kitutu, na inyi njikuwie shilya Ruwa alehamba.”