1SAMWELI 8 - Bibilia Kui Mdedie fo Kimochi

Waisraeli waterewa wawe na mangi

¹ Kiheri Samweli alekuo nalewika wana wake wa kisoṟo wawe wedumbuo mondu ya Waisraeli.

² Mana oke mmbe nalelaho nyi Yoeli, na o kawi nalelaho nyi Abiya. Woose wawawi wawei wedumbuo mondu ipfo Beer-sheba.

³ Kyaindi wanawo waleosha mchumie fo ndeawopfo. Indi walewooka ikushihia kiira. Walewoka iambia kitsutsumo wakapfuluo kiilohi.

⁴ Kyasia wasongoru wose wa Waisraeli wakakusanzia handu hamu, wakahendia Samweli kulya Rama,

⁵ wakambia, “Ambuya, iyo wulalu nyi mmeku na wana wapfo waiosha mchumie fulya fopfopfo. Ko ikyo lusambuṟie mangi yeluchilia chandu mkambo ingi iwode.”

⁶ Kyaindi mbonyi ya Waisraeli ikunda wainengo mangi mowachilia kilechihia Samwelipfo. Nao katerewa Mndumii-Ruwa.

⁷ Mndumii-Ruwa kambia, “Adanyia orio kindo wandu waikuwia; kyamba wamekuleha iyopfo, sile wanjileha inyi njilawe mangi yawo.

⁸ Wokia njilewawuta kulya Misri, walenjida inyi, waweiṟundia maruwa hengi mṟasa inu. Wulalu mawutoho wawekenjiwutia inyi nyiho waikuwutia iyo.

⁹ Kyasia, waadanyie watutume mnu nakamu, nowawie na pata chandu mangicho echiwachilia kindo echiwawutia.”

¹⁰ Ko ikyo, Samweli kawia wandu walya waweimterewa wainengo mangi madedo hose ha Mndumii.

¹¹ Samweli kawawia, “Nyi wudi mangicho onu echimuchilia echimuwutia: Nechiwika wana wanu wa kisoṟo wawe weduo magari hake, na wengi wawe wedoya frasi tsake, na wengi wekapa mteeṟa wasongoye magari hake.

¹² Nechisambuṟa o amonyi wengi wawe wasongoru wa shidenyi wa matorito ha shiku, na wengi wawe wasongoru wa matorito ha makumi hatanu, makumi hatanu. Nechihaluo wengi wamdemie madema hake na imsambuya shilimu shake. Nechitana wengi wamsungusie shisha sha shidenyi, na wengi wamsungusie shiombo sha magari hake.

¹³ Nechiduo wana wanu wa kika wawe wesungusia mafuda hepfaama hekushia, wengi wawe wakoṟi, na wengi wekahaṟa mikate.

¹⁴ Nechiduo madema hanu mecha, madema ha mashidi ha mafuda, na madema ha mizabibu nainengie waṟundi wake.

¹⁵ Nechiduo kienga kya ikumi kya shilimu shanu sha mso na kya msabibu yanu nainengie wai wanda yake na waṟundi wake.

¹⁶ Nechiduo waṟundi wanu wa kisoṟo na wa kika, na mmbe tsanu njicha na nzoi tsanu njicha mnu natsihaluo tsimṟundie maṟunda hake.

¹⁷ Nechiduo kienga kya ikumi kya machondi hanu. Nanyo muwenyi mochiwa masinga hake.

¹⁸ Kiherikyo, nyo mochinunuwa kipfa kya mangi yanu ichu mulekusambuṟa nyo muwenyi. Kyaindi Mndumii-Ruwa echimuadanyi pfo.”

¹⁹ Ma kudo, wandu waleleha iadanyia Samweli wakahamba, “O manyale! So lochiwada mangi moluchilia,

²⁰ kundu naso luwe cha mkambo ingi. Mangi yadu, nechiluchilia, nechilusongoya na ilukapanyia shidenyi yadu.”

²¹ Samweli kekimarisa iadanyia orio kindo walehamba, kahenda iongoya Mndumii-Ruwa.

²² Mndumii-Ruwa kawia Samweli, “Waadanyie nowainenge mangi.” Nahong'u Samweli kawia Waisraeli wawuye na kanyi, orio mndu na kanyi koke.