1SAMWELI 7 - Bibilia Kui Mdedie fo Kimochi

¹ Numa, wandu wa Kiriath-yearimu wakahenda ionduo isanduku lya Mndumii-Ruwa, wakaliduo kanyi ko Abinadabu, awekekaa mafumvuhu. Wakashimbuo mana oke o kisoṟo elaho nyi Elieseri kundu naringe isandukulyo.

Samweli achilia oruka lo Waisraeli

² Wokia mandi isanduku lya Mndumii-Ruwa liledao mṟinyi fo Kiriath-yearimu kuleidaho kiheri kileshe, cha maaka makumi hawi kudi. Kiherikyo Waisraeli walelilia Mndumii-Ruwa.

³ Samweli kawia Waisraeli, “Kokoya mowuya Mndumii-Ruwa na mrima fonu fose kimuwaṟi muwute ipfo kiidi kyanu maruwa mahenu na sanamu tsa Ashtarothi. Halukienyi Mndumii-Ruwa kui mrima fose na imṟundia o amonyi tupu, nao nechimukiṟa kuwuka mawokonyi ha Wafilisti.”

⁴ Ko ikyo Waisraeli wakakumba kuleshe sanamu tsa mabaali na maashtarothi, wakaṟundia Mndumii-Ruwa amonyi.

⁵ Kiidima Samweli kalaha Waisraeli wose wakusanzie kulya Mispa kawawia, “Mpfondu njechiterewa Mndumii-Ruwa kipfa kyanu.”

⁶ Koikyo Waisraeli wose wakasanza kulya Mispa. Waledahia mṟinga na ifuletsia wanda oshangunyi lo Mndumii-Ruwa wakakuotoya mkonu fulya fose, wakahamba, “Lomewuta wunyamaṟi oshangunyi lo Mndumii-Ruwa.” (Samweli nawei msongoru o Waisraeli kulya Mispa).

⁷ Kiheri Wafilisti waleicho ke Waisraeli wakusanzie kulya Mispa, wanene watanu wa Wafilisti wakahenda iwasaṟikia. Waisraeli wekiicho mbonyitso waleowuo Wafilisti.

⁸ Kyasia, wakawia Samweli, “Kulade kulafihiṟia Mndumii-Ruwa, Ruwa odu, kipfa kyadu. Engeṟa imweṟeṟia naluashuo kuwuka ko Wafilisti.”

⁹ Nahong'u Samweli kaira kichoondi kionga kainenga Mndumii-Ruwa kui kidaso kyekoṟa modonyi kyose. Naho Samweli katerewa Mndumii-Ruwa kipfa kya Waisraeli nao kaṟohuo kiterewo kyo kyake.

¹⁰ Kiheri Samweli awei iwika kidaso kilya kemaya modonyi, Wafilisti waletikiria hafui ipufukia Waisraeli. Kyaindi Mndumii-Ruwa kaende ṟu lying'anyi lya ikuṟuṟuma ko Wafilisti kawawika kiṟumaṟuma, wakapufutso oshangunyi lo Waisraeli.

¹¹ Waisraeli walekure Mispa na iwingia Wafilisti mṟasa kufui na mṟi fo Beth-kari wakawarumatsa.

¹² Numa Samweli kaira iho na ilihoṟotsa makidi hawi ha Mispa na Sheni, kadumbuya iholyo rina nyi Ebenezeri, kechihamba, “Mṟasa iya Mndumii-Ruwa amelutarama.”

¹³ Mkonufo Wafilisti wakawingo; nao Mndumii-Ruwa kawaima ikapa oruka lo Waisraeli mandi ho hose Samweli awei na moo.

¹⁴ Mṟi yose ya Waisraeli iya Wafilisti waleiduo makidi hawi ha Ekroni na Gathi ilewihiṟio Waisraeli, nawo waletalaa oruka lowo kuwuka ko Wafilisti. Na hong'u kukawadase ofoṟo kiidi kya Waisraeli na Waamori.

¹⁵ Samweli nawei msongoru o Waisraeli kiheri kyake kyose.

¹⁶ Orio maaka Samweli nawekesenguda Betheli, Gilgali na Mispa na isanza Waisraeli handu waloyana ipfo mṟinyi yose.

¹⁷ Kiidima, nawekewuya na Rama, kipfa nyiwepfo kanyi koke;handu napfo aleweṟundia Waisraeli cha mndu modumbuo mondu. Kawikia Mndumii-Ruwa rasio kulya Rama.