1SAMWELI 6 - Bibilia Kui Mdedie fo Kimochi

Isanduku lya mma lyawihiṟo

¹ Isanduku lya Mndumii-Ruwa lilekaa orukenyi lo Wafilisti ko meri mfungade,

² Wafilisti walelaha wakohanyi wawo na walasha wawo wakawawesa, “Luwike luda na isandukulyi lya Mndumii-Ruwa? Luwienyi chandu lochiidima iliwihiṟa na handu halyo.”

³ Nawo wakawawia, “Mukawihiṟa isandukulyi lya Ruwa o Waisraeli, mulaliwihiṟe na mawoko ha wulya. Kyaindi kimuwaṟi muliwihiṟe murie na njoko, mwano fowuto wunyamaṟi kundu muwuto wunyamari wonu. Mukawuta mudo mochikia, nanyo mochimanmya nki kitewe awa momulisa wukiwa orio kiheri.”

⁴ Wandu wakawesa, “Lochimdaya mwano fo kiki fowuto wunyamaṟi?” Nawo wakawahaluo, “Nyi sanamu tsitanu tsa sahabu tsifananyi na maode, na sanamu tsitanu tsa sahabu tsifananyi na mbewa, orio kimu kikae handu ha mnene umu o Wafilisti, cha kipfa ndaaṟe iya ya makokoi ilediko konu na iya iya ilediko ko wanene wanu

⁵ Kimuwaṟi musungusie sanamu tsa maode na tsa makokoi hanu, shindo shekerumatsa oruka lonu. Kimuwaṟi muindie Ruwa o Waisraeli. Kofia nechida elemukapa, nyo muwenyi, maruwaho hanu na oruka lonu.

⁶ Nyiki ili muwada Ngano cha Wamisri na Farao Ngesa, Mndumii-Ruwa alekapa Wamisri walelekia Waisraeli wakure kowo, nawo wakakure

⁷ Kyasia, teseheṟenyi ikari lyihya na mmbe tsiwi tsikamo sa tsilalemepfungio ikumbi lyedema; tsipfungienyi ikarilyo kyaindi mahache ha mmbetso tsilahende na mayaho, hadeyo ipfo mfiṟihenyi.

⁸ Irenyi isanduku lya Mndumii-Ruwa muliwikye ipfo ikarinyi. Mbai ya isandukulyo wikyenyiho sanamu tsilya tsa sahabu isho mumdikia cha mwano fowuto wunyamaṟi. Numa mulekie ikarilyo lyihende kundu lyechikuhendia.

⁹ Indi ambuyenyi, kokoya ikarilyo lyechihenda lyimu ko lyimu waambuya orukenyi lolyo, mṟi fo Beth-Shemeshi, nlyondi lochimanya ke mndu aleluendie ndaṟe ii ya makokoi nyi Mndumii-Ruwa kyaindi kokoya lyilahendapfo, nlyondi lochimanya ke chi owoko lokepfo, indi ngapo nyi kui ndenga njiwicho.”

¹⁰ Walewuta chandu walewio; waleira mmbe tsiwi tsikamo wakatsipfungia ikarinyi, na mahache hatso hakadeo mfiṟihenyi.

¹¹ Isanduku lilya lya Mndumii-Ruwa wakaliwika kulya ikarinyi handu hamu na kikunja kiwode sanamu tsilya tsa sahabu tsa makokoi na tsilya tsa maode.

¹² Mmbe tsilya tsikahenda lyimu ko lyimu wohenda mṟinyi fo Beth-Shemeshi tsilaembeṟuke ko kulyo manya kumoso, na tsiweiana kiheri tsiwehenda.

¹³ Wamangi walya watanu wa Wafilisti waletsiosha tane mṟasa fo Beth-shemeshi isambuo Ngano kulya mademenyi. Wekiambuya huye wakawona isanduku lya Mndumii-Ruwa wakachihio mnu.

¹⁴ Ikarilyo lyiwehenda woambuya demenyi lya Yosua, mndu o Beth-shemeshi. Lyekishikaho likahoṟoka kufui na iho ling'anyi. Wandu wakawunduo ikari lilya, mbau tsilya tsalyo wakahaluo ngu tsekoṟa kidaso kyemaya modonyi kya mmbe tso waletsiwika ko Mndumii-Ruwa.

¹⁵ Walewi walelisotsia wanda isandukulyo lya Mndumii-Ruwa na kikunja kilya kiwode sanamu tsilya tsa sahabu na itsihekia huya iho lilya ling'anyi. Kyasia, mkonufo wandu wa Beth-shemeshi walelekia mwano yekoṟa, na iwikia Mndumii-Ruwa shidaso.

¹⁶ Wanene walya watanu wa Wafilisti wekiwona isho, walewuya na Ekroni, mkonu na ifo ifo.

¹⁷ Wafilisti waledika sanamutso tsitanu tsa sahabu tsa maode ko Mndumii-Ruwa shiwe mwano fowuto wunyamaṟi wowo, sanamu imu kipfa kya mṟi fumu: mṟi fo Ashdodi, mṟi fo Gaza, mṟi fo Ashkenoni, mṟi fo Gathi na ko mṟi fo Ekroni.

¹⁸ Walewedikase sanamu tsitanu tsa sahabu tsa makokoi cha itala lya mṟi yose ya Wafilisti iwenjichilie nyi wanene watanu wa Wafilisti. Mṟiyo iwewode omombo luikare na shihongo shilaweshiiṟihie na omombo. Iho lilya lying'anyi lyiwei demenyi lya Yosua o Beth-shemeshi, handu walehekiaho isanduku lya Mndumii-Ruwa, nyi kiṟingishio kya mbonyitso mṟasa inu.

¹⁹ Mndumii-Ruwa nalewaaha wandu makumi mfungade wa mṟifu fo Beth-shemeshi, kipfa kya ili waleambuya kulya isandukunyi lyake. Wandu wakawika kilio kipfa kya ili Mndumii-Ruwa aletana wuwahi wung'anyi wudo kiidi kyawo.

Isanduku lya mma kulya Kiriath-yearimu

²⁰ Kiidima, wandu wa mṟifo Beth-shemeshi wakahamba, “Nyiu eidima ihoṟoka oshangunyi lo Mndumii-Ruwa, Ruwachu mwele? Nyiku lochimduo nawuke kiidi kyadu?”

²¹ Waleduma ndumi ikahenda ko wandu wa mṟinyi fo Kiriath-yearimu wahambe, “Wafilisti wamewihiṟa isanduku lya Mndumii-Ruwa, nchonyi muche ilionduo.”