1SAMWELI 5 - Bibilia Kui Mdedie fo Kimochi

Isanduku lya mma lya Ruwa kiidi kya Wafilisti

¹ Wafilisti wamema iduo isanduku lya Ruwa, walelikudika kuwokia mṟinyi fo Ebenezeri tane mṟinyi fowo fo Ashdodi.

² Naho, wakaduo isanduku lya Ruwa hekalunyi lya ruwa owo Dagoni na iliwika kufui na ruwacho owo.

³ Ili lya ngama ngamenyi, wandu wa mṟinyi fo Ashdodi wekikure walewona sanamu ya Dagoni ihoiye na mbuo sumhana na isanduku lya Ruwa. Wakahoṟotsase sanamu iya ya Dagoni na iiwihiṟiase handu hayo.

⁴ Kyaindi, ilyi lya ngama ngamenyi wekikure, wakawona sanamu iya ya Dagoni iolokie na mbuo sumhana na isanduku lya Ruwa, mdo, madende na mawoko ha sanamuyo shose shifunjikie, shikawa shilee wanda kufui na kisingiti kya mongo. Imbihulyo lya sanamu ya Dagoni nlyo lyiwetsuheeho.

⁵ Nkyo kitewe wakohanyi wa Dagoni na iwo wose wekeida na mba iindia Dagoni ipfo Ashdodi, kiheri waiida na hekalunyi lya Dagoni wekyechuma kisingiti kya hekalulyo lya Dagoni mṟasa inupfo.

⁶ Mndumii-Ruwa naletuura na iowesha wandu wa Ashdodi iki kiwichowicho. Nalewatuura na wamṟasa wawo, kyechiwaendie ndaaṟe ya moode.

⁷ Wandu wa Ashdodi wekiwona isho shiwahoya, wakahamba, “Ruwa o Waisraeli ailukapa kalutuura iki kiwichowicho so na ruwa odu Dagoni. Isanduku lya mma lya Mndumii-Ruwa lyechiidima ikaa kodupfo.”

⁸ Waledumia wandu na isanyia wanene wose wa Wafilisti na iwawesa, “Ngesa, luwikye luda na isandukulyi lya Ruwa o Waisraeli Wanenewo wakahaluo wechihamba, ‘Duonyi isandukulyo lya Ruwa o Waisraeli mṟasa Gathi.’” Kyasia, wakaliduo tane mṟinyi fo Gathi.

⁹ Kyaindi wamemaa iliduo mṟinyi fo Gathi, Mndumii-Ruwa kakapa mṟifo, kawaendie wuowu wung'anyi kulya mṟinyi; kakapa wasoṟo wa ipfo mṟinyi, wanake na wameku, kechi waendie maode.

¹⁰ Ko ikyo, wakaduo isandukulyo lya Ruwa tane mṟinyi fo Ekroni. Kyaindi kiheri isandukulyo lya Ruwa lileshitsopfo, wandu wa mṟifo walekapa kitohio wechihamba, “Waluendie isanduku lya Ruwa o Waisraeli kundu so lupfe na wandu wadu.”

¹¹ Kiidima wakaduma ndumi na isanya wanene wa Wafilisti na iwawia, “Wihiṟenyi isandukulyi lya Ruwa o Waisraeli na handu halyo kundu lyilaluwaahe so handu hamu na wandu wadu Walewuta wado cha kipfa kulewada wuowu wung'anyui mṟinyi kose cha kipfa Ruwa nawekyetuura wandu iki kiwichowicho.”

¹² Na walya walalepfa walewado nyi maode tane kilio kya mṟi kileshika ruwehu.