1SAMWELI 4 - Bibilia Kui Mdedie fo Kimochi

Isanduku lya mma lyawado

¹ Kiherikyo, Wafilisti wakakusanza handu hamu kundu wakapane na Waisraeli. Waisraeli walewika kiṟaṟo kyawo ipfo Ebenezeri, na Wafilisti wakawika kiṟaṟo kyawo ipfo Afeki.

² Wafilisti walesaṟikia Waisraeli, na numa ya ngapano njiwawo Waisraeli wakawingo. Waisraeli shiku shiina wakawooho alya alya kiidi kya ngapano.

³ Olemale wa shidenyi walekia kirenge wekishika kiṟaṟonyi, wameku wa Waisraeli wakahamba, “Nki ili Mndumii-Ruwa aluda lukawingo nyi Wafilisti inu nndenyi luhende iende isanduku lya mma lya Mndumii-Ruwa kuwuka Shilo, kundu naidime ihenda naso shidenyi naluashuo mawokonyi ha wakituwa wadu.”

⁴ Naho waleduma waṟundi kulya Shilo, wakaende isanduku lya mma lya Mndumii-Ruwa menyi matorito adamie cha mangi huye ya makerubi; Wanakye walya wawi wa Eli, Hofni na Finehasi walecha handu hamu na isandukulyo lya mma lya Ruwa.

⁵ Isanduku lya mma lya Mndumii-Ruwa lyekishitso kiṟaṟonyi Waisraeli wosewalefahia na sia, tane oruka loose lodihina.

⁶ Wafilisti wekiicho ṟulyo lya sia walehamba, “Kitohiokyo kyose ipfo kiṟaṟonyi lya Waebri kyaloṟaki.” Wekimanya ke isanduku lya mma lya Mndumii-Ruwa lileafukia kiṟaṟonyi kya Waisraeli,

⁷ Wafilisti waleowuo; wakahamba, “Nkya lohi ruwa ameafukia kiṟaṟonyi kyawo! Ochia lodu! Kindo kya mbaṟi ii kilemewonekyepfo.

⁸ Ochia lodu! Nyiu echiidima iluashuo kuwuka maruwaha hawode pfinya? Iho nyi maruwa halewaaha Wamisri ko orio mbaṟi ya ngapo kulya nuka.

⁹ Wulalule, lanye Wafilisti kukarishenyi. Muwe ngohoda mlashike iwa masinga ha Waebri kimu chandu nawo wawei masinga hadu. Kutumhaṟenyi cha wasoṟo mukapane.”

¹⁰ Wafilisti walekapana kiumi wakawinga Waisraeli; Waisraeli wakadicha orio mndu kikoke amonyi. Mkonufo kulekaapfo wuwaahi wung'anyi cha kipfaolemali wechumia na madende shiku makumi haṟaṟu wa Waisraeli walewooho.

¹¹ Isanduku lya mma lya Ruwa lilewado, na wanake walya wawi wa Eli, Hofni na Finehasi wakawooho.

Opfu lo Eli

¹² Mkonu nafo, mndu umu o kisharinyi kya Benyamenyi kadicha awuka kiidi kya otasa lo kusonguo lo shidenyi mṟasa Shilo nguo tsake tsirandukie randukie, na kilulyi mdonyi koke.

¹³ Eli awodo nyi mkeukeu mrimenyi foke kya isanduku lilya lya Ruwa, nawedamie loṟikehu loke mbai ya njia kechiambuya. Mndu ulya kyekiafukia mṟinyi kaonguo mbonyitso wandu wa mṟi fose wakapoṟohoṟa.

¹⁴ Eli kyekiicho ru lya kiliokyo kawesa, “Kitohiyokyo nkya ikii?” Mndu ulya kahenda owinyi kufui na Eli na immbia mbonyitso.

¹⁵ Mandiho Eli naweshitsie maaka makumi kenda na mfungade na meso hake hawemefafaa.

¹⁶ Mndu ulya kawia Eli, “Inyi ngawuka shidenyi wulalu kudi; ngadicha njiwuka shidenyi inu.” Eli kammbesa “Mbonyi tsiwei tsida ipfo shidenyi mana oko?”

¹⁷ Mndu ulya aleende mbonyi kahamba, “Waisraeli wadicha Wafilisti. Kukaapfo wuwaahi wung'anyi ko Waisraeli. Ngoseṟa ya isho shose, wana wapfo wawawi Hofni na Finehasi wawoho, na isanduku lya mma lya Ruwa lyadao.”

¹⁸ Mnducho kyekisenda tupu isanduku lya Ruwa, Eli kaho na mhongo awuka loṟikyehu loke mbai ya mongo fo mṟi. Eli kyekioloka ado nzingo yake ikafunjika kipfa nawemku na mshimbi, nao kapfa. Eli nawei msongoru o Waisraeli ko maka makumi haana.

Opfu lo mkusu mka o Finehasi

¹⁹ Kingise kikawa, malyio mana o Eli; o mka o Finehasi kiherikyo nawei mlemo na kiheri kyake kyefee kiwei kufui. Kiheri aleicho ke isanduku lya mma lya Ruwa liledao na ke ndamii oke, na mii oke wamepfa, oweṟe kawado nyi okooṟa na ifee mana.

²⁰ Kyasia, kiheri aweipfa, waka walya weambia mana walemmbia, “Kulaowuo, cha kipfa noinengo mana o womi.” Kyaindi o nalawaṟohuo kindo, manya nalawaadanyie.

²¹ Nao kadumbuya mana ulya oke rina nyi Ikabodi, cha ili ohamba, “Kiṟumi kya Ruwa kyawuka ko Waisraeli.” Kyehamba ke isanduku lya mma lya Ruwa lyamewado na kingise ndamii oke na mii oke, wose walepfa.

²² Khamba, “Kiṟumi kya Ruwa kyamewuto ko Waisraeli kipfa isanduku lya mma lya Mndumii-Ruwa lilewado.”