1SAMWELI 31 - Bibilia Kui Mdedie fo Kimochi

Opfu lo Sauli na wana wake

¹ Nahong'u Wafilisti wakakapana shida na Waisraeli; nawo Waisraeli wakadicha oshangunyi lo Wafilisti, wakawaahio fumvuhu lya Gilboa.

² Kyaindi Wafilisti waleṟingichia Sauli na wana wake, wakawaaha Yonathani, Abinadabu na Malkishua, wana wa Sauli.

³ Shida iwei njiwawo mnu nakamu yekapana na Sauli. Walelasa na mfi na kiheri walemmbona wakammbika shifaṟe shing'anyi.

⁴ Nlyondi Sauli alewia mndu ulya ekemlaṟa shisha shake, “Somuo oshu lopfo nonjisekeche njipfe, kundu wanduwa walawode Ruwa walache injiwaaha na oshu.” Kyaindi mndu ulya ekyemdaṟa shisha nalakarie kipfa naleowuo mnu nakamu. Ko ikyo Sauli naleira oshu loke o amonyi, kaluolokia.

⁵ Numa mndu ulya ekyemdaṟa shisha kekiwona ke Sauli amepfa, nao-daa kaolokia oshu loke kapfa handu hamu na Sauli.

⁶ Nyi wudo Sauli alepfa, na wana wake waṟaṟu, na mndu ulya ekyemdaṟa shisha handu hamu na wandu wake wose; mkonu na ifo ifo.

⁷ Na Waisraeli wawei ora lo kawi lo pichilyo, na wengi wawei ora lo ngamenyi lo meda fo Yordani wekiwona ke Waisraeli wadicha, nao Sauli na wana wake wamepfa, walesama mṟi yawo, wakadicha. Wafilisti wakahenda ikaa kulya mṟinyi.

⁸ Ilyi lya ngama, Wafilisti wekihenda iwada masaa ha iwo walewooho walekooya mnyinga ya Sauli na wana wake fumvuhu lya Gilboa.

⁹ Waledumbuo mndo fo Sauli na imwatuo shisha shake; numa wakaduma ndumi kulya orukenyi lo Wafilisti kose ionguo mbonyi njicha kanyi ko mfanano yawo na ko wandu.

¹⁰ Shisha shilya shake waleshiwika sinagoginyi lya ruwa lyawo Maashtarothi; kiidima wakamasa mbihu foke omombonyi lo mṟi fo Beth-shani.

¹¹ Kyaindi kiheri wandu wa mṟi fo Yabesh ipfo Gileadi waleicho chandu Wafilisti walewutia Sauli,

¹² wandu ngohoda tsose walekure, wakachumia kio taṟaṟaa, wakairaho mbihu fo Sauli na mbihu ya wana wake wakaisotsa alya omombonyi lo Beth-shani; wakaiwihiṟa na Yabeshi wakaikoṟiaho.

¹³ Numa, wakaira mafuo hawo wakahaṟika wanda ya mmoya ipfo Yabeshi; nawo wakakuotoya ko mkonu mfungade.