1SAMWELI 30 - Bibilia Kui Mdedie fo Kimochi

Shida na Waamaleki

¹ Komeidaho mkonu iwi, Dawidi na wandu wake wakawuya na Siklagi. Waamaleki wawemewada Negebu handu hamu na mri fo Siklagi wakafurumatsa na modo.

² Wawemewada waka na wandu wose wawei ipfo mṟinyi, wang'anyi na watutu. Iwo walewawada walehenda nawo wai na moo, walawaahe mndu ma umu.

³ Kiheri Dawidi na wandu wake waleshika kulya mṟinyi walekooya fumrumatse na modo, na waka, wana wawo wa kisoṟo na wa kika waledao wapfungo wa shida.

⁴ Nlyondi Dawidi na wandu wake walewooka ifihiṟa, walefihiṟa tane pfinya tsawo tsasia.

⁵ Waka wawi wa Dawidi Ahinoamu kuwuka Yezreeli na Abigaili mka mkusu o Nabali, nawo daa walewedao wai wapfungo wa shida.

⁶ Wulalu, Dawidi nawekeri kiidi kya ngataṟa tsing'anyi kipfa wandu wake wawewodo nyi fowa mrimenyi yawo kipfa kya ili wawedetsie wana wawo, wakamwowesha kya imkapa na maho. Kyaindi Dawidi kakukarisha mrimenyi na ikusiria Mndumii-Ruwa, Ruwa oke.

⁷ Dawidi kawia mkohanyi Abiathari mana o Ahimeleki, “Njiendie kisibau kya mkohanyi.” Abiathari kamwendie.

⁸ Dawidi katerewa Mndumii-Ruwa kyechimmbesa, “Ngesa, ngawingia ichekerolyi Na ngesa njechilikooya.” Mndumii-Ruwa kambia, “Liwingie kipfa nochilikooya nokiṟe na wanduwo walewado wai wapfo wa shida.”

⁹ Naho Dawidi kakure handu hamu na wandu walya mahana haṟandaṟu awei nawo Kiheri waleshika kimedenyi kya Besori, wakakooya wandu maata wawewawade wakadeeyoho.

¹⁰ Kyaindi Dawidi kaengeṟa ilatia ichekeṟo lilya arianyi na wandu mahana haana, wandu mahana hawi wale deeyoho kipfa walerengera mnu walaidime iambada kimeda kilya.

¹¹ Wandu walya wawi na Dawidi walekooya mndu umu Mmisri nuka nawo wakamdaaya Dawidi. Wakainenga mndu mkate na mṟinga.

¹² Walemnengase kipeṟengu kya mkate fo mkuyu na shimanja shiwi sha msabibu njihadutsu. Kyekimarisa ilya, kawada pfinya, kipfa awemelye kelya na inyo mṟingapfo ko mkonu iṟaṟu mfiri na kio.

¹³ Dawidi kammbesa, “Mndumii opfo nyiu? Na nku uwukie?” Nao kambia, “Inyi nyi Mmisri. Nyi mṟundi o Mmaleki umu. Mndumii oko nalenjida numa mfiri iṟaṟu ileida kipfa njiweluo.

¹⁴ So lulekapa Negeya, Wakerethi na ora lo Yudaya handu hamu na Negebu ya Kalebu. Mṟi fo Siklagi lulefurumatsa na modo.”

¹⁵ Dawidi kammbesa, “Ngesa, oidima injiduo ko ichekeṟolyoṟ.” Mana ulya kambia, “Kokoya onjiliia nyamu kui rina lya Ruwa ke ochinjiwaahapfo manya ochinjiwika mawokonyi ha mndumii ulya okopfo, njechikuduo.”

¹⁶ Manakye ulya kaduo Dawidi mtano handu ichekeṟo lilya lyiwei. Wekishikapfo walekooya ichekeṟo lilya linyanyaṟikie orio handu kyamba waweliie na inyo kipfa shindo walewada kuwuka ko Wafilisti na orukenyi lo Yudaya shiwefoi, mnu nakamu.

¹⁷ Dawidi nalewooka wokia ngamenyi tane ili lya ngama kyukanyi. Kuwode mndumsoṟo alekiapfo shile nyi wanake mahana haana sa waledooya ngamia wakadicha

¹⁸ Dawidi kaashuo orio kindo Waamaleki wawedaaye, na waka walya wake wawi.

¹⁹ Orio kindo kyawo: kiwe king'anyi ang'u kitutu, mana o womi ang'u o waka, Dawidi nalemwashuo.

²⁰ Dawidi nalewewihiṟa daa mapo hose ha machondi na mmbe, na wandu wake wakateteṟa shumasho wechishisongoṟa, wechihamba, “Shindo Dawidi aende shidenyi.”

²¹ Dawidi kawuuya wandu walya mahana hawi waledeeyo alya kimedenyi kya Besori kipfa kya ili walelehela walaidime ihenda shidenyi. Wandu walya wekiwona Dawidi handu hamu na walya wawei nao wakahenda imwambia. Kiheri Dawidi aleshika kufui na wanduwo, kawaiṟikiṟa.

²² Kyaindi wandu wa mkahakaha na wanyenyi kiidi kya wandu wawerianyi na Dawidi, wakahamba, “Lochihawia wanduwa kindokyo kyose luleende shidenyipfo cha kipfa walehenda nasopfo. Indi waduo waka wawo na wana wawo, wakuhendie.”

²³ Dawidi kawawia, “Chi wudopfo lanye wana wa wama wako. Mochiidima iwuta mudo ko ikyo Mndumii-Ruwa aluinengiepfo. Naleluringa kipuo, ichekeṟo lilya lyose kaliwika mawokonyi hadu; lilya lilecha ilusaṟikia.

²⁴ Kuwode mndu echiidikiana na makusaṟo hanupfo! Ulya alehenda shidenyi na ulya aledeeyo kyechiringa nzohoṟa tsadu, orio mndu nechiinengo ohawi luhianyi na lo odoye.”

²⁵ Wokia mkonufo Dawidi nalewika mdumbuye fo fukowa nyi iwawaso na chile kiidi kya oruka lo Waisraeli mṟasa inu.

²⁶ Kiheri Dawidi alewuya na Siklagi naledaaya mbuya tsake, wameku wa Yuda ohawi lo shiinengo kahamba, “Ngamudikia kiinengoki kuwuka shileendo shidenyi ya wakituwa wa Mndumii-Ruwa.”

²⁷ Shiinengoshi nalewedikia wandu wa Betheli, wandu wa Ramothi kulya Negebu, wandu wa Yatiri,

²⁸ wandu wa Aroeri, wandu wa Sifmothi, wandu wa Eshtemoa,

²⁹ wandu wa Rakali, wandu wa mṟi ya Wayerameeli, wandu wa mri ya Wakeni,

³⁰ Wandu wa Horma, wandu wa Borashani, wandu wa Athaki,

³¹ na wandu wa Hebroni. Wandu wake wawemeida kowo.