1SAMWELI 3 - Bibilia Kui Mdedie fo Kimochi

Mndumii-Ruwa achea Samweli

¹ Kiherikyo, mandi manake ulya Samweli kyechiṟundia Mndumii-Ruwa kechihoṟokio nyi Eli, ndumi ilecha iwuka ko Mndumii-Ruwa iwei ntutu; manya mawonesio hawukie ko Mndumii-Ruwa hawei maangu.

² Mkonu fumu ili kio, Eli alee kiṟihenyi kyake; meso hake hamewoka ifafaa, alawonyi necha.

³ Nao Samweli nawelee kulya hekalunyi lya Mndumii-Ruwa kufui na isanduku lya mma lya Ruwa. Kiherikyo taa ya Mndumii-Ruwa iweaka kyamba kulawemetambaṟuke.

⁴ Naho Mndumii-Ruwa kalaha Samweli! Nao Samweli kaidikia, “Ee!”

⁵ Kiidima Samweli kakambiṟa tapa kahendia Eli, kambia, “Ngamecha chandu onjilaha.” Kyaindi Eli kambia, “Inyi ngamekulahapfo. Henda laa.” Samweli kawuya kahenda laa.

⁶ Mndumii-Ruwa kalahase, “Samweli.” Samweli kakure, kahendiase Eli kambia, “Ngamecha chandu onjilaha.” Kyaindi Eli kambia, “Ngamekulahapfo mana oko, henda laa.”

⁷ Samweli awememanye Mndumii-Ruwapfo, manya ndumi ya Mndumii-Ruwa iwemedambuyo ko Samwelipfo.

⁸ Mndumii-Ruwa kalahase Samweli lya kaṟaṟu. Samweli kakure, kahendia Eli kambia, “Ngamecha chandu onjilaha.” Nyilyondi Eli alekumbuo ke nyi Mndumii-Ruwa ailaha Samweli.

⁹ Ko ikyo Eli kawia Samweli, “Henda laa, na ko koya akulaha, mmbie kudi, ‘Hoi Mndumii-Ruwa kededa, kyamba inyi mṟundi opfo njiichuo.’” Naho Samweli kawuya na handu hake kalaa.

¹⁰ Kiidima Mndumii-Ruwa kacha kahoṟokaho, kalaha Samweli cha o mawokioonyi, “Samweli! Samweli!” Samweli kahamba, “Hoi Mndumii kyededa, kyamba inyi mṟundi opfo njiadanyia.”

¹¹ Naho Mndumii-Ruwa kawia Samweli, “Ambuya, njikundi iwuta kindo kiidi kya Waisraeli kyechikangaṟitsa orio mndu oose echiicho.

¹² Mkonufo, njechiawutsia shilya shose njilehamba wokia mawokioonyi tane mtsitsionyi kya mbonyi tsa Eli na wa kanyi koke.

¹³ Njilememaa immbia ke njichakapa luwa lyake mlungana kipfa kya wuwicho wulya awuichi wo wanake wake walenjiisalucha inyi nao nalawaime.

¹⁴ Ko ikyo ngalya nyamu kya luwa lya mba ya Eli ke wechihooṟio kya wuwicho wowo manya indiipfo ma kui shidaso manya kui shiano.”

¹⁵ Samweli kalaaho mṟasa ili lya ngama ngamenyi, kiidima kakure kaṟuhuo mongo ya mba ya Mndumii-Ruwa. Kyaindi Samweli naleowuo iwia Eli mawonesioho.

¹⁶ Manya kudo, Eli nalelaha Samweli, kambia, “Samweli manaoko.” Samweli kaidikia, “Ee!”

¹⁷ Eli kammbesa, “Ngesa, Nki ki Mndumii-Ruwa alekuwia kulanjiṟikye kindo alekuwia. Kokoya nochinjiṟika ikyo alekuwia, Ruwa nechikutuura iki kiwichowicho.”

¹⁸ Kyasia, Samweli kaongoya Eli shose alewio, nalamṟikyeho manya kindo. Naho Eli kahamba, “O nyio Mndumii-Ruwa; nakeawutsia ikyo kyose awonyi nyi kii kicha koke.”

¹⁹ Samweli kaengeṟeka ing'ana nao Mndumii-Ruwa kamkaya, na shilya shose alehamba kuwode manya kimu kilaleawukiapfo.

²⁰ Wandu wose orukenyi kose ko Waisraeli wokia Dani, ora lo mtsudu, ushikye Beer-sheba, ora lo nuka, wakamanya ke Samweli nawei mwikimbi mhendeli o Mndumii-Ruwa.

²¹ Mndumii-Ruwa kaengeṟa ikuloṟa ipfo Shilo, handu alecha Samweli na ideda nao. Na orio mandi Samweli amehamba kindo Waisraeli wose walemwandanyia.