1SAMWELI 29 - Bibilia Kui Mdedie fo Kimochi

Dawidi aleho nyi Wafilisti

¹ Wafilisti walesanyiaichekeṟo hawo hose kulya Afeki, na Waisraeli walewikakiṟaṟo lyawo sokenyi ya mṟinga pichinyi lya Yezreeli.

² Wanene watanu wa Wafilisti wechiida na makamba hawo ha wandu mahana na wa shiku; nao Dawidi ai na wandu wake handu hamu na Akishi wawewaituma numa yawo.

³ Wasongoru wa shida wa Wafilisti wakawesa, “Waebri wa nkiki waiwuta iya?” Akishi kahaluo wasongoru wo wa shida wa Wafilisti kawawia, “Ichu nyi Dawidi, mṟundi o Sauli mangi ya Waisraeli; nao alemekaa na inyi ko kiheri kileshe; maaka yeitala.” Wokya adichia koko, njilemembone na deko lyosepfo.

⁴ Kyaindi wasongoru walya wa shida wa Wafilisti wakasuuya Akishi mnu wakambia, “Mbihiṟe nahendekaa handuho ulemnenga. Manya indii nalahende naso shidenyi, shila wudo kiheri kya ngapano neidima ihaluka na mkituwa odu. Uwonyi ke mnduchu nechiwono maanya mcha foidikiana na mndumii oke wawe wakituwa wadu ipfo shidenyi?

⁵ Ngesa, ichu chi Dawidi ulya ulya waka waleimba kyake kiheri wawekeri ishina wechihamba, “Sauli nalewaaha shiku, kyaindi Dawidi nalewaaha shiku makumi.?”

⁶ Akishi kalaha Dawidi kambia, “So Mndumii-Ruwachu menyi moo, nolewa mhendeli koko. Kiwechiwa kindo kicha koko inyi luhende shidenyi luwawi, cha kipfa njilemewone kiwicho kyose kopfo wokia mkonu fulya kulecha na koko tane inupfo. Ma kudo, wanene wengi wamechihio kyapfo iyopfo.

⁷ Ko ikyo wulalu, wuya na kanyi. Kuhendie na ofoṟo kundu kulashike isukiṟa wanene wa Wafilisti.”

⁸ Dawidi kawia Akishi, “Nki ki ngamewuta? Chandu ohamba kye, kulemenjiwone na deko lyosepfo wokia mkonu njilewooka ikuṟundia mṟasa inu, nki kechitewa njide njilahenda ikapana na wakituwa wa mndumii oko mangi.”

⁹ Akishi kambia, “Njiichi ke uwode mti koko inyipfo cha msu o Ruwa. Manya kudo, wasongoru wa shida wa Wafilisti wahamba, ‘Nalahende naso shidenyi manyale.

¹⁰ Wulalu iyo na waṟundi wa mndumii opfo Sauli walecha na iyo, ngama ngamenyi otuko, kurenyi mukuhendie oweṟe ili kochitambaruka.’”

¹¹ Ko ikyo, ili lya ngama ngamenyi, Dawidi handu hamu na wandu wake wakakure wakawuya na orukenyi lo Wafilisti. Kyaindi Wafilisti wo wakahenda Yezreeli.