1SAMWELI 28 - Bibilia Kui Mdedie fo Kimochi

¹ Komeidaho kiheri kiliwe, Wafilisti wakasanyiamachekeṟo hawo waire shida yekapana na Waisraeli. Akishi kawia Dawidi, “Nomanye necha ke iyo na wandu wapfo kimuwaṟi ihenda na inyi shidenyi.”

² Dawidi kawia Akishi, “Ee da! Nochiwona kindo mṟundi opfo echiidima iwuta.” Aishi kambia, “Na inyi njechikuhaluo nowe mringi oko monjiringa kiheri kyose.”

³ Kiherikyo Samweli awemepfa, na Waisraeli wose wawememaa imṟika na imkapia kilio kulya mṟinyi foke fo Rama. Sauli nawefunyie walasha na wasawi wawuke kulya orukenyi.

⁴ Wafilisti walekusanza wakawikakiṟaṟo lyawo ipfo Shunemu; na Sauli kalaha Waisraeli wose handu hamu wakawikakiṟaṟo lyawo fumvuhu lya Gilboa.

⁵ Kiheri Sauli alewonaichekeṟo lya Wafilisti kawooka iowuo, kawooka idedema kya wuowu wo mrimenyi foke.

⁶ Kiheri aleterewa Mndumii-Ruwa, Mndumii-Ruwa alededa nao manyalepfo ma kui ndodo ma kui maho hededapfo Urim na Thummim, ma kui waikimbipfo.

⁷ Nlyondi Sauli alewia Waṟundi wake, “Njishieny mndumka sa eidima ilasha kundu njihende koke njikemmbesa mbonyi.” Waṟundi wake wakambia, “Kuwode mlasha umu ipfo Endori.”

⁸ Kyasia, Sauli kakuilacha kaṟaa maṟao hengi, kahendapfo handu hamu na wandu wake wawi. Waleshika ko mndumkacho kio, kambia, “Kenjilashia kui waṟufu wawicho noende mnducho njechikusendia.”

⁹ Mndumka ulya kambia, “Iyo noichi kya lohi ke mangi Sauli nalekombetsa na kamu walasha na wahanga wose wa orukenyi lo Waisraeli. Wulalu nki ilyi onjiwikia mdeho fonjiwada na injiwaaha?”

¹⁰ Sauli kamliia nyamu kuirina lya Mndumii-Ruwa kechihamba, “So Mndumii-Ruwachu menyi moo, ochiwona ngapo yose yechikuhoya kipfa kya ikipfo.”

¹¹ Mndumka ulya kammbesa, “Njikuendiepfo u.” Sauli kamhaluo, “Njiendiepfo Samweli.”

¹² Mndumka ulya kekiwona Samweli nalefihiṟa na ṟu lying'anyi, kawia Sauli, “Nki ilyi onjilemba Iyo nyi Sauli!”

¹³ Mangi Sauli kambia, “Kulaowuo! Nki ki owona?” Mndumka ulya kambia, “Njiwonyi ruwa kyechicha awuka terinyi.”

¹⁴ Sauli kawesa mndumka ulya, “Nafanyi na kikii?” Mndumka ulya kambia, “Nafananyi na mndumsoṟo mmeku adopfo, aṟee iṟikano.” Nahong'u, Sauli kamanya ke icho nyi Samweli Sauli kaarama wanda na kyamu kyechiadapfuma.

¹⁵ Samweli kawesa Sauli, “Nkilyi onjiwinyisha injiende na kunu huye?” Sauli kamhaluo kambia, “Inyi njiwodo nyi wukiwa wung'anyi! Wafilisti waira shida na inyi, na Ruwa najikumba mhongo; ainjihaluose kui waikimbi ang'u kui ndodopfo Nkyo kimaduma ngakulaha nokenjiwia kindo njechiwuta.”

¹⁶ Samweli kahamba, “Nki ilyi onjiterewa njikuloshe na ate Mndumii-Ruwa amekukumba mhongo kawa mkituwa opfo?

¹⁷ Mndumii-Ruwa nakuwutia kilya alekuwia kui ṟu lyako inyi. Mndumii-Ruwa ameṟanduoranduo wumangi kuwuka mawokonyi hapfo, kawuinengia wamṟasa opfo Dawidi.

¹⁸ Cha kipfa, iyo kuleindia ṟu lya Mndumii-Ruwapfo manya kuleawutsia nyashi yake ko Waamalekipfo. Nkyo kimaduma inu Mndumii-Ruwa aikuwutia ishi.

¹⁹ Ngoseṟa ya isho, Mndumii-Ruwa nechikuwika iyo handu hamu na Waisraeli wose mawokonyi ha Wafilisti. Ngama, iyo na wana wapfo mochikooya mui na inyi; naichekeṟo lya Waisraeli daa Mndumii-Ruwa nechiwika mawokonyi ha Wafilisti.”

²⁰ Oweṟe, Sauli awodo nyi wuowu kipfa kya madedo ha Samweli, kaho wanda na kyamu; nalawade pfinya yose, kyamba aweliie kindo kyose ko mfirifo-pfo, kio na mfiri.

²¹ Naho mndumka ulya kahendia Sauli, nao kekiwona ke Sauli nawado mnu nyi wuowu, nalemmbia, “Inyi mṟundi opfo ngareka moo foko kipfa ngawuta chandu kulenjiwia njikuwutie.

²² Wulalu, njiadanyia inyi mṟundi opfo; njechikusungusia mkate nolye na iyo nochiwada pfinya nokuhendie na kyaṟo kyapfo.”

²³ Kyaindi Sauli kaleha kechihamba, “Inyi njechilyapfo.” Kya indi waṟundi wake handu hamu na mka ulya, walemterewa na lye, nao kawaidikia. Naho kakure alya wanda kadamia kitaṟenyi.

²⁴ Mndumka ulya nawewode ngache yake imu njinoru kulya kanyi koke, kaishinja owinyi, kaira na mso fo Ngano kasungusia mkate fulamtarang'ashe.

²⁵ Kainenga Sauli, kaweinenga na waṟundi walya wake, nawo wakawelya. Kiidima wakakure wakakuhendia kio kilya kilya.