1SAMWELI 27 - Bibilia Kui Mdedie fo Kimochi

Dawidi ai kiidi kya Wafilisti

¹ Dawidi kahia mrimenyi, “Mkonu fumu Sauli nechikaa nanjirumatse. Kicha kicha ho koko inyi nyi idichia orukenyi lo Wafilisti. Sauli nechihutsa macha injiṟinjawia kunu kiidi kya oruka lo Waisraeli. Na inyi njechikaa na kipuo.”

² Ko ikyo, oweṟe lumu Dawidi na wandu wake mahana haṟandaṟu wakahenda ko Akishi mana o Moaki, mangi ya Gathi.

³ Dawidi na wandu wake na wa kanyi koke wakakaa na Akishi ipfo Gathi. Dawidi nawewode waka wawi: Ahinoamu kuwuka Yezreeli na Abigaili mka mkusu o Nabali kuwuka mṟinyi fo Karmeli.

⁴ Kiheri Sauli alewio ke Dawidi naledichia Gathi, alemwoshasepfo.

⁵ Mkonu fumu Dawidi kawia Akishi, “Kokoya ngawona osaṟio oshangunyi lopfo ngakuterewa nonjiinenge mṟi fumu kunu orukenyi lopfo kundu fuwe handu hako hekaa. Kuwode kitewe njikae na iyo iya mṟinyi fo Ki-Umangi pfo.”

⁶ Mkonu fo Akishi kamnenga mṟi fo Siklagi Ko ikyo wokia mkonufo mṟinyi fo fukawa masaa ha wamangi wa Wayahudi.

⁷ Dawidi naleka orukenyi lo Wafilisti ko maaka fumu na meri ina.

⁸ Kiherikyo kyose Dawidi na wandu wake wasaṟikia Wageshuri Wagirisi na Waamaleke wandu wawei wenyi orukalo wokia kacha. Walesaṟikia wanduwo kulya orukenyi lowo mṟasa Shuri mṟasenyi na Misri.

⁹ Dawidi nalekapa orukalo nalatsuhaṟe mndu ma umu ai na moo nawe nyi mndu msoṟo ang'u nyi mndu mka, kawada machondi, mmbe, nzoi, ngamia na maṟao; numa kawuya na ishika ko Akishi.

¹⁰ Kiheri Akishi alemmbesa, “Inu ngapano uwewode yapfo nau?” Dawidi kambia “Yako na Negebu na Yuda ang'u yako na Negebu na Wayerameeli,” ang'u ya Negebu na Wakeni.

¹¹ Dawidi aleda mndu oose na moopfo nawe mndumka ang'u mndumsoṟo neendo na Gathipfo; nalekusaṟa mrimenyi: “Wechiidima ionguo shose shadu wechihamba, ‘Dawidi nalewuta iki na ikyo.’” Nyi wudo Dawidi aleichiwia iwuta kiheri kyose alekaa kulya orukenyi lo Wafilisti.

¹² Ko ikyo, Akishi naleidikia Dawidi, kyechihia, “Wodoe wa orukenyi lo Waisraeli wamkundi manyalepfo; ko ikyo nechinjiṟundia kiheri kyake kyose.”