1SAMWELI 24 - Bibilia Kui Mdedie fo Kimochi

Dawidi ahoṟia moo fo Sauli

¹ Sauli kekiwuya kikapanyio kyake na Wafilisti kawio ke Dawidi nakeri kulya nuka ya Engedi.

² Numa Sauli kaira waskari wake wasambuṟe shiku shiṟaṟu wai wecha kota wengi wose wa orukenyi lo Waisraeli, kahendaishiha Dawidi na wandu wake kiidi kya maṟaṟa ha Mburu tsa nja.

³ Sauli kashika opangenyi lumu luwei kufui na mfiṟiha fo machondi kaida na ipfo opangenyi kundu nakutarame. Dawidi na wandu wake wawedamie kulya kimolya kyamba kya opanga lulya.

⁴ Wandu wa Dawidi wakambia, “Mkonu Mndumii-Ruwa alekuwia ke nechikaa nachewika mkituwa opfo mawokonyi hapfo nommbutie ikyo ochiwona kimbaṟi, inu foshikia.” Nlyondi Dawidi alehendia Sauli kyombuho numa yake, kadumbuo ikechu lya nguo yake.

⁵ Dawidi kawooka isokio nyi fowa mrimenyi kipfa kya ili adumbuo ikechu lya nguo ya Sauli kiṟika.

⁶ Kawia wandu wake, “Mndumii-Ruwa nanjiime njilawutie mndumii oko kindo cha iki, akeri mshimbuo nyi Mndumii-Ruwa. Njilahoṟuo owoko loko njikape mndu sa Mndumii-Ruwa alemshimbuo.”

⁷ Kui madedo cha iho, Dawidi nalelosha wandu wake walawike Sauli kifaṟe; kawawawasa walamsaṟikie. Numa Sauli kakure nawuke kulya opangenyi nakuhendie.

⁸ Nao Dawidi kahoṟoka ili numa, kawuka kulya opangenyi kalaha Sauli, “Mdumii oko mangi.” Kiheri Mangi Sauli aleambuya numa, Dawidi nalearama wanda, kaindia Sauli.

⁹ Kiidima kambia, “Nki ili okeadanyia wandu wekekuwia, ‘Ambuya! Dawidi nakundi ikuwutia kindo kiwicho?’

¹⁰ Ambuya wulalu, inu nowona na meso hapfo iyo kumonyi; kiheri uwekeri kulya opangenyi Mndumii-Ruwa nakuwika mawokonyi hako. Wandu wako maata walenjiwia njikuwahe, kyaindi njilekusaṟia. Ngahamba njechihoṟuo owoko loko iwutia mndumii oko kiwichopfo kyamba o namsambuṟe nyi Mndumii-Ruwa kashio mafuda.

¹¹ Ambuya, wande oko, ailyi ikechuli lya nguo yapfo mawokonyi hako; kui idumbuo ikyechu lya ṟao lyapfo njilakikuwaahe, nochiidima imanya wulalu ke kya lohi inyi chi mndu mmbicho manya mbahipfo. Inyi njilemekuwutie wunyamaṟipfo manya chando uinjiṟinjawia.

¹² Mndumii-Ruwa nechidumbuo kyako inyi na iyo. O nakutae kiṟache iyo kyaindi inyi njechihoṟuo owoko loko ikuwutia kindo kiwicho manyalepfo.

¹³ Kumbuo kilya kikidede kacha, ‘Ko mndu mbicho kokewukapfo wuwicho,’ kyaindi inyi njechihoṟuo owoko loko ikuwutia kiwichopfo.

¹⁴ Wulalu iyo mangi ya Waisraeli ambuya mndu okundi imbaha! Ngesa, nokeri iṟinjawia u? Nuiṟinjawia kite kipfiie? Nuiṟinjawia sawa ang'u fusa?.

¹⁵ Kyasiang'u Mndumii-Ruwa nawe mndu modumbuo kyako na iyo. O nakeambuya necha kindoki, nakae ora loko najiashuo mawokonyi hapfo.

¹⁶ Dawidi kekimarisa ideda, Sauli kahamba, ‘Ilyo nyi ṟu lyapfo iyo mana oko Dawidi.’ Sauli kafihiṟa na ru.”

¹⁷ Kiidima kawia Dawidi, Iyo nowode wusumhanyi kota inyi; nonjitaa mecha ma ili njilekutaa mawicho.

¹⁸ Inu, noloṟa chandu ui mcha koko inyi. Manya chandu Mndumii-Ruwa alenjiwika mawokonyi hapfo kulenjiwaahapfo.

¹⁹ Ngesa mndu kawada mkituwa oke nekemlekia nakuhendie na kipuo? Kya kilya kulenjiwutia Mndumii-Ruwa nakuinenge kiinengo kicha.

²⁰ Wulalu ngamanya ke kya lohi nochiwa mangi ya Waisraeli, na wumangiwu wo Waisraeli wochiwanga wui mawokonyi hapfo.

²¹ Kyaindi kenjiliia nyamu kui rina lya Mndumii-Ruwa ke ochirumatsa luwa lyakopfo, manya ochiangatsia kuleshe rina lyako lyiwuke ko wande wakopfo.

²² Dawidi kaliia Sauli nyamu. Nahong'u Sauli kawuya na kanyi koke, kyaindi Dawidi na wandu wake wakahendaotiṟiwenyi.