1SAMWELI 21 - Bibilia Kui Mdedie fo Kimochi

Dawidi Aidicha Sauli

¹ Dawidi nalehenda ko mkohanyi Ahimeleki ipfo Nobu. Ahimeleki kakure ihenda imwambia na kunu naidedema, kammbesa, “Nki ili ocha na iya iyo kumonyi.”

² Dawidi kamhaluo kambia, “Njikeri iya kipfa kya iwawaso lya mangi. Nalenjiwia njilawie mndu ma umu kya kilya alenjiduma. Njileteṟia na wako ke lukooyane handu haliwe.

³ Ngesa Uwode kindo kyose Ngakuterewa mkate itanu, ang'u ikyo kyose kiipfo.”

⁴ Mkohanyi Ahimeleki kambia, “Iya njiwode mkate ingipfo. Njiwode mkate iya njiele tupu. Mochiidima iinengo mkate-yo kokoya wanduwa wapfo walalemelae na waka mkonu ii ya wulalu.”

⁵ Dawidi kambia, “Nkya lohi, orio mandi ngameira kyaṟo kya maṟunda ha mṟumo, waka wekekaa kuleshe naso! Kokoya mbihu ya wanake wako yekewa njiele na njiheṟemtsu kiheri lui kiṟundionyi kya orio mkonu, chi yechiwa njiheṟemtsu ngoseṟa kiheri lui kiṟundionyi kya mṟumo.”

⁶ Naho Ahimeleki kamnenga mkate iya njiele yeṟihichia, kyamba kulawewode mkate ingi shile na iyo yeṟihichia oshangunyi lo Mndumii-Ruwa, ikailacho mkate ingi mhya yawuto marikonyi.

⁷ Kyasia mkonufo kuweiho mṟundi umu o Sauli msa awemtirimishe oshangunyi lo Mndumii-Ruwa. Rina lyake nyi Doegi, Mwedomu, mohoṟokia wandu wa Sauli welisa shuma.

⁸ Kyasia, Dawidi kawia Ahimeleki, “Ngesa, owode oshu ang'u pfumu sa oidima injiinenga? Ṟungusu tsa mangi tsilenjitewa ngakure oweṟe, ndarie oshu loko manya kisha kingi kyose.”

⁹ Ahimeleki kambia, “Njiwode oshu lulya lo Mfilisti Goliati ulya kulembahia kulya pichinyi lya Ela, lui ipfo numa ya naivera (kitambaa kya kipeeta kya mkohany) luluoṟowie nguonyi. Ko koya kukundi kudaaye cha kipfa kuwode oshu lungi iyapfo.” Dawidi kambia, “Kuwode oshu lucha kota ilopfo; ngakuterewa nokunjiinengie.”

¹⁰ Mkonufo, Dawidi naledicha Sauli kahenda ko mangi Akishi o kulya Gati.

¹¹ Waṟundi wa mangi wakawia Akishi, “Ichu chi Dawidi, mangi ya oruka lo Waisraeli? Ngesa, chi ichu waweiimba kyake weambiana, wechishina temo wechihamba, ‘Sauli nalewaaha wandu shiku shake na Dawidi nalewaaha wandu shiku makumi hake?’”

¹² Dawidi nalaidime ihadima madedoho, kawooka iowuo mnu nakamu Mangi Akishi o kulya Gati.

¹³ Ko ikyo kailacha mwichiwie foke kakuhaluo ke nawodo nyi oṟuuṟe, kawooka iraharaha mamongo ha mṟi, kasotsa na oda lukasokia ngereronyi tsake.

¹⁴ Akishi kawia waṟundi wake, “Muichi ke mnduchu nawodo nyi oṟuuṟe; nki ili mlemende na koko?

¹⁵ Ngesa, muichi ke njikundise waṟundi wawodo nyi oṟuuṟe? Nki ili mulenjiendie mndu awodo nyi oṟuuṟe nache injiwinyisha kui mawuto ha oṟuuṟe? Ngesa, mnduchu nechiida na mba koko?”