1SAMWELI 2 - Bibilia Kui Mdedie fo Kimochi

Kiterewo kya Hana

¹ Nahong'u Hana katerewa kechihamba: Ngakapia Mndumii-Ruwa ngululu, mrimenyi foko. Njiṟumisha Mndumii-Ruwa ai pfinya yako, Njiseka wakituwa wako; kyamba njichihio kya wuwinzi woko.

² Kuwode msa ai mwele cha Mndumii-Ruwapfo; kuwode oose ai chaopfo; kuwode ai Iṟaṟa cha Ruwa odupfo.

³ Lekyenyi ikuichika lekyenyi ideda sha wutimbiri, Kyamba msa aichi nyi Mndumii-Ruwa, o nekyehesha mawuto hose.

⁴ Wuda tsa wawode pfinya tsilllefunjika. Kyaindi wafafa wakaengeṟa iwada pfinya.

⁵ Walya wawewode shelya shifoi ili mbooko, wulalu wekyeinengo kiṟundio kundu wawone kelya. Kyaindi walya wawewodo nyi njaa, wulalu wawodose nyi njaapfo. Mndumka mhumba naleinengo wana mfungade. Kyaindi mka awode wana wafoi, wulalu naledeo alawode mana.

⁶ Mndumii-Ruwa nekewaaha na Iṟutsa, o nekyewasotsia ko waṟumu nao nekewawihiṟase.

⁷ Mndumii-Ruwa neketana maata wawe wakiwa, na maata wawe wasuṟi. Wengi nekewa sotsa na wengi kawadosa.

⁸ Nekeiria wakiwa kuwuka kilulyinyi, nekeiria wawuṟie kuwuka mafunyi, kawadamiṟa handu hamu na wanene, na iwainenga kioṟa shidinyi sha kiṟumi. Kyamba ngo tsawuyana nyi Mndumii-Ruwa; o naleilika wuyana huya ngo tsake.

⁹ Moo ya waidiki wake nekyeiringa, kyaindi moo ya wawicho nekeiarisia kuleshe memenyi. Kyaindi mndu o wandu echiidima iwinga kui pfinya tsakepfo.

¹⁰ Wakituwa wa Mndumii-Ruwa wechifunjo shipeṟengu shipeṟengu, nechikoṟoṟoma kipfa kyawo, cha ikuṟuṟuma nginehu. Mndumii-Ruwa nechianduya wuyana wose. Nechiinenga mangi yake pfinya na ing'anyisha wuidimi wo msambuṟe oke.

¹¹ Nahong'u Elikana kawuya na kanyi kulya Rama. Kyaindi mana oke Samweli kadeo kulya Shilo kyechiṟundia Mndumii-Ruwa kyechisongoyo nyi mkohanyi Eli.

Wana wa kisoṟo wa Eli

¹² Wana wa kisoṟo wa Eli wawei wandu wawicho mnu nakamu. Walekeindia Mndumii-Ruwa menyi matorito.

¹³ Manya waleindia shindo shilya shiwewaṟi sha wandu iinenga wakohanyipfo orio kiheri mndu amekunda ilekia kidaso kyake, mṟundi o mkohanyi nalecha arieomambo lo maheho haṟuya maheho haṟaṟu; na kiherikya nyama idosia,

¹⁴ mṟundicho kailika omambo lo maheho haṟaṟu kulya nungunyi, nyama yamewutopfo na, ikawa nyi ya mkohanyi Waisraeli wooose walehenda Shilo walewutio wado.

¹⁵ Ngoseṟa ya isho, manya mafuda halamekoṟo, mṟundi o mkohanyi nekecha iwia icho molekia kidaso, Wutiaho mkohanyi nyama yekahaṟa, cha kipfa o echiambia nyama yapfo injikoṟepfo, kyaindi nyi njiwishi.

¹⁶ Na kokoya mndu cho kakuwia, Kyemetirima kuwoka njikemekoṟa mafuda numa nokuwutieho kiheokyo kyose okukundia, naho mṟundicho o mkohanyi, nechi mhaluo nammbie, Ote, kiwaṟi nonnenge wulalu. Shila wudo, njechiirakuo ko pfinya.

¹⁷ Wunyamaṟi wu wo wanakewo wa Eli wuweng'anyi mnu oshangunyi lo Mndumii-Ruwa. Kyamba wanakewo waweminie mnu shidaso shiwekeinengo Mndumii-Ruwa.

Samweli akeri kulya Shilo

¹⁸ Kiheri kyo, Samweli kaengeṟa iṟundia Mndumii-Ruwa, kyechiṟaa kizibau kya kitani.

¹⁹ Orio maka mae nawekempfumia ṟao litutu, kamdaaya arianyi na mii oke mandi wamehenda iwika kidaso orio maka.

²⁰ Eli kawikia Elikana na mka oke mboṟa kechihamba, Mndumii-Ruwa na kusumbe wana wengi iyo Elikana ko mkachu ichu; wakae handu ha ulya kuleinenga Mndumii-Ruwa. Kiidima wakawuya na kanyi.

²¹ Mndumii-Ruwa kasaṟia Hana kainengo wana wa kisoṟo waṟaṟu na wakika wawi. Mana ulya Samweli kaengeṟa ing'ana oshangunyi lo Mndumii-Ruwa.

Eli na wana wake

²² Kiherikyo Eli nawemekuo mnu nakamu. Kiheri aleicho mbonyi tsose tsa wana wake wa kiumi wawekewutia Waisraeli, chando wawekelaa na waka wawe keṟundia alya mongo fo ihema lyesanzia;

²³ nao kawawesa, “Nki ili mokewuta mudi? Njiichuo kuwuka ko wandu wose ke mawicho mokewuta.

²⁴ Manya mulawemowuta mudo wana wako cha kipfa mbonyitsi njiichuo kuwuka ko wandu wa Mndumii-Ruwa tsinjiwicho.

²⁵ Mndu kadekio odoe, neidima iterewio ko Mndumii - Ruwa, kundu Ruwa namhooṟie. Kyaindi mndu kadekio Mndumii-Ruwa nyiu eidima imterewia mhooṟie.” Kyaindi wanawo waleadanyia ndeawopfo, kipfa Mndumii-Ruwa awemedumbuo kya iwawaaha.

²⁶ Mana ulya Samweli kaengeṟeka ing'ana, kaengeṟa ikundo nyi Mndumii-Ruwa na wandu.

Wa mba ya Eli waikimbo

²⁷ Mkonu fumu, mndu o Ruwa kahendia Eli kambia, “Mndumii-Ruwa nahamba adi: ‘Njilekuloṟa ko wa mba ya Aroni, mandi wameku wapfo wawei masinga ha Farao orukenyi lo Misri.

²⁸ Kiidi kya shishari shose sha Waisraeli njilesambuṟaho Aroni na wa mba yake wawe wakohanyi wako; wanjiṟundie ipfo rasionyi lyako wadutsiepfo opfaamo waṟae kizibau oshangunyi loko. Ngainenga wandu wa mba ya ndeo shidaso shako sa Waisraeli walenjiendie shemaya modonyi.

²⁹ Nki ili kuleshiwadia riso shidaso na mwano njilewawasa wandu wanjiendie; na iyo koindia wana wapfo kota inyi. Mukakuiritsa muwenyi mochilya ohawi lulya lunoru na lucha lo mwano iya wandu wa Waisraeli wekyenjiinenga.’

³⁰ Ko ikyo, Mndumii-Ruwa, Ruwa o Waisraeli nahamba adi, ‘Njileteṟia ke wa mba yapfo na ya wameku wapfo mochicha oshangunyi loko munjiṟundie mlungana;’ kya indi wulalu Mndumii-Ruwa nahamba adi, ‘Mbonyitso tsikae kuleshe na inyi. Njechiindia walya wekenjiindia, na walya wanjiminie njechiwamina.

³¹ Ambuya kukeriicha kiheri njechiwaaha wana wa kisoro wose wa mba yapfo na luwa lyapfo, kulechikaapfo mndumsoṟo oose echikaa tane akuo.

³² Nochiwado nyi mkyeukyeu na iwadia wodoo riso kya mboṟa tsose njechiwainenga wandu wengi kiidi kya Waaisraeli. Kuwode mndu kiidi kya Waisraeli. Kuwode mndu kiidi kya wa mba yapfo echikaapfo tane akuopfo.

³³ Njechitsuhaṟapfo mndu umu o luwa lyapfo, nao nechinjiṟundia cha mkohanyi. Kyaindi nechiwa kipfupfuṟe, na echiwa na kindo kyekusiriapfo; na wa mba yapfo wengi wose wechiwooho iki kiwicho wicho.

³⁴ Kindo kyechihoya wana wapfo wawi wa kisoṟo Hofni na Finehasi nyi iki: Woose wawawi wechipfa mkonu fumu. Iki kyechiwa kichano kopfo.

³⁵ Numa njechiamtsa mkohanyi ungi mhendeli sa echiwuta shilya shii mrimenyi na wuṟangonyi woko. Njechimmbiia kishari kitumhari; nao nechiṟunda kiheri kyose oshangunyi lo mangi yako.’

³⁶ Icho oose echitsuhaa kiidi kya wa mba yapfo nechihendia mkohanyicho, na imterewa pesa ang'u kipeṟengu kya mkate, na immbia, ‘Ngakuterewa kyekunjiwikie handu kuwode maanya fose fo wukohanyi, kundu kulako njechikuwonyiaho kipeṟengu kya mkate.’”