1SAMWELI 19 - Bibilia Kui Mdedie fo Kimochi

Sauli aṟinjawia Dawidi

¹ Sauli kaongoya mana oke Yonatanyi na wachili wake chandu echiwaaha Dawidi. Kyaindi Yonathani mana o Sauli nawekundi Dawidi mnu nakamu.

² Ko ikyo, kambia, “Wande oko naikuṟinjawia nakuwaahe. Ko ikyo nokuṟise. Ngama ngamenyi, noowe handu ha mwowionyi, nokaeho.

³ Inyi njechicha njihoṟoke kufui na wande ipfo demenyi kundu ochiowa. Njechideda nao kyapfo iyo, na ikyo kyose njechimanya kiwuka koke, njechikuwia.”

⁴ Yonathani naleichika Dawidi oshangunyi lo ndeye, kambia, “Kulawute wunyamaṟi wose ko mṟundi opfo Dawidi kyamba o alemekuwutie wunyamaṟi wosepfo; mawuto hake kiheri kyose ekyekuṟundia hamecha.

⁵ Nalereka moo foke kiheri alehenda iwaaha Mfilisti ulya Goliati, nao Mndumii-Ruwa kainenga Waisraeli wuwinzi wung'anyi. Ilyi iyo kulewona kudo nulechihiyo. Nki ili ukundi iwuta wunyamaṟi; ipusuo samu ko iwaha Dawidi alawode kitewe?”

⁶ Sauli naleadanyia Yonathani, numa kalya nyamu, “So Mndumii-Ruwachu menyi moo, njechiwaha Dawidi-pfo.”

⁷ Ko ikyo Yonathani kalaha Dawidi na imwongoya mbonyitso tsose. Yonathani kaduo Dawidi ko Sauli, na Dawidi kaṟundia Sauli cha ili kuwooka.

⁸ Numa kukachase shida ya Wafilisti na Waisraeli Dawidi kaokure kakapana na Wafilisti, kawaaha Wafilisti wafoi na walya waleashuka wakamdicha.

⁹ Naho, mṟufu mmbicho fuwuka ko Mndumii-Ruwa fukaranga Sauli kiheri awedamie kanyi koke awode pfumu owokonyi, kiherikyo Dawidi nawekeri ikapa uda.

¹⁰ Sauli kaheṟia itocha Dawidi na pfumulyo. Kyaindi Dawidi nalesowia pfumu lilya lya Sauli likakapa mawanda. Dawidi kadicha kawukapfo.

¹¹ Kio kilya, Sauli kaduma wandu kanyi ko Dawidi wamtiichie kokoya naipfo kundu wambahe ngamenyi. Kyaindi Mikali mka o Dawidi kawia mii, “Kokoya kulakukiṟa moofo fopfo kioki, ngama nochiwooho.”

¹² Ko ikyo, Mikali kaṟoṟowisha Dawidi itiṟishenyi kamsotsia kya nja, nao kawukapfo kadicha.

¹³ Mikali kaira sanamu indo lyipache, kalilaṟa kindo kehekia mdo kitaṟenyi na huya mdo folyo kawikahofo mberi tsa mburu. Numa kashikia na nguo.

¹⁴ Kiheri Sauli aleduma wandu wahende iwada Dawidi, Mikali nalewawia ke Dawidi naluo.

¹⁵ Numa Sauli kawadumasepfo, na iwatutuma kechihamba, “Mendenyi Dawidi na koko ma kokoya nai kitaṟenyi kundu nawoho.”

¹⁶ Kiheri wandu walya waleida na mba ko Dawidi wakaambuya alya kitaṟenyi walewona sanamu ya indo lipache liiho na kindo kehekia mdo fo mberi tsa mburu huya mdo.

¹⁷ Numa Sauli kawesa Mikali, “Nki ili onjilemba kolekia mkituwa oko nadiche.” Na Mikali kawia Sauli, “Nalehamba nechinjiwaaha kokoya njilamtarama kundu nadiche.”

Samweli atarama iashuka lya Dawidi

¹⁸ Kiheri Dawidi aledicha nalehenda Rama ko Samweli. Kaongoya Samweli shindo shose Sauli alembutia. Kyasia Dawidi na Samweli walehenda ikaa kulya Nayothi.

¹⁹ Lyefurumia Sauli nalewio ke Dawidi nawei ipfo Nayothi ya Rama.

²⁰ Nlyondi Sauli aleduma wandu wakembada. Kyaindi wekikoya mamwingi fo waikimbi wechihamba shisuku na Samweli kechilisongoya, mumuyo fo Ruwa fukasokia waṟundi walya wa Sauli, nawo wakawooka ihamba shisuku.

²¹ Kiheri Sauli alewio mbonyitso naledumase waṟundi wengi, nawo wakawewooka ihamba shisuku. Sauli kaduma waṟundi wengise kamba lya kaṟaṟu, nawo daa walewoka ihamba shisuku.

²² Nlyondi o amonyi alehenda Rama. Kiheri aleshika ṟungunyi lya mṟinga lying'anyi likeri ipfo Seku, nalekooya mndu mliwe sa alemmbesa, “Samweli na Dawidi nyiku wai?” Mnducho nalemmbia, “Wakeri Nayothi, kulya Rama.”

²³ Sauli kahenda Nayothi, kulya Rama. Kyekishikapfo, mumuyo fo Ruwa fukamsokia, kawoka ihamba shisuku ai njienyi mṟasa Nayothi kulya Rama.

²⁴ Nalekuatuo maṟao hake kahamba shisuku oshangunyi lo Samweli. Kakaa kitaṟe mkonu fumu, mfiri na kio. Ko ikyo wandu wakawooka iwesana, “Ngesa, na Sauli nao-daa nawewa umu o Waikimbi?”