1SAMWELI 16 - Bibilia Kui Mdedie fo Kimochi

Dawidi ashio mafuda nawe mangi

¹ Mndumii-Ruwa kawia Samweli, “Nochiichio Sauli makulili mṟasa indi. Iyo kumonyi noichi ke inyi njilemleha nalawe mangi ya Waisraeli. Wulalung'u, ichuṟa ombe lopfo mafuda, nokure. Njechikuduma ko mndu elaho nyi Yese o mṟinyi fo Bethlehemu. Cha kipfa ngamekuwonyiapfo mangi kiidi kya wanake wake.”

² Samweli kahamba, “Nyiwuda njechiidima ihenda? Sauli kamanya mbonyitso, nechinjiwaaha!” Mndumii-Ruwa kambia, “Duo ihache, komeshikapfo nohambe, ‘Ngacha iwikia Mndumii-Ruwa kidaso.’

³ Dumia Yese nao nawecha na ipfo mwindienyi na inyi njechikuloṟa kindo ochiwuta. Nochishia mnducho njechimsenda mafuda nawe mangi.”

⁴ Samweli kawuta ado chandu alewio nyi Mndumii-Ruwa, kahenda Bethlehemu. Wameku wa Mṟinyi wakacha imwambia wechidedema, wakammbesa, “Ngesa, nocha kya ofoṟo?”

⁵ Samweli kawawia, “Kyanjiende nyi ofoṟo. Ngacha iwikia Mndumii-Ruwa kidaso. Kyekuheṟemtsenyi nyo muwenyi luhende iwika kidaso.” Samweli kaheṟemtsa Yese handu hamu na wana wake, kawaambia na kulya mwindienyi.

⁶ Wekishika, na kiheri Samweli alewona Eliabu mana o Yese, nalehia mrimenyi foke, “Kya lohi, ichu nyio moshio mafuda o Mndumii-Ruwa ichu ahoṟoki iya oshangunyi lo Mndumii-Ruwa!”

⁷ Kyaindi Mndumii-Ruwa nalemmbia, “Manya kulaambuye fana yake na wuleshe woke. Inyi ngamleha cha kipfa njekeambuya shindo cha isho wandu wekeambuyapfo. Wandu wekeambuya wucha wo kya nja, kyaindi inyi njekeambuya mrima.”

⁸ Kyasia Yese kalaha mana oke Abinadabu kamwende na oshangunyi lo Samweli. Kyaindi Samweli kahamba, “Ichu chio amsambuṟe nyi Mndumii-Ruwapfo.”

⁹ Yese kaendese Shama. Samweli kahamba, “Manya ichu amsambuṟe nyi Mndumii-Ruwapfo.”

¹⁰ Yese kaende wana wake wose mfungade oshangunyi lo Samweli, kyaindi Samweli kambia, “Mndumii-Ruwa amesambuṟa manya umu kiidi kya iwapfo.”

¹¹ Numa kawia Yese, “Wana wapfo wa kisoṟo wose wakeri iya.” Yese kamhaluo kahamba, “Kutsuheṟe umu lyamkeku, nahendie ilisa machondi.” Samweli kambia, “Duma mndu nahende imwende, so lochidamia wandapfo mṟasa nache na iyo.”

¹² Nahong'u, Yese kaduma mndu nao kaendo. Manakecho nawewode oru, awode meso maharami, mecha heambuya. Mndumii-Ruwa kawia Samweli, “Wulalu, ichu nyio; hoṟoka nomshie mafuda.”

¹³ Samweli kaira ombe loke luwode mafuda; kaletsia Dawidi mafuda oshangunyi lo wana wa mae. Oweṟe mumuyo fo Mndumii-Ruwa fukasokia Dawidi na pfinya ing'anyi, fukamkaya wokia mkonufo na mkonu ingi. Kiidima Samweli kawuya na mṟinyi fo Rama.

Dawidi akeri oshangunyi lo Sauli

¹⁴ Lyefurumia mumuyo fo Mndumii-Ruwa fukawuka ko Sauli, na mṟufu mmbicho fuwuka ko Mndumii-Ruwa fukamlisa wukiwa.

¹⁵ Naho waṟundi wa Sauli wakambia “So luichi mṟufu fo ngafu fuwukie ko Ruwa nyifo fuikutuura.

¹⁶ Wulalung'u le mndumii odu, wawasa waṟundi wapfo wekekuṟundia wakushihie mndu mwaria aichi ikapa uda, shihia sheimba, kiheri mṟufufo fo ngafu fuwukie ko Ruwa fomekucheya mnducho kakapa udawo na iyo nocheleheṟuka.”

¹⁷ Sauli kawia waṟundi wake, “Njishihienyi mnducho ekeidima iimba necha na uda, munjiendie.”

¹⁸ Manake umu kiidi kya waṟundi kahamba, “Njilewona manake umu o Yese, o mṟinyi fo Bethlehemu. Manakecho nai mwaria moimba na uda. Manakecho namkari na ngohoda o shidenyi, nawode osaaṟe kiidi kya ideda na oloho. Nawode mbihu mcha; Mndumii-Ruwa nakeri nao.”

¹⁹ Ko ikyo Sauli naleduma ndumi ko Yese, kahamba, “Kenjidikia manacho opfo Dawidi, icho ekelisa machondi.”

²⁰ Yese kaduma Dawidi ko Sauli arie nzoi ikudikie mkate, kitumo kya mpfinyo na mburu.

²¹ Dawidi kekishika kaida na mba iṟundia Sauli. Sauli nalemkunda mnu nakamu, itane ammbika momiikanyia ikudika shisha shake.

²² Numa Sauli kaduma ndumi ko Yese kehamba, “Ngakunda Dawidi; keleka nakukaiye iya nanjihidie.”

²³ Orio mandi mṟufu fo mmbicho fuwukie ko Ruwa fomechea Sauli, Dawidi naleira uda woke kawooka ikapa, na mṟufufo fo ngafu fukalekia Sauli, na kaleheṟuka na iwuuyose nyi moo.