1SAMWELI 15 - Bibilia Kui Mdedie fo Kimochi

Shida yekapana na Waamaleki

¹ Samweli kawia Sauli, “Mndumii-Ruwa nalenjiduma njikushie mafuda nowe mangi ya wandu wake Waisraeli. Wulalu adanyia madedo ha Mndumii-Ruwa.

² Mndumii-Ruwa menyi matorito nahamba adi: ‘Njechikapa Waamaleki cha kipfa walekapa Waisraeli mandi waweiwuka Misri.

³ Wulalu, henda wasaṟikie na ikombetsa shindo shawo shose. Kulawade wakae na moo, wawaahe wose: womi na waka, wana watutu na waionga; mmbe, machondi, ngamia na nzoi.’”

⁴ Sauli na ichekeṟo itorito lyake lya shida, kalitiichia ipfo Telaimu. Kuwepfo waskari wehenda na madende shiku mahana hawi wawuka ko Waisraeli na shiku ikumi wawuka ko Wayuda.

⁵ O na wandu wake wakahenda mṟinyi fo Amaleki, wakawoka iṟinjawia, mapichinyi.

⁶ Sauli kawia Wakeni, “Hendenyi! Kurenyi! Wukenyi kiidi kya Waamaleki, shila wudo, njechimurumatsa handu hamu nawo. Kurenyipfo cha kipfa nyo mulewutia Waisraeli mecha kiheri walewuka Misri.” Nahong'u, Wakeni wakawuka kiidi kya Waamaleki.

⁷ Sauli nalewinga Waamaleki kuwokia Havila tane Shuri, ora lo ngamenyi lo Misri.

⁸ Nalewada mangi Agagi o Waamaleki ai na moo. Kawaha wandu kui oshu.

⁹ Kyaindi Sauli na wandu wake walawaahe Agagi, manya machondi hake mecha mnu, manya mmbe njicha, mahache, mahuṟuwi na isho shose shii shicha shilerumatsopfo. Kyaindi shindo shose shiwicho na shilawode wulole na wuhuru, shilerumatso.

¹⁰ Mndumii-Ruwa kawia Samweli;

¹¹ Ngawado nyi fowa ili njilewika Sauli nawe mangi o naleda injiosha inyi na ameawutsia mawawaso hakopfo. Samweli kawado nyi nyashi, kaeṟeṟia Mndumii-Ruwa kio taṟaṟaa.

¹² Samweli kaicho ke Sauli nacheiye awuka Karmeli na nahoṟotsiengo yangumbuo yake; na ke nahendie Gilgali Ko ikyo, ili lya ngama ngamenyi otuko, Samweli nalekure ngamenyi otuko kahenda ikoyana na Sauli.

¹³ Samweli kekishia Sauli, Sauli kawia Samweli, “Mndumii-Ruwa nakuwikie ona! Njileawutsia iwawaso lya Mndumii-Ruwa.”

¹⁴ Samweli kambia, “Nkii ili njiichuo ṟu lya machondi na mmbe sheana.”

¹⁵ Sauli kamhaluo, “Wandu waleda machondi na mmbe shii na moo, shuma shilya shishicha kundu shiwe shedasia Mndumii-Ruwa, Ruwa opfo, kyaindi shilya shingi luleshikombetsa.”

¹⁶ Samweli kakaṟuo Sauli, “Tsia sau! Njikuwia kindo Mndumii-Ruwa anjiwia inu kio.” Sauli kahamba, “Kyekunjiwie.”

¹⁷ Samweli kambia, “Manya chandu ukuwonyi ke iyo chi mndu uwode kiṟumipfo, ngesa iyo ui msongoru o shishari sha Waisraeli Mndumii-Ruwa nalekushimbuo na mafuda nowe mangi ya Waisraeli.

¹⁸ Lyilya mandi Mndumii-Ruwa alekuduma kechikuwia, ‘Henda kombetsa kombi Waamalekiwo wai wanyamaṟi, kapana nawo tane owawaaha wose!’

¹⁹ Nki ilyi kulaleindia ṟu lyo lya Mndumii-Ruwa. Nki ilyi mulewingia shilya shii shiwade sha shidenyi mkawuta wuwichowu oshangunyi lo Mndumii-Ruwa.”

²⁰ Sauli kahaluo kahamba, “Njileindia ṟu lya Mndumii-Ruwa. Njilehenda kulya kundu Mndumii-Ruwa alenjiduma; njileda Agagi mangi ya Waamaleki, ngawerumatsa nakamu Waamaleki.

²¹ Kyaindi wandu waleduo shindo shilya shiwade shidenyi: machondi, mmbe na shingi shose shishicha shiweshiwade shirumatso indi wakashiende shedasia Mndumii-Ruwa, Ruwa opfo, ipfo Gilagali.”

²² Samweli kambia, “Ngesa! Mndumii-Ruwa nakundi ngoseṟa shidaso shekoṟa modonyi na mwano, kota iindia ṟu lyake Ambuya imwindia o nyi kicha kota mwano na imwadanyia o kota imwana na mafuda ha kioṟo.

²³ Ilekana nao nyi kimu cha wunyamaṟi wo ihenda ndashenyi, na utimbiri nyi kimu cha wuwicho na iindia shindo shipache na mawoko. Kyipfa kya ili aleha iwawaso lya Mndumii-Ruwa, nao nakuleha kulawe mangi.”

²⁴ Sauli kawia Samweli, “Ngamewuta wunyamaṟi. Ngameleha wuikimbi wo Mndumii-Ruwa na iwawaso lyapfo, kipfa kya ili njileowuo wandu, ngawaindia wo.

²⁵ Kyaindi wulalu ngakuterewa, kenjihoṟia wunyamaṟi woko. Njiinenga momu njikuoshe kundu njiidime ihenda iindia Mndumii-Ruwa!”

²⁶ Samweli kambia, “Njechiidima iwuya na iyo mantapfo. Iyo noleleha iwawaso lya Mndumii-Ruwa nao amekuleha kulawe mangi o Waisraeli.”

²⁷ Kiheri Samweli aleembeṟuka kundu nakuhendie, Sauli kawada otiṟimo lo ikonya lya Samweli, nalyo lyikaranduka.

²⁸ Nlyondi Samweli alewia, “Wokia inu Mndumii-Ruwa ameranduo wumangi wo Waisraeli kuwuka kopfo kawuinengia mndu ungi o ipfo kiidi kya wamṟasa opfo ai mcha kota iyo.

²⁹ Ruwachu ai mng'ano fo Waisraeli ekelembapfo, manya ekeilacha makusaṟo hakepfo. O chi mndu o wandu ailacha makusaṟo hakepfo.”

³⁰ Sauli kahaluo kambia, “Njilewuta wunyamaṟi. Handu hamu na ikyo, kenjidediaho kicha oshangunyi lo wameku wa wandu wako na Waisraeli. Kenjiinengawo momu njiwuye handu hamu na iyo njihende iindia Mndumii-Ruwa, Ruwa opfo.”

³¹ Nahong'u Samwali kawuya kahenda nao mṟasa Gilgali na Sauli kaindia Mndumii-Ruwa.

³² Samwali kahamba, “Njiendienyi na iya Agagi mangi ya Waamaleki.” Agagi kahendia Samweli awodo nyi sia na idedema kechikusaṟa, “Mawawio ha opfu hamesia.”

³³ Samweli kahamba, “Kipfa kyapfo luletewa waka wafoi walawade wana, nyi wudo na mayo echikaa alawode mana kiidi kya waka.” Kamanyamanya Agagi shiteno shiteno oshangunyi lo Mndumii-Ruwa ipfo Gilgali.

³⁴ Nahong'u Samweli kahenda Rama; na mangi Sauli kawuya na kanyi koke ipfo Gibea.

³⁵ Wokia mkonufo tane ipfa lyake Samweli alewonanase na mangi Saulipfo. Handu hamu na isho Samweli nalelilia Sauli makulili. Nao Mndumii-Ruwa nalewado nyi fowa kipfa kya ili awemeshimbuo Sauli kawa mangi ya Waisraeli.