1SAMWELI 13 - Bibilia Kui Mdedie fo Kimochi

Shida yekapana na Wafilisti

¹ Sauli awode maka injisendepfo kiherikyo alewooka iwa mangi. Kachilia Waisraeli ko maaka cha maka injisendepfo.

² Sauli nalesambuṟa Waisraeli shiku shiṟaṟu, kiidi kyawo shiku shiwi kahenda nawo ipfo Mikmash na orukenyi lo mafumvu ha Betheli wengi kiku kimu nalewawika kulya Gibea ora lo ko Benyameni. Iwo nalewawika wasongoyo nyimana oke Yonathani. Wandu wengi wose nalewawihiṟa, orio umu nahende kanyi koke.

³ Yonathani kawingakiṟaṟo kya shida msongoru o shidenyi o Wafilisti ipfo Geba, na Wafilisti wose waleicho mbonyitso. Ko ikyo Sauli nalekapa iranda kulya orukenyi kose kechihamba, “Waebri waadanye.”

⁴ Kiheri Waisraeli wose waleicho ke Sauli nalewinga omombo lo shida lo Wafilisti, na ke Wafilisti wasuo Waisraeli mnu nakamu, walelaho wahende ikulunga na Sauli kulya Gilgali.

⁵ Wafilisti wawewode magari ha shida shiku makumi haṟaṟu, wasikari wedoya frasi shiku makumi haṟaṟu, wasikari wedoya frasi shiku shiṟandaṟu naichekeṟo lya waskari wa madende wafoi cha msanga fo mawambao ha ipalyipalyi; wose waledo nahuye wakawika ikambi lyawo kulya Mikmashi, ora lo ngamenyi lo Beth-aveni.

⁶ Waisraeli wekiwona wai wukiwenyi (kyamba walesaṟikio iki kiwichowicho), walewooka iowa. Wengi waleowa njopangenyi, wengi maṟungunyi, wengi kiidi kya maṟaṟo ha maho, wengi shipfunyi na wengi maṟungunyi ha mṟinga.

⁷ Wengi waleambada meda fo Yordani tane orukenyi lo Gadi na orukenyi lo Gileadi. Kyaindi Sauli na kulya Gilgali awei handu hamu na wandu wose walemwituma numa wechidedema.

⁸ Sauli nalewedia Samweli ko mkonu mfungade, chandu Samweli awehambie. Kyaindi Samweli alecha na Gilgalipfo na wandu wakawooka ilekana na Sauli.

⁹ Kyasia, Sauli kawia wandu, “Njiendienyi shidaso shanu shekoṟa modonyi na sha ofoṟo.” Nao kawika kidaso kekoṟa.

¹⁰ Oweṟe nalyo kechimarisia iwika kidaso kilya kekoṟa, Samweli kaafukia. Sauli kaida na nja ihenda ambia Samweli na imṟikiṟa.

¹¹ Samweli kammbesa, “Nkiki owuta.” Sauli kamhaluo, “Kiheri ngawona ke wandu wainjida, na iyo ochapfo, ko mkonu iya kulehamba, na kingise njilewona Wafilisti wamekuala kya shida ipfo Mikmash,

¹² ngakusaṟa ke Wafilisti wechicha injipufukia ipfo Gilgali. Kingise njiwemeterewe osaṟio ko Mndumii-Ruwapfo. Nlyondi kilenjikoya njiwute kidaso kekoṟa inyi njimonyi.”

¹³ Samweli kahaluo Sauli kambia, “Nowuta owicho. Oindia chandu Mndumii-Ruwa opfo alekuwawasapfo. Kokoya kuleindia, Mndumii-Ruwa nawewuiṟicha mlungana wuchili wopfo ko Waisraeli.

¹⁴ Kyaindi wulalu wuchili wopfo wochilunganapfo kipfa kulaleindia iwawaso lya Mndumii-Ruwa chandu alekututuma. Mndumii-Ruwa amekushihia mndu ungi msa echimwindia na mrima fose, icho nyio amemsambuṟa nawe mochilia wandu wose.”

¹⁵ Samweli kawuka Gilgali kahenda kulya Gibea orukenyi lo Benyameni. Kiheri Sauli aleitala wandu wawei handu hamu nao, kakoya waiho wandu mahana haṟandaṟu tupu.

¹⁶ Sauli na mana oke Yonathani handu hamu na wandu wawei nawo, walekaa ipfo Gibea orukenyi lo Benyameni na Wafilisti wakawika kiṟaṟo kulya Mikmashi.

¹⁷ Wafilisti wakakure kiṟaṟonyi lyawo wahende isaṟikia wai kiidi kyamachekeṟo haṟaṟu. Itorito limu lyikahenda woambuya Ofra orukenyi lo shuali.

¹⁸ Ichekeṟo lyingi lyikahenda woambuya Beth-horo naichekeṟo lyingi lyikaembeṟukia njia iambuye pichinyi lya Seboimu wohenda nuka.

¹⁹ Kiherikyo kuwewode mnganya oose kulya orukenyi lo Waisraelipfo kyamba Wafilisti wawekuṟeheṟie wakaima Waebri walatsane njoshu ang'u mapfumu.

²⁰ Orio Mwisraeli kilemkoya nahendie Wafilisti inuo ikumbi lyake ledema na mmbe ang'u mlo ang'u soka ang'u mndo fosambuo.

²¹ Waisraeli wawekelekia 2 ya 3 tsa shekeli inuo ikumbi ledema na mmbe na mlo. Na weuhuru wonuo soka ang'u wohuṟa menya nleshe yetikicha mmbe nyi we 1 ya 3 ya shekeli.

²² Ko ikyo mkonu fo shida kuwewode mndu kiidi kyawo wose wawei na Sauli na mana oke Yonathani awewode oshu ang'u pfumupfo shile na Sauli na mana oke Yonathani.

²³ Wafilisti waledika ichekeṟo lya waskari wakahenda iringa njia ya Mikmashi.