1SAMWELI 12 - Bibilia Kui Mdedie fo Kimochi

Samweli aiongoya Waisraeli mbonyi

¹ Samweli kawia Waisraeli wose, “Shose mulenjiwia, njilemwadanyia. Ngawika mangi momuchilia.

² Wulalu muwode mangi momusongoya. Ko ora loko inyi nyi mmeku o mhasa, na wana wako wa kisoṟo wakeri handu hamu nanyo. Njilewa msongoru onu wokia njikeri manake mṟasa inu.

³ Aichu njikeri iya na kokoya njilemewuta kindo kiwicho kyose; kyeṟingishienyi nyo muwenyi iya oshangunyi lo Mndumii-Ruwa na oshangunyi lo mangi yanu njisambuṟe. Ngesa, njilemesoka mndu oose mmbe yake ang'u nzoi yake Ngesa, njilemewonyia mndu oose. Ngesa, njilemeapfinyia mndu oose Ngesa, njilemeambia kitsutsumo ko mndu oose kundu njipfuluo mondu kiilohi kyake. Inyi njechimbihiṟia ikyo kyose.”

⁴ Wandu wakamhaluo, “Kulemelulembe ma indiipfo, kulemeluapfinyiepfo manya kulemeduo kindo kya mndu oosepfo.”

⁵ Samweli kawahaluo, “Mndumii-Ruwa nyi mṟingishi onu, na mangi oke msambuṟe inu nyi mṟingishi ke monjiwona njilawode mti.” Nawo wakahaluo wehamba, “O nyi mṟingishi.”

⁶ Samweli kawawia, “Mndumii-Ruwa nyio alesambuṟa Mose na Aroni na iwuta wasahuyanu orukenyi lo Misri.

⁷ Wulalu hoṟokenyi oo handu mui kundu inyi nanyo luanduyo oshangunyi lo Mndumii-Ruwa, na inyi njechiongoya kya mawuto hake ha kiṟiha sa alehawuta kundu namukiṟe nyo na wasahuyanu.”

⁸ Kiheri Yakobo na wa mba yake walehenda Misri, na Wamisri wakawapfinyia, wasahuyanu waleeṟeṟia Mndumii-Ruwa; nao kawadikia Mose na Aron sa walewuta wasahuyanu kulya orukenyi lo Misri na imuende na kunu orukenyi.

⁹ Kyaindi wo walehadima Mndumii-Ruwa, Ruwa owo, na o kawawika mawokonyi ha Sisera, msongoru oichekeṟo lya Hazori, na mawokonyi Wafilisti, na mawokonyi ha mangi ya Moabu. Mkamboyo yose walekapana na wandeyanu wakawawinga.

¹⁰ Wandeanu walelilia Mndumii-Ruwa wechihamba, “Lulewuta wunyamaṟi cha kipfa lulekuda iyo Mndumii-Ruwa lukaṟundia Mabaali na Maashtaroth kyeluashuo kuwuka mawokonyi ha wakituwa wandu, naso lochikuṟundia.”

¹¹ Naho Mndumii-Ruwa kaduma Yerubaali, na numa kaduma Bedani (Baraka) numa kaduma Yefta, na lyefurumia kanjiduma inyi Samweli. Orio umu odu nalewaashuo kuwuka ko wakituwa wanu wawemṟingichie, nanyo mkakaa na kipuo.

¹² Kyaindi mokiwona mangi Nahashi o Waamoni ache imupufukia, mukaleha Mndumii-Ruwa ai nyio mangi yanu, mukanjiwia, “O manyale! Mangi nyio echiluchilia.

¹³ Wulalu mangi mulemsambuṟa nyio ichu iya. Muleterewa Mndumii-Ruwa namuinenga mangi, nao kamuinenga.

¹⁴ Kokoya moindia Mndumii-Ruwa, na imṟundia, na iadanyia ṟu lyake manya mulafunje iwawaso lyake, kokoya nyo muwenyi handu hamu na mangi yanu mkaosha Mndumii-Ruwa, Ruwa onu, mochiwona mecha.

¹⁵ Kyaindi ko koya mulaadanyia ṟu lya Mndumii-Ruwa, mukafunja iwawaso lyake, kyasia nao nechiiṟiwana nanyo na mangi yanu.

¹⁶ Kyasiang'u tsienyi sau mochiambuya kindoki king'anyi sa Mndumii-Ruwa aiwutsa oshangunyi lonu.

¹⁷ Ngesa! Kiherikyo chi kesambuo Ngano? Kyaindi inyi njechiterewa Mndumii-Ruwa naende ikuṟuṟuma na mvuo nanyo mochimanya na iwona ke wuwicho wonu mulewuta oshangunyi lo Mndumii-Ruwa wokukundia mangi nyi wung'anyi.”

¹⁸ Kyasia, Samweli katerewa Mndumii-Ruwa, nao mkonu nafo kadika ikuṟuṟuma na mvuo. Wandu wose wakaowuo mnu Mndumii-Ruwa na Samweli.

¹⁹ Nahong'u wakawia Samweli, “Hoi lokuterewa noluterewie so waṟundi wapfo ko Mndumii-Ruwa, Ruwa opfo kundu lulapfe; cha kipfa lomekuengeṟia njonyamaṟo tsadu kui wuwichowo wokukundia mangi so luwenyi.”

²⁰ Samweli kawawia, “Manya mulaowuo; manya chandu mulewuta wuwichowu, mulade ioshana na Mndumii-Ruwa, kundu mumṟundie na ngoo yanu yose.

²¹ Mulaoshe maruwa ha wongo halawode kiira manya haleidima imukiṟa, kyamba nyi ha wongo.

²² Kui kiṟumi kya rina lyake inene, Mndumii-Ruwa echikumba wandu wakepfo kyamba nalekunda imutana nyo muwe wandu wake.

²³ Kya ora loko inyi njechikaa njide njilamuterewia ko Mndumii-Ruwapfo; iwuta kudo nyi idekio Mndumii-Ruwa. Njechiengeṟa imulosha ohendo lucha na lo kiilohi.

²⁴ Kyasiang'u nanyo indienyi Mndumii-Ruwa na imṟundia kui wuhendeli na mrima fonu fose. Kyekumbuonyi shindo shilya shinene alemuwutia.

²⁵ Kyaindi mukaengeṟa iwuta mawicho, mochirumara nyo muwenyi handu hamu na mangi yanu.”