1SAMWELI 11 - Bibilia Kui Mdedie fo Kimochi

Sauli awinga Waamoni

¹ Mangi Nahashi o Waamoni kahenda itengetia mṟi fo Yabesh-gileadi. Wandu wa mṟinyi fo Yabesh-gilead wakawia Nahashi, “Wika kisanza naso, naso lukuṟundie.”

² Kyaindi Nahashi kawawia, “Njechiidikiana nanyo ko kindo kimu ke njechikuṟuo orio umu onu riso lyake lya kulyo, na kudo njechisutsa Waisraeli wose.”

³ Wameku wa Yabeshi wakambia, “Luinenge maanya fo mkonu mfungade kundu ludume ndumi orukenyi lo Waisraeli kose. Kokoya kulawode mndu moluashuo, lochicha na kopfo so luwenyi.”

⁴ Wadume walya kiheri waleshika mṟinyi fo Gibea, kundu Sauli awekekaa, wakaonguo mbonyitso na wandu wose wakawooka ifihiṟa na ipoṟohoṟa.

⁵ Sauli nawekeri icha awuka demenyi ario nyi mapung'a hake, kawesa, “Wandu wa nyi waki Nki ili waifihiṟa.” Wakamwongoya mbonyi wadume walya waende kuwuka Yabeshi.

⁶ Oweṟe, Sauli kekiicho madedoho, mumuyo fo Mndumii-Ruwa fukamchea na pfinya, nyashi yake ing'anyi ikado.

⁷ Kaira mapung'a hawi kahadumbuo dumbuo shipeṟengu kadika wadume watengetse shipeṟengu mṟasenyi yose ya Waisraeli, wechihamba, “Mndu cho oose sa alechioshana na Sauli na Samweli shidenyi nyi wudi mapung'a hake hechiwutio.” Waisraeli wakawado nyi wuowu woowuo Mndumii-Ruwa. Ko ikyo wose wakakure wakawa kindo kimu.

⁸ Sauli kechiachikia wandu wa Waisraeli kulya Bezeki kawada Waisraeli shiku mahana haṟaṟu na wa Yuda shiku makumi haṟaṟu.

⁹ Wakawia wadume walya walewuka Yabeshi, “Wienyi wandu wa Yabeshi-gileadi: ngama kiheri mnengeṟi fui mbawo mochikoya momeletso.” Wandu wa Yabesh-gilead wekiicho mbonyitso wakachihio mnu nakamu.

¹⁰ Ko ikyo wakatengelukia Nahashi wechimmbia, “Ngama lukeri icha ikukumba nndenyi tsapfo, noluwutie ikyo kyose owona nkii kicha.”

¹¹ Ilyi lya ngama, Sauli kahawa wandu kumachekeṟo haṟaṟu. Kiheri kya kamba lya ngamenyi wakaida nakiṟaṟonyi lya wakituwa, wakakapa Waamoni. Koikishikia mfiri wakituwa wafoi wamearisio kuleshe, walyawaleashuka wakarahanyikia ipfo na ipfo; kulakae ho ma wandu wawi wawono waihandu hamu.

¹² Naho Waisraeli wakawia Samweli, “Wandu walya walehamba Sauli nalawe mangi moluchilia nku wai? Luendie wanduwo, luwawahe.”

¹³ Kyaindi Sauli kawawia, “Kuwode mndu oose echiwooho inupfo, kyamba mkonufu fo inu, Mndumii-Ruwa ameashuo Waisraeli.”

¹⁴ Samweli kawawia, “Nndenyi loose Gilgali, Luonguose lya kawi ke Sauli nyi mangi.”

¹⁵ Wandu wose wakahenda Gilgali, na kiheri waleshikapfo, wakashia Sauli mafuda nawe mangi oshangunyi lo Mndumii-Ruwa. Wakainenga Mndumii-Ruwa shidaso sha ofoṟo. Na Sauli handu hamu na Waisraeli wose wakachihio mnu na kamu.