1SAMWELI 10 - Bibilia Kui Mdedie fo Kimochi

Samweli ashimbuo Sauli na mafuda

¹ Naho Samweli kaira chupa sa ntutu ya mafuda kaletsia mdonyi ko Sauli, kamhekia momu kambia “Mndumii-Ruwa amekuletsia mafuda nowe mchili o wandu wake.

² Inu ili luisamana, nochikoyana na wandu wawi kufui na kipfu kya Raheli ipfo Selsa orukenyi lo Benyamen. Wo wechikuwia ke nzoi tsilya uwekeri itsipfula tsamewono. Ndeo aikusaṟa kyatsopfo, shile nawodo nyi makusaṟo kyapfo, kechikuwesa o amonyi orio kiheri, ‘Nkiki njechikitana kya mana ulya oko.’”

³ Kowuka o nochihenda mwaloni (pichinyi) lya Tabori, handu ochikoyana na wasoṟo waṟaṟu warie njia yehenda iwikia Ruwa kidaso ipfo Betheli. Umu owo kechikapisa mburu tsiṟaṟu na o kawi arie mkate iṟaṟu na o kaṟaṟu akudikie kitumo kya mpfinyo.

⁴ Wechikuiṟikiṟa wakuinenge mkate iwi, na iyo nochiiambia mawokonyi hawo.

⁵ Numa, ili ochishika ipfo Gibeath-elohimu (Fumvu lya Ruwa) handu kuiho kiṟaṟo kya waskari wa Wafilisti, o kiheri ochishika kufui na mṟi, nochikoyana na waikimbi wafoi. Waikimbiwo wechiwuka handu ha huye wechikapa shinubi, mataṟi, mtoṟiṟo na zeze, wechihamba shisuku.

⁶ Mumuyo fo Mndumii-Ruwa fochikusokia na pfinya, na iyo nochiwooka ihamba shisuku handu hamu nawo nohaluke nowe mndu ungi.

⁷ Ili mandi isho shechikuchea, orio kindo ochiidima ikiwuta kiwute, kyamba Ruwa nakeri na iyo.

⁸ Nochinjisongoya ihenda mṟinyi fo Gilgali, handu njechikukoya na iwika kidaso kemaya modonyi na mwano fo ofoṟo. Nochinjiwediaho ko mkonu mfungade mṟasa njiche njikuloṟe kindo kyewuta.

⁹ Sauli kaembeṟuka nalekane na Samweli Ruwa kailacha mrima fo Sauli. Shilya shose alewio nyi Samweli shikahoya mkonufo.

¹⁰ Sauli na mṟundi oke wekishika Gibea (Fumvuhu) kaambio nyi mamiingi fo waikimbi. Mumuyo fo Ruwa fukamchea kui pfinya, Sauli kawooka ihamba kisuku handu hamu nawo.

¹¹ Wandu waweichi Sauli ipfo mawookionyi, wekimmbona kechihamba kisuku, wakawesana, “Nki ki kyawada mana o Kishi Ngesa, nao Sauli na umu o waikimbi.”

¹² Mndu mliwe, ekekaaho kahamba, “Ngesa, ndeawo nyiu.” Ko ikyo kukawooka mdedie fohamba, “Ngesa, na Sauli nyi umu o waikimbi.”

¹³ Sauli kekimarisa ihamba kisuku, nalehenda huye handu ha mwindie.

¹⁴ Ndeye mtutu o Sauli kekiwona Sauli na mṟundi oke, kawawesa, “Nku muwei?” Sauli kamhaluo, “Lulehenda iwalia nzoi, na lometsiwuṟa lukahenda iambuya Samweli.”

¹⁵ Ndeye mtutu ulya o Sauli kambia, “Hoi, kekunjiwiie kilya akuwia.”

¹⁶ Sauli kambia, “Naleluwia na pata ke nzoi tsilemewono.” Kyaindi Sauli alemwongoya ke Samweli nammbia ke nechiwa mangipfo.

Sauli ahambo ke nyi Mangi

¹⁷ Samweli kalaha wandu wose wakusanze oshangunyi lo Mndumii-Ruwa ipfo Mispa.

¹⁸ Wekishika kawawia, “Mndumii-Ruwa, Ruwa o Waisraeli nahamba adi: ‘Njilewuta Waisraeli orukenyi lo Misri, ngamuashuo nyo kuwuka ko Wamisri, na wamangi wengi walemuikolonyia owicho.’

¹⁹ Inu kudi monjileha inyi Ruwa onu msa njilemuashuo kuwuka ngapo na fowa tsanu; nanyo mohamba, ‘O manyale!’ Luinengenyi mangi moluchilia. Mui shisharinyi shanu na kui shiku shanu.”

²⁰ Numa Samweli kaachikia shishari shose sha Waisraeli, kishari kya Benyamenyi kikaduo kuṟu kuhya.

²¹ Kaende kishari kya Benyameni na kusonguo chandu mba tsawo tsikeri, na mba ya Matri ikaduo kuṟukuhya. Lyefurumia kaende wa mba ya Matri na kusonguo, na Sauli mana o Kishi kasambuṟo kui kuṟukuhya. Kyaindi kiheri walemshiha nalawono.

²² Wakawesase Ruwa, “Ngesa, kuwode mndu ungi ngoseṟa aicha Ruwa kawawia, ‘Naowie amonyi kiidi kya nzohoṟa.’”

²³ Kyasia, wakakapa mteeṟa wakashiha Sauli na imweende. Sauli kyekihoṟoka kiidi kya wandu naweimleshe kota wandu wose, kuwookia masombenyi.

²⁴ Samweli kawia wandu wose, “Ichu nyio mndu alesambuṟo nyi Mndumii-Ruwa kiidi kya wandu wose; kuipfo oose ai chaopfo.” Wandu wose wakafunja kisangalale, “Nakaepfo mangi.”

²⁵ Kiidima, Samweli kaongoya wandu maṟunda na shilya shiwaṟi mangi, kashiṟehia kitapunyi sa alekiwika oshangunyi lo Mndumii-Ruwa. Numa Samweli kasama wandu wose, orio mndu nahende kanyi koke.

²⁶ Nao Sauli handu hamu ngohoda tsake tsa shidenyi sa Ruwa awemepaya mrima yawo, kahenda kanyi koke kulya mṟinyi fo Gibea.

²⁷ Kyaindi wandu wengi walaichi kindo wakahamba, “Ngesa mnduchu neidima iluashuo.” Walemina Sauli ma walemnenga kiinengo kyosepfo. Kyaindi o Sauli alesuopfo.