1SAMWELI 1 - Bibilia Kui Mdedie fo Kimochi

Elikana na wa mba yake ipfo Shilo

¹ Kuweipfo mndu umu mṟinyi fo Rama orukenyi lo mafumvuhu ha Efraimu elaho nyi Elikana. Nawei mana o Yerohamu, mana o Elihu, mana o Tohu mana o Sufu, o kisharinyi kya Efraimu.

² Elikana nawewode waka wawi, umu nyiwe Hana o kawi nyi Penina. Penina nawewode wana, kyaindi Hana awewode wanapfo.

³ Orio maka Elikana nawekewuka Rama kahenda iindia na idasia Mndumii-Ruwa menyi matorito kulya Shilo. Mpfo kundu wana walya wa kisoṟo wa Eli, Hofni na Finehasi wawei wakohanyi wa Mndumii-Ruwa.

⁴ Orio mandi Elikana amewika kidaso nawekeinenga mka oke Penina ohawi lumu lo nyama ya kidaso kyo na ohawi lumu lumu ko orio mana; wana wa kisoṟo na wa kika wa Penina.

⁵ Kyaindi Elikana ma chandu awekundi mnu Hana nawekyemnenga ohawi lumu tupu; kipfa kya ili Mndumii-Ruwa alalemnengo wana.

⁶ Kyaindi Penina, kawa motaluo Hana, orio kiheri kawa modosa Hana nyashi mnu nakamu na imwisalucha kipfa kya ili Mndumii-Ruwa alalemsaṟia wana.

⁷ Kikahendeka kido orio maka. Orio kiheri Hana amehenda mba ya Mndumii-Ruwa, Penina kawemdosa nyashi kikashikia handu Hana kawomofihiṟa na ileha ilya kindo kyose.

⁸ Mii oke, o Elikana kawa mommbesa orio kiheri, “Nkiili uwodo nyi fowa mrimenyi fopfo? Ngesa, inyi chi njing'anyi kopfo kota wana wa kisoṟo ikumi.?”

Hana na Eli

⁹ Mkonu fumu, kiheri wamemarisa ilya na inyo mmbenyi ya Mndumii-Ruwa ipfo Shilo. Hana kahoṟoka kiherikyo mkohanyi Eli na wedamie kidinyi mbai ya mongo fa mba ya Mndumii-Ruwa kafihiṟa na isungulula.

¹⁰ Hana nawewodo nyi fowa ing'anyi mnu nakamu. Na kiheri awe iterewa Mndumii-Ruwa kafihiṟa na isungulula.

¹¹ Kalya nyamu kechihamba, “Hoi Mndumii-Ruwa o matorito, ko koya aambuya matuuro hako inyi mṟundi apfo, konjisumba inyi mṟundi opfo, mana o kisoṟo, njechi kuinenga iyo Mndumii-Ruwa manacho nawe opfo kiidi kya moo foke fose; wembe wochioda njui tsa mdonyi foke ma indipfo.”

¹² Hana kaengeṟa iterewa Mndumii-Ruwa ko kiheri kileshe, na mkohanyi Eli kakaa kyechiambuya momu iya yake.

¹³ Hana nawekeri iterewia, mrimenyi kyaindi momu yake iwekupayapaya, na ṟu lyake lilaichio. Ko ikyo kahamba kulako Hana namnanzi.

¹⁴ Ko ikyo Eli kambia, “Nochiwa monango kudi mṟasa indi Lekana na inyo mpfinyo.”

¹⁵ Kyaindi Hana kamhaluo, “Chi wudopfo mndumii oko, inyi nyi mndumka njiwode mawukiwa hafoi; inyi ngamenyo mpfinyo manya wari wonanzapfo, shile njiwekeri iwia Mndumii-Ruwa ishi shikeri kunu mrimenyi foko.

¹⁶ Kulanjihaluo cha mndumka makinango alaichi kindo. Kiheriki kyose njiwekeri ihamba mawukiwa na matuuro hako.”

¹⁷ Eli kambia, kuhendie na ofoṟo; nao Ruwachu o Waisraeli nakwinenge ikyo uimterewa.

¹⁸ Hana kahamba, ngaterewa na inyi kisinga kyapfo, njiwone osaṟio ipfo oshangunyi lopfo. Hana kakuhendia koke, kalya kelya nalawadose nyi fowa.

Ifeo na ishimbuyo lya Samweli

¹⁹ Ilyi Iya ngama ngamenyi, Elikana na wa mba yake walekure ngamenyi otuko, wamemaa iindia Mndumii-Ruwa, walewuya na kanyi Rama. Elikana kamanya mka oke Hana na Mndumii-Ruwa kamkumbuo.

²⁰ Nahon'gu Hana kakapika kafee mana o womi. Hana kalaha manacho rina nyi Samweli, kipfa nalehamba, njilemterewa ko Mndumii-Ruwa.

²¹ Elikana na wa mba yake wose wakahenda se Shilo na iinenga Mndumii-Ruwa kidaso kya orio maaka na iawutsia kiasa.

²² Kyaindi kambali Hana alahende, kipfa nalewia mii oke kye, Oweṟe mana kameda ionga, njechimduo nawiko oshangunyi lo Mndumii-Ruwa, nadeo pfo kiheri kyose.

²³ Elikana, mii oke, kamhaluo, wuta ikyo owona ke nkicha. Wedia tane mana echidumbutsia ionga. Mndumii-Ruwa nahaluo kiasakyo kyapfo kiwe kya lohi. Kyasia Hana kadeo kanyi, kaengeṟa iembeṟa mana oke tane amdumbutsia ionga,

²⁴ Kiheri alemdumbutsia ionga nalemduo handu hamu na ipung'a Iya maaka Iṟaṟu, ikunyia lya mso na kitumo kya mpfinyo. Hana kaitsa manacho na mba ya Mndumii-Ruwa ipfo Shilo, nao mana nawei mnangu.

²⁵ Wamemarisa ishinja ipung'a Iyilya, waleduo mana ko mkohanyi Eli.

²⁶ Hana kambia, hoi mndumii oko, chandu moo fopfo fuiho, mndumii oko, inyi nyi mndu mka ulya awehoṟoki oshangunyi lopfo kyechiterewa Mndumii-Ruwa.

²⁷ Njilemterewa nannenge manachu; nao nalenjiinenga kilya njilemterewa.

²⁸ Kui kipfa kya ikyo, inyi ngainenga Mndumii-Ruwa manachu; kiheri kyose ai na moo ngainenga Mndumii-Ruwa. Nahong'u, wakaindia Mndumii-Ruwa.