1PETRO 5 - Bibilia Kui Mdedie fo Kimochi

¹ Wulalu wameku walya wakeri ipfo konu wo ngawatutuma njii meku chawo na moriso o mawawyo ha Kristo na mokita o wuitoṟi wulya wurie ihenda itambaṟukyo.

² Ngawatutuma, ke lisiṟenyi poo lilya lya Ruwa lii konu chi cha ili mui-waitike-pfo kya indi kui macha ha Ruwa, mulapfule-ho mbucha indi muliwade na kuimbeṟe.

³ Mulachilie iwa wai wawikye kui wulang'a indi muwe mlodo ya poo.

⁴ Mukamba mudo nyi mochikudaya oṟo ilechinaa yehamba wuitoṟi matika na halya mlisi chu ang'anyi ewonekya.

⁵ Na wudo nyo mui wakoho kyekuhooyenyi wameku. Indi nyo mose mupfungane nguwo muwenyi na wenyi nyi yo mkunyiiṟye yanu. Kipfa Ruwa awikye walya wekyekung'nyisha tunja indi walya wekyekunyiiṟa wo nyi awawonye wutonga.

⁶ Ikyo kimwenenge mukae shi ya owoko lo Ruwa lui na pfinya kundu namwire heri lilya.

⁷ Mumdambikye mawina hanu hose kipfa nyi kimbode o kipfa kyanu.

⁸ Kuotoyenyi, mulae chowe. Mkituwa onu Satana aitengetatengeta cha miiso yerunduma ai mopfula mndu aidima immeṟa.

⁹ O mumleme mochikuhoda ipfo wuidiki-hu ili muichi necha ke mawawyo iha na iha hakeri iinutsyo ipfo dembonyi lya wanawawama wanu lya iya wuyana.

¹⁰ Indi o Ruwa menyi wutonga wose ichu alemlahya wuitoṟi woke wulunganyi kui Kristo nyio echimlumbisha nyo muiwawyo kiheri kyangu echiwa moṟihika na ikahaṟa.

¹¹ Woke nyi wukolonyi wu wokaa mlungana. Amenyi.

Shiiṟikiṟo sha ifurumia

¹² Ngamṟehya paruo ii ngahamba ikeri mfui ngamdikya kui owoko lo Silwano manowama ichu mhendeli njetutuma na iṟingishya ke ipfo kundo muhoṟoki kuwode na wutonga wo Ruwa iwu wo lohi.

¹³ Siṟi ya iya Babilon ii-nsambuṟe nyi Ruwa kimu na yanu yo yamdikya shiiṟikiṟo, na Mariko manoko na wudo.

¹⁴ Keiṟikiṟanenyi muwenyi na wenyi kui omimindo lo makunda. Ofoṟo lukae nanyo mui Kristo-hu mose.