1PETRO 4 - Bibilia Kui Mdedie fo Kimochi

¹ Wulalu ili Kristo amaa iwawyo kimbihu nanyo kimuwaṟi muṟae shisha muhie kimu nao. Kipfa mndu amerohyo nyamenyi awodese kita na wanyamaṟi-pfo.

² Nkyo kimwenenge mulakikapye-se moo kui wuitiki wo lango tsa ki-wandu, kya indi muwe mofukapya kui wuitiki wo kilya Ruwa akundi matika-ha hamtsuhae.

³ Kyamba kiheri kyashika na kamu iki kilemsia mandi muweiwuta shindo shilya wandu walaichi Ruwa wakundi. Muwehendekye kui wulala, na wumeluki, na wunanzi na wukuwu wo mlie na wo mnyoe na wuindi woindya maruwa ha wongo wutahachie wudi.

⁴ Lyo liwaṟihishye wandu wo Walaichi Ruwa wechimruma-ruma ili mulaichumia-se nawo ipfo wumelukinyi wowo.

⁵ Wo wechianduyo nyi Ruwa-chu akuṟeheṟye idumbuo kya walya wai na moo na walya wapfie.

⁶ Kyamba iki kyamenenga na wapfu waleongoyo Ndumi ya Sia nyi kundu wakae wai wahoṟuo nyame-hu chandu kiwaṟi orio mndu, indi wahende iwada moo kui Mumuyo kui njia ya Ruwa.

Mwiṟichi mcha o shisumbo sha Ruwa

⁷ Mainutsyo ha shindo shose hamcha afui. Ko ikyo kaenyi na osaaṟe mochikuotoya kundu muidime iterewa.

⁸ Ngoseṟa ya shingi shose kundanenyi nyo muwenyi na wenyi kui mrima fose. Mukuwade tsee kipfa ikunda li lishikye na mfeṟa fo manyamaṟo.

⁹ Muambyane necha kanyi konu kulaipfo mununuwo.

¹⁰ Muwe mochipfuṟukanyana muwenyi na wenyi orio mndu ose kui kisumbo kya wutonga ameinengo nyi Ruwa, mui waiṟichi wecha weiṟichya-ho wutonga wo Ruwa wui-wuhawie-ho wo mbaṟi ii na ii.

¹¹ Kuwode modeda lyo liwe lya mbiia tsa Ruwa, kuwode mopfuṟukanya lyo liwe lyechiwutika kui pfinya ii injiende nyi Ruwa, kundu Ruwa nakuwutie-ho iṟumisho na ishi shose kui Yesu Kristo. O ai menyi wuitoṟi na wukolonyi wochikaa mlungana! Amenyi.

Matuuro ha Kikristo

¹² Nyo mui wakunde, ma mulaṟihisho nyi wuhyu wulya woaka konu wochimhesha cha ili wombiia wuhenu.

¹³ Kya indi ili muisanzyo Kristo mawawio hake ikyo kimwenenge muhende ichihio kya sia yanu ya ipfo mawonesyonyi ha wuitoṟi woke lyondi mochikapa ngululu.

¹⁴ Nanga nyo kokoya moilo kipfa kya rina lya Kristo, kipfa Mumuyo fo wuitoṟi, nyifo fo Ruwa fuimsokya.

¹⁵ Mndu onu manya nalaliso wukiwa kipfa ai mbahi ang'u mwiwi ang'u mbafu ang'u mṟiingi.

¹⁶ Indi kokoya ailiso wukiwa kipfa ai mkristo nalaṟeenze indi nawikye Ruwa kiṟumi kui rina lyo.

¹⁷ Kyamba heri lyamshika lyewokia yanduo mondu liwookie ipfo na wana wa Ruwa. Indi kokoya fuwoke kodu so nyi kyechiwa kida ko walya walaidikye Ndumi ya Sia ya Ruwa?

¹⁸ Na kokoya ichu asumhanyi aumiṟyo ikiṟo, ichu mlemeshi ai mnyamaṟi nyi hanga echikuloṟa ngesa?

¹⁹ Nkyo kimaduma iwo waiwawiṟo kui wuitiki wo Ruwa wadambikye mrima yawo mtsanyi chu mhendeli wechiwuta kilya kii kicha.