1PETRO 3 - Bibilia Kui Mdedie fo Kimochi

¹ Nyo waka kuwikyenyi shi ya wamii wanu. Ma kokoya waipfo wasoṟo walasoṟa idedo lya Ruwa, wahende iliidikia kipfa kya mkao yo yanu mcha. Ma chi kui madedo-pfo.

² Wechiambuya mchumie fonu mkeha mui na wuowuo woowu Ruwa.

³ Wuchopi wonu wulawe wo ora lo nja cha wo yokya njui na iṟaa sahabu na ikuṟaya manguo.

⁴ Kya indi wuwe wo mndu o mrima achia ora lo kya mba aṟee wuchopi wu wulechisia wo mumuyo mhoo fupfudie, nyifo fui na kiweṟe oshangunyi lo Ruwa.

⁵ Kyamba na wudo waka walya wawekyeṟundia Ruwa wawekyekuchopa ili kacha wekusirya na Ruwa wakahooya wamii wawo.

⁶ Chando Sara awehendelye Abrahamu kamsenda mndumii. Nanyo momba wana wake wa nguwo yake mukambuta kilya kii kicha mulaweowuo shiende fowa ma kimu-ho.

⁷ Na wudo, nyo womi mukae na waka wanu kui imanya ke mka ai msangi mfafa kota mii mochiwawikya wuindi kyamba nawo wechiduo kyoṟa kya moo fuu-mbike-ho nyi Ruwa kui wutonga. Kundu shiterewo shanu shilakoye-pfo tunja.

Ituuro kya iwuta shicha

⁸ Lya inutsya ngahamba, mukae mochihia kimu mose, muwe mochiichio wengi wukiwa mukundane, muwe mosaṟya, mukunyiṟe muwenyi.

⁹ Shiwicho mowutyo nyo, ma mulataaye na shiwicho shingi. Ma mularume ili momrumo nyo. Indi kaenyi ora lungi muwe mowikya ona, kipfa kilya mui-walahie nyi Ruwa kundu muhendeduo ona luwe kyoṟa kyanu.

¹⁰ Madedo maele hahambie, “Kyamba mndu akunda moo fuchihiane nao, nawone mkonu ihende imchihia, o naringe olimi loke mawicho naweringa momu yake kundu iladede mtambo.

¹¹ Nadiche mawicho nahende iwuta kii kicha. Nawe mopfula ofoṟo na iluwingya.

¹² Kipfa meso ha Mndumii nyi haiambuya walya wasumhanyi na madu hake haiadanyia shiterewo shawo. Indi oshangu lo Mndumii luichihie ko walya wewuta mawicho-pfo.”

¹³ Nyi wu echimbutya kindo kiwicho ili mowa mokapanya kilya kii kicha?

¹⁴ Kya indi kokoya mohenda iwawiṟo kipfa mowuta kya wusumhanyi, nanga nyo. Ma mulaowuo mndu oose, ma iwuko m madima.

¹⁵ Indi Mndumii Kristo nyio mumtane mwele ipfo ngonyi tsanu. Mukae mochikuṟeheṟya itambahaluya orio mndu mowesana nanyo kya owedi ilu lumbode.

¹⁶ Indi mumhaluo muwodo nyi wuhoo na wuowu. Ngoo tsa mrima yanu tsii njicha, kundu na ipfo kundo waimsutsa washike ipfia sonu walya waideda owicho kya, ohendo lonu lochia ludi kui Yesu Kristo.

¹⁷ Kyamba nanga iwawiṟo kipfa kya iwuta mecha kui kyama kya Ruwa, kota hando iwawiṟo kipfa kya iwuta mawicho.

¹⁸ Kipfa nao Kristo alepfa limu kipfa kya manyamaṟo hadu. Ichu asumhanyi alekaya walasumhanyi kundu naluduo ko Ruwa alewoho kui nyama indi kawewanzio moo kui mumuyo.

¹⁹ Ili awei adi kahenda ko mumuyo iya ikeri kipfungyonyi kawaongoya ndumi.

²⁰ Nawo nyiwo wawelemye iidikya mandi halya wuleeli wo Ruwa wuweilelya mfiri iya ya Noe matika isanduku ilya liwekeri itano. Na ipfo kiidi kyalyo nyi wandu sa waangu, wandu nyanya walekiṟo kulya mṟingenyi.

²¹ Fui mfano fo ifu fuimletsa nanyo wulalu fui wupatiso. Wo wulakeri iwuta-ho oko lui nyame-hu, kya indi wukeri iterewa Ruwa owanzo lohoṟotsa necha ngo tsa mrima kui pfinya ya iṟuka lya Yesu Kristo.

²² Nyio akukerye ipfo owokonyi lo kulyo lo Ruwa ili amaa idoya ruwehu ipfondo amshika ilaṟyo wasu wa ruwehu na waitoṟi na waapfinya.