1PETRO 2 - Bibilia Kui Mdedie fo Kimochi

¹ Kuatuonyi orio mawicho hose wongo, na orio maoka mtambo; na makulembetseṟi; na mawunyeng'a masutsa hose.

² Ili mui cha wanangu wai wafee wulalu mulalakie oseṟi lu lo kimumuyo, lulalulongye wongo, kundu mushike ikoya kui pfinya yalo mkura ya okiio.

³ Mukoye mulemshika isonjyo wucha wo Mndumii.

⁴ Nyio Mdumii muimchea ai iho lii na moo lii-lyimine nyi wandu; indi lii-isambuṟe nyi Ruwa, lii-iwikye wuindi ipfo koke.

⁵ Na wudo nanyo mui maho hai na moo muhende iwiko mba ikeri Mumuyo ya wukohanyi wuele wodambikya-ho shidaso sha kimumuyo shichihiṟie Ruwa kui Yesu Kristo.

⁶ Nkyo kiikiṟehye ipfo Biblienyi kehamba, “Ambuya. Ngawika ipfo Sioni iho liwanzi yose; iho lii-isale lii-iwikye wuindi. Na mndu moidikya-ho akuwode nalyo echihoyo sonupfo.”

⁷ Wulalu kyanu nyo mui waidiki nyi lya wuhuru wung'anyi, nyi wuindi, indi walya walaidikye kyawo, “Nyi lyo iho wewika mba walelileha nalyo lyamba iho lisonguo ipfo ndumbenyi.

⁸ Kiṟehio kyahambase: Nyilyo iho lya mtulia na piita ya yeolotsa wandu.” Nyi wakukapaho kipfa walaidikia idedo lyo. Nakyo nyi kyawo wai-wateṟye wokia mawokioonyi.

⁹ Indi nyo mukeri oshari luu-usambuṟe wamangi wadasi, Wakohanyi wa Mangi wa mkambo fui mwele, wandu wa Ruwa amonyi msanzie fo watale wandu wa Ruwa; kundu muwe mochionguo mawuto mecha ha Ruwa ichu alemlaha ipfo meemenyi kamduo senyi yake iṟihishye idi.

¹⁰ Ili kacha muwei wandu walai mkambo fo Ruwa, indi wulalu mui mkambo fo Ruwa. Ili kacha mulawesaṟyo nyi Ruwa, indi wulalu momemaa isaṟyo.

Waṟundi wa Ruwa

¹¹ Wanawawama, ngamtutuma mui cha wahenu wakuidya-iya wuyana ke mukuotoye lango tsa nyamenyi tsikeri ikapana na mrima.

¹² Mochichumia ipfo kiidi kya wandu walaichi Ruwa ohendo lucha lusumhanyi kundu wo, ipfondo waimsutsa cha ili mui wambafu nyi hondo wakuwutie-ho iṟumisha Ruwa mkonu fo yanduo wechiambuya mawuto halya hanu mecha.

¹³ Kuwikenyi shi ya sungusihu yose ikeri ya kiwandu kimaduma kya Mndumii.

¹⁴ Ma ili nyi mangi ya mkambo ma kokoya nyi wachili wai wadume nyio ianduya wewuta shiwicho na kyeana walya wewuta shii shicha.

¹⁵ Kipfa nkyo kindo Ruwa akundi ke muwe mochiwuta sha wusumhanyi mutoṟomishe nasho wutondo wo wandu walaichi kindo.

¹⁶ Mui wekuachia muwenyi. Ma mulawone mochiwada ikuachia lyo liwe lyeṟikya-ho wumbafu, indi mukae nalyo mui masinga ha Ruwa.

¹⁷ Wikyenyi wandu wose wuindi, mukunde wanawawama wa siṟi, muhende iindia na yowuo Ruwa, muindye mangi.

Mfanano fo maturo ha Kristo

¹⁸ Nyo mui waṟundi wa kanyi ko wandu, mukuwikye shi ya waitoṟi wanu kui wuowu wose wowaowuo chi iwa wai wecha wenunyia tupupfo indi na walya wepfulutsa nyashi.

¹⁹ Kyamba kichihianyi na Ruwa nyi kokoya mndu akukarishya ngaponyi tsilya ekapo tsilawode mti kimamduma kya ngo tsa mrima tsii-njiwike nyi Ruwa.

²⁰ Kyamba kiṟumi kyanu kyawa kya ikiwo kokoya mokukarishya mochikapo nzina kipfa momnyamaṟa? Indi kokoya mokukarishya mandi moterengyo kipfa kya iwuta wusumuhanyi, ikyo kichihianyi na Ruwa, Ruwa nechimusaṟia kipfa kya ikyo.

²¹ Isho nsho muiwalahie; kipfa nao Kristo alewawiṟo kipfa kyanu kamdea mtaato mpfunge kundu muoshe njayo tsake.

²² O nyio alawetahachie kindo, alekoyo atambie kindona dumbu yakepfo.

²³ Nao ili arumo aletaa erumapfo kawawiṟo alasese; kakidea Ruwa ichu modumbuo kya wusumhanyi.

²⁴ O amonyi kasanzya mbihu-hu foke manyamaṟo hadu kahadosya msalabehu hamu nafo, kundu so lukae lui waletsane na manyamaṟo lukapye moo foṟundya wuhoṟotsu. Nyi ichenje lyake lilemchiṟa.

²⁵ Kyamba muwei waṟahi-ṟahi indi wulalu momekuhalukya Mlisi chu ai moambuya mrima yanu.