Roomaxituse 6 - Kille Caaqo

Cubbose haydhi Kristosana yese

¹ Hine waa nu hiye? Wontoy nuuse keenge e maxo modhetey nuuse lagoronike nu cubbowaka miindiya nu yesse?

² Oo'o, ye esi fetto bishuwassho. Nuni cubbose haydhi e garafa shahuttesesa maaqichine sekke cubbo hantisine yesuwanxhiko.

³ Yesuusi Kristosaara bidzo maaqese xhamaquttasi uddi esaara wolko e haydhonike haydhesesa maaddhi ni xhamaquttosa eruwaytuwa?

⁴ Xhinqatena esaara wolko ni moogutto woggaaka e haydhonike haydhiko nu yese. Ye esuna Kristosay ade maaqe Wonto kuxa fuulana haybowafa e dendonike yeydiwo nunini kille yeso degessiko nu yese.

⁵ Haybo badena esi haydhonike esaara bidzo maaddhi nu haydho geede denxo badena esi dendonikeko esaara bidzo maaddhi nu dende.

⁶ Cubbache maaqe nu axetoy bayoronikiyara ha e geede sekke cubbose e maala nu maaquwanikiyara cima nu oonuntey Kristosaara wolko e suxhuttonike erako ni ere.

⁷ Ye esini haydha axi cubbo oomofa shawo kessiko e yese.

⁸ Yoonase Kristosaara nu haydho geede yeso degessi esaara wolko nu yesenike aadexako nu aadexe.

⁹ Kristosay haybowafa be dendo gisha sekke e hay'uwannike hayboy e gara adeto keenguwannike erako ni ere.

¹⁰ Be haydhoniyaka bidzi woggaa uddi abako alsi cubboy e gara adeto keenguwannike e haydho. Hattema yesiya e yese yesoy Wontosuko.

¹¹ Ye esuke hinuni assi cubbose haydhi Yesuusi Kristosaara bidzo maaddhi yesiya hi yese yesona Wontose hi yesenike hinumba taakuwayte.

¹² Ha e gisha iita maxo alseeme hissine hay'e hi acho gara cubboy kaatoronike matofita.

¹³ Hi gara e bidzi bidzina iita abakoy essaanna go'uttorosa mati cubbose uqusofita. Cubbose uqusekofa haybowafa yesuwaka gardese axituke mati hinumba Wontose uqusuwayte. Hi axeto gizetese e miijhe mati Wontose inguwayte.

¹⁴ Ye esini hatte hinuni yesesi Wonto maxo modhetese e oomoko baaka Muse wogase e oomo hi maaquwa gisha cubboy be oomo hinumba ahese danda'uwasso.

Gizetese e oomo yese

¹⁵ Yoonase waa nu hiye? Wogase e oomo yesey attine Wontoy axuse keenge maxo modhete oomo nu yese gisha cubbo hanta nu hanto? Oo'o, fetto hantuwanxhiko.

¹⁶ Bidzi axuse <> hidi hissine hinumba maala mati hi uqusso geede ye esuse hi woosutte axuse e maala hi maaqenike hinumba erako hi ere. Yeydiwo cubbose hi woosutto'aykete haybo oone cubbose e maalako hi maaqe. Wontose woosutto'aykoma gizo maaddhiko Wonto maala hi maaqe.

¹⁷ Buro cubbose e maalako hi maaqicha. Hattema hinuse ohutta erunxe etti muxhurowafa kessi Wontose hi woosutto gisha Wontoy galatuttuwaye.

¹⁸ Cubbo maaketowafa shawo kessi gizetese e maala maaddhiko hi yese.

¹⁹ Ta maxo hinuse shawuka ogena ta zeeresi ha esuse era hi keenguwasafa densiko. Buro hi gara e bidzi bidzina tunasaara be gara kossi kossi hange iitetesaara maala mati hi uqusichonike uddi yeydiwo hatteni hi hayloomoronike gizetena yesese Wontose hi gara e bidzi bidzina e maala mati uqusuwayte.

²⁰ Cubbose e maala maaddhi hi hantichoniya gizo hantese hinumba e worgusenike hinuse eruttuwadiko e yecha.

²¹ Hine yenniya ye hi hanto hantaafa am hi go'utto? Hatte hinumba borsuse basume feda essaafa hi go'utto basi baasso. Ye hantase e aalliciray hayboko.

²² Hattema cubbo maaketowafa shawo kessi Wonto maala maaddhiko hi yese. Ye esi e go'esi hinumba hayla mahesuko. E aallicirani koolo makkina yesoko.

²³ Cubbowafa degexuso woomay hayboko. Wontoy mikke inge ingomay nu Laaxi Yesuusi Kristosana bente koolo makkina yesoko.