Filmonase 1 - Kille Caaqo

Burona sawo

¹ Yesuusi Kristosameydi hissine tufuttese taa Phawlosekofaara nu indo na'i Xhimootoosekofaara. Nuni hantenike hantiya yese nu eehe Filmona neesuko ha woosso nu anxe.

² Yeydiwo nuundo busho Afibiyaseni, kaati tooraxi dargenike modhe odo gisha nuura dargiya yese Arkiphaaseni, ne zawaa bhikkilutte Wonto zawa axituseniko ha woosso nu anxe.

³ Nuuse ade maaqe Wontowara Laaxi Yesuusi Kristosaaray axuse keenge modhe maxowara modhetiyaray hinuse maaquwaye.

Phawlosey Filmona gisha Wonto galatto

^4-5 Laaxi Yesuusa ne aadexenikiyara Wonto aadexeesita ne eehenikiyara ta siido gisha Wonto ta shi'e woggaaka nemba massiko uddi wogga esa ta galate.

⁶ Kristosase nu maaqenike nu keenge modhe zeerey uddi neese modhussi gelete ne aadexo fedase shahena ne oseyoronikeko Wonto ta shi'e.

⁷ Nuundo na'e, Wonto aadexeesiti muxhuro ne doojhusho gisha ne keenge eehana keddaysi maddiko ta oseydese.

Anasimoose gisha

⁸ Kristosay taase indo adetona worguse base ne hantoronike <> hidi nemba woosesuko ta danda'icha.

⁹ Hattema eehay niise yese gisha nemba shi'eko ta wordese. Ta shi'esa nemba siye e worgusesi tani Phawlosey cindesesaara hatteni Yesuusi Kristosa gisha tufuttesesaara ta maaqe gishako.

¹⁰ <> hidi ta hidosi Anasimoose gishako. Tufe zawa yesineko Wonto e aadexoronike mati tayne ta yele e maaddho.

¹¹ Esini ha esume buro niya go'esa maaquwadiko e yecha, hattema niyani taani go'esa maaddhiko e yese.

¹² Esani matiko neeko ta anxe, ta muxhuroni e garako yese.

¹³ Modhe odo gisha haya tufutti ta yesune neni taa marasshe gisha taa marisine hana taara e attorosa wordiko ta yecha.

¹⁴ Maaqe baaka mahese neyne modhe zeerey eehana baaka osana e maaquwannike hissine niya oycci eehusso badi abani mahese worguwasso.

¹⁵ Anasimoosey hatte oddhe woggasewo ne garafa e shahuttosi haliya hanzowafa ayti sekke uddi wogga neera wolko yesesuko e maaqe.

¹⁶ Ha e geede sekke neera e yese yesoy hade maalake maaddho badesine maalame gardi hade eehuttese neyndo na'ukeko. Esi taase fetto ta eehe Nuundo na'uko. Nenimay neese hantesa e maaqe gishaara Kristosana neyndo na'e e maaqe gishaara taame garsiko esa ne eehe.

¹⁷ Yoonase aadexoy nimba bidzo matosuna neyndo na'ukeysi taa beeta'ayko Anasimoose taa ne beenenike esa beedi ekkuwa.

¹⁸ Nemba e miidho basi yesa'ayko ta gara taakuwa, miijhe e ettesso tanko neese shamara.

¹⁹ <> hidi hissine hay tanko Phawlosey ta kuchena neese diizesa. Neni neese yeso ne degessoy ta badena e maaqe gisha fetto neese ta mato base zeerese worguwasso.

²⁰ Yoonase nuundo na'e, Laaxume hissine ha modhe hanta ne hantorosako ta worge. Odde, Kristosa beedi ta muxhuro doojhushuwa.

²¹ Fetto nemba ta oycoshumeni garsi ne hantenike erdi taase ne woosuttenike eezzo badesineko ha esa neese ta diize.

²² Feday assi Wontoy hi shi'e siidi tufiyafa taa e birchenikiyara hinuko ta maaqenikiyara gobbo ta keenge gisha godo taase naquwa.

Aallicira sawo

²³ Yesuusi Kristosa gisha taara tufutti yese Ephafray <> hidiko e sawuse.

²⁴ Yeydiwo taara wolla hantiya yese Marqoosey, Aristrokosey, Demaasiyara Luqaasiyaray <> hidiko sawo neese u anxe.

²⁵ Laaxi Yesuusi Kristosay axuse keenge maxo modhetey hinunaara wolko yesuwaye.