2Qorontoosaxituse 3 - Kille Caaqo

¹ Assiwo modhe hantaxe nu maaqenike numba nashiyaka nu gelle? Hade fedeesiti mahenike modhe hantaxe nu maaqenike ato maaqe woosso nuukofa hinusuwa e worguseni? Hinukofa nuusuwaara e worguse?

² Numba nasheshe diizuttese woossoy hinumbako. Uddi axiti eresaara zeerusesaara maaqe nu muxhurowa diizutti yese woossoy hinumbako.

³ Hinuni nu hantana yooda Kristosay diizzo woosso hi maaqenike addako. Ye woossoni diizuttosi en'a maaqe Wonto Ayaananako baaka diize abakona maaquwasso. Axi muxhuro gara baaka naquttese shuchi gara diizuttesesa maaquwasso.

⁴ Ha esa yeydi hi maaqoronike Wontoy Kristosa badena e mahenike eezuwanxhiko.

⁵ E hanta nu hantoronike ellesesa nuu matay Wontoko baaka <> hidi nu hinesa bidzoni keenguwanxhiko.

⁶ Esi kille caaqose nu hantoronike ellesesako numba e mato. Diizuttese wogay wodhe gishaara Ayaana Geeshi yeso inge gishaara ha kille caaqoy Ayaana Geeshi essaa yesesako baaka diizuttese wogay essaa yesesa maaquwasso.

Buro caaqome kille caaqoy keenge kuxa fuula gisha

⁷ Naquttese shuchi gara diizutta wogay inguttoniya Wonto kuxa fuulay laci laci hidiko e addeydo. Ye Muse deemo gara faqicha kuxa fuulay e garafa baasine hangesa e maaddhakoni Isra'eelaxiti e aafusha tiddhissi beyese danda'uwadiko u yecha. Yoonase haybo oone wogay ha e bisha kuxa fuulana addeydo geede

⁸ hinne Ayaana Geeshi indo kille caaqoy waydini gardese kuxa fuula e keenguwaane?

⁹ Axi esuna yaa'utto buro caaqoy kuxuttesesa e maaddho geede axiti esuna gize kille caaqomay waakidini gardese kuxa fuula e keenguwaane?

¹⁰ Ha e buro kuxa fuula keengichashi orje kuxa keengesaara wol da'aa gaddi nu beesune buro kuxa fuula keengichashi hatte kuxa fuula keenguwasako e maaddho.

¹¹ Ye baane abako maaqichashi kuxa fuula keengesa maaddhako koolo aallo yese abakomay fetto ye baaneesume gardese kuxa fuulako e keenge.

¹² Yeenke yese gobbo nu keenge gisha jhashe baakako naassi modhe odo nu ohe.

¹³ Musey faqicha be aafushay dhaggeniya Isra'eelaxiti beeneesume be aafushako e fasshicha. Nunimay esuke hantuwanxhiko.

¹⁴ U muxhuroy tucuttiko yese. Hanzo aalloni buro caaqo fissharo u zeerususune u muxhuroy ye Musey fasshichonike fashuttiko e yese, ooxutto baasso. Ye fashesha ooxesi Kristosawoko.

¹⁵ Hanzo aalloni Muse woga fissharo u zeeruseniya u muxhuroy ye fasheshunako e fashuttese.

¹⁶ Maaqe baaka Laaxuko axi yookete ye fasshichashi ooxuttoko e ooxutte.

¹⁷ Laaxi ayaanako. Laaxi Ayaanay yese godowaka maaketoy baasso.

¹⁸ Ha e gisha nu uddina fashutto baa aafushanako Laaxi kuxa fuula hade daw'atake faqiya nu yese. Esa nu bishoronike kuxa gara kuxa kosisine nu hange. Yeydini e maaqesi Laaxunako. Esini ayaanako.