Yuuda 1 - INDAGANO INYA:YA

¹ Anye Yuda, unu ndi mugaya wa Yesu Kristo no mwana wa:bo Yakobo, enandikira banu babirikiywe, abendwa mu Nyamuanga Rata, na banu abarindwa kurwa Yesu Kristo.

² Ecigongo no murembe no kwenda byongesibwe kwimwe.

Barwanirire okwikirisya kwa cimari

³ Mbe abendwa bani, anu nariga nini:komesya okubandikira ejo mweruro gweswe bo:ne, nindora ati, ni busibusi nibandikire no kubakomeresya ati murwanirirega muno okwikirisya kunu abe:ru bayabirwe rumwi era.

⁴ Okuba bario aba:nu banu bengiye bwitebe, banu batu:riywe intambara inu kuso:ka kara, ni banu bataku:baya Nyamuanga, banu abacu:sya ecigongo ca Nyamuanga kuba rukubo, nibarema Omukuru umwi enyere, niwe Ratabugenyi Yesu Kristo.

Intambara yabeeo kara ku bagomi

⁵ Nakabee muramenyere ejo jo:ne, nawe enenda okube:cukya ati, Ratabugenyi wejire amara okubaonya aba:nu mu:si ya Misiri, e:jire e:ya nasimagisya banu bate:kirisisye.

⁶ Na bamaraika one banu baremere okukabukira obukuru bwebwe bwa kara, nawe nibasiga obwikaro bwebwe, nibo karindisya emwaro mu cisu:te mu nyoro jinyatawao kukinga ku ntambara ya ku rusiku orukuru.

⁷ Rwa Sodoma na Gomora ne misi jinu jariga jisijene, jinu jaru:baga oburomesi, rwabo kutyo abakora, nibaru:baga ejindi-jindi jo mubiri jinu jitari jo busimuka. Emisi ejo jateyweo okuba co kurorerako nijinya:sibwa intambara yo muriro gwa kajanende.

Jintungwa ja bagomi

⁸ Nyaburiko na baro:ti banu, abajabiasya omubiri, nibagaya obukuru, nibafuma abe cibaro.

⁹ Nawe Mikaeli, niwe maraika omukuru, e:jire ayomba na Syetani, nabambasyanya nage kurwe citundu ca Musa, ataya:rire kumure:tako ntambara amwi kumufuma, nawe na:ika ati, Ratabugenyi akugonye.

¹⁰ Nawe aba:nu banu nibo abafuma binu batamenyere, nibe:nyamura mu binu bamenyere mu busimuka, rwa jintyanyi jinu jitana bwenge.

¹¹ Jiribabona abo! Okuba abaribatira mu njira ya Kaini, nibabirimira mu kuyaba kwa Balaamu korereki babone amabona, nibasimagira mu bwikoti bwa Kora.

¹² Abo, wora barya nemwe, ababa byaji mu marya gemwe ago kwendana. Ni bare:fi banu abe:ri:sya abene:ra, ku:baya uri. Ni me:re ganu gatarimo manji, nigayembwa no muyaga. Ni mati ganu agaunguruka ganu gatana matwasyo, ganu garafu:ye kabiri, ganu gasinduywe cimwi.

¹³ Abo ni matuma ga mu nyanja ganu agasa:ruma, nigafukumba rifiro rya maswaro gebwe. Abo ni njota jinu ejiyenga-yenga jinu jibi:kiywe ecisu:te cinu ci:rabuye kajanende.

Oburagi bwa Enoka

¹⁴ Enoka, unu ariga:ri wa kata:nu na kabiri kuso:ka ku Adamu, niwe ababwiriye abo oburagi ati, Rora, Ratabugenyi ka:ja na be:ru bae bisira na bisira.

¹⁵ Ka:ja okuramura ba:nu bo:ne, no kube:tira ogwebwe banu bataku:baya Nyamuanga, kurwe bikorwa byebwe ebyo burangirangi, binu bakorere mu burangirangi, na kurwe misango emikome:e jinu bamwaikagako abe bibi:bi banu bataku:baya Nyamuanga.

¹⁶ Abo nibo abe:toŋanira nibatukuma, ni banu abaribata rwo kurigira kwebwe kutyo kuri. Ne minwa jebwe ejisagirira okwaika emisango jo kwiku:ya nibayana aba:nu ecibaro korereki babonemo amibona.

¹⁷ Nawe emwe, abendwa, mwicukega jinu ja:ikirwe kara na jintumwa ja Ratabugenyi Yesu Kristo,

¹⁸ kutyo bababwiriye ati, mu siku ja ku bute:ro baribao abagayi banu bariribatira mu kurigira kwebwe kwo burangirangi.

¹⁹ Abo nibo abare:ta okwiyaura, ni bo mubiri, banu hatari na Mwoyo.

²⁰ Nawe emwe abendwa, mwiyu-mbake mu kwikirisya kwemwe okweru muno, nimu-sabwa mu Mwoyo Mweru.

²¹ Mwirindega mu kwenda kwa Nyamuanga, nimurindirira ecigongo ca Ratabugenyi Yesu Kristo kukinga mu buanga bwa kajanende.

²² Mubafwire abandi ecigongo banu abe:tima:ta,

²³ na bandi mubaonyega, nimubasabura mu muriro. Na bandi mubafwire cigongo mu bu:ba, nimutamanganwa ne cifwaro cinu cajabiasibwe no mubiri.

Nabasabirwa ribando

²⁴ Nawe ku Oyo katura okubarinda obute:ku:jura, no kube:meregusyu mutariko esoro imbere ya rikusyo ryae mu kusandaba,

²⁵ ku Nyamuanga umwi era, niwe Omukisya weswe, rikusyo ribega ku Mwene kubwa Ratabugenyi Yesu Kristo, no bukuru, na managa, no buinga, kuso:ka kari:ja na kari:ja, na ka wori na kukinga kajanende ko:ne. Amina.