Yowana 8 - INDAGANO INYA:YA

Omugasi unu agwatirwe naromerwa

¹ (Nibagenda mu:nu wo:ne ika ewae. Nawe Yesu nagenda ku ci:ma ce Mijeituni.

² Namweja mu ruguru na:ja rindi mu yekaru, aba:nu bo:ne nibamutako. Nenyanja nabe:igisya.

³ Abandiki na Bafarisayo nibare:ta omugasi unu bagwatire mu buromerwa, nibamutu:ra aagati.

⁴ Niba:ika ati, Omwiigisya, omugasi unu bamugwata mu buromerwa.

⁵ Mbe mu biragiro Musa aciragiriye okubarasira mabui abe:ja:bo abo. ?Awe mbe oumwaika kutiki?

⁶ Ba:ikire kutyo nibamusaka, korereki babe no musango gwo kumubu:ra. Nawe Yesu ne:nama, nandika a:si ne ca:ra.

⁷ Nawe wejire beyongesya okumubu:sya, ne:gorora nababwira ati, Unu acariga kukayako ambe okumurasa ribui.

⁸ Nasuba okwinama, nandika ne ca:ra a:si.

⁹ Abene wejire bongwa emitima jebwe nijibabu:ra nibauruka umwiumwi, abakaruka nibo batangatire kukinga ku ba ku bute:ro. Yesu nasigarao enyere era, no Mugasi uyo ariga:ri aagati.

¹⁰ Yesu ne:gorora namubu:sya ati, Mugasi awe, ?bari a:ki banu bagwekubu:ra? ?Atariwo unu akuramura?

¹¹ Omwene na:ika ati, Atariwo mu:nu, Ratabugenyi. Yesu na:ika ati, Anye one nitakukuramura. Genda, okwambira rero utarisuba kukaya rindi.)

Yesu obweru bwe ca:ro

¹² Mbe Yesu na:ika nabo rindi, na:ika ati, Nanye obweru bwe ca:ro. Unu kandu:ba ataribatirega mu cisu:te, nawe arabaga no bweru bwo buanga.

¹³ Mbe Abafarisayo nibamubwira ati, Awe owiimako omwene era. Okwimako kwao kutari kwa cimari.

¹⁴ Yesu naindura nababwira ati, Nakabee nire:imako omwene era, okwiimako kwani ni kwa cimari, kwo kuba nimenyere enu naso:kere, ne:nu enija. Nawe emwe mutakumenya enu eniso:ka nakabee enu enija.

¹⁵ Emwe omuramura rwa ba:nuba:nu, anye nitakuramura mu:nu.

¹⁶ Nakabee anye niraramura, okuramura kwani ni kwa cimari, okuba anye nitari nenyere, nawe anye na Rata unu antumire.

¹⁷ Na mu biragiro byemwe byandikirwe ati, Okwaika kwa ba:nu babiri ni kwa cimari.

¹⁸ Anye eniimako omwene, na Rata unu antumire kanyimako.

¹⁹ Mbe nibamubu:sya ati, ?Esomwana ari a:ki? Yesu naindura ati, Anye mutamenyere, nakabee ari Rata mutamumenyere. Mwakabee mumenyere anye, mwakamumenyere Rata one.

²⁰ Emisango jinu aja:ikiye mwibikiro anu ariga ne:igisya mu yekaru. Amwi atario unu amugwatire, okuba omwanya gwae gwariga gucari kwiya.

²¹ Mbe nababwira rindi ati, Anye enigenda, nemwe murinyenja, nimufwira mu bibi:bi byemwe. Anye enu enigenda, emwe mutakutura kuja:yo.

²² Mbe Abayaudi niba:ika ati, ?Kajo:kwiita, okuba ka:ika ati, Anye enu enigenda, emwe mutakutura kuja:yo?

²³ Nababwira ati, Emwe muri be mwaro, anye ndi wa inguru. Emwe muri ba mu:si munu, anye nitari wa mu:si munu.

²⁴ Kwonakora nimbabwira ati, Murifwira mu bibi:bi byemwe. Okuba mukarema okwikirisya ati, nanye Oyo, murifwira mu bibi:bi byemwe.

²⁵ Mbe nibamubu:sya ati, ?Nawe:ga? Yesu nababwira ati, Rwa kutyo nababwiraga kuso:ka ku bwambiro.

²⁶ Ndina byafu ebyo kubabwirako no kuramura, nawe unu antumire niwe owe cimari, nanye binu namunguyweko, nibyo ena:ika mu ca:ro.

²⁷ Batamenyere ati, ababwira ebya Rata.

²⁸ Mbe Yesu nababwira ati, Ariba mwamara okuyanika Omwana wo mu:nu, niwo murimenya ati, nanye Oyo, amwi anye nitana cinu enikora kubwani era, nawe rwa kutyo Rata anyiigisisye, nikwo kutyo ena:ika.

²⁹ Na unu antumire ari aamwi nanye. Rata acariga kunsiga nenyere, okuba enikora kusiku binu bimukondee.

³⁰ Wejire a:ika emisango ejo, ba:nu ba:fu nibamwikirisya.

³¹ Mbe Yesu nababwira Abayaudi banu bamwikirisisye ati, Mukaguma mu misango jani, muriba be:igisibwa bani cimari.

³² Na murimenya eje cimari, ne je cimari jiribakora be:bure.

³³ Nibaindura ati, Eswe riri rwiburo rwa Iburaimu, cicariga kuba bagaya ba mu:nu wo:ne. ?Owaika kutiki ati, muriba be:bure?

³⁴ Yesu nabaindura ati, Ni cimari cimari enibabwira ati, Unu wo:ne kakora ebibi:bi, niwe omugaya we bibi:bi.

³⁵ Omugaya atakwikara mu nyumba kajambo, nawe Omwana ke:kara kajambo.

³⁶ Mbe Omwana ariba abakora be:bure muriba be:bure cimari.

³⁷ Nimenyere ati, muri rwiburo rwa Iburaimu, nawe omuyenja obwenge bwo kunyita, okuba omusango gwani gutakwiyagara mwimwe.

³⁸ Anye ena:ika binu narorere ku Rata. Mbe nemwe omukora binu mwonguywe kwisomwana.

³⁹ Nibaindura nibamubwira ati, Iburaimu niwe rata. Yesu nababwira ati, Kumba mwariri ba:na ba Iburaimu, mwakakorere ebikorwa bya Iburaimu.

⁴⁰ Nawe woryanu omuyenja obwenge bwo kunyita anye unu ndi mu:nu unu ababwiriye ebye cimari binu nonguywe ku Nyamuanga. Iburaimu atakorere kutyo.

⁴¹ Emwe omukora emirimu ja esomwana. Nibamubwira ati, Eswe citari ba:na be mwira. Cirina Rata umwi niwe Nyamuanga.

⁴² Yesu nababwira ati, Kumba Nyamuanga ni:somwana, mwakanyendere anye, okuba naso:kere ku Nyamuanga nini:ja. Amwi nite:jire kubwani omwene era, nawe Oyo niwe antumire.

⁴³ ?Niki cinu ecibaingirira okumenya inyaika yani? Kwo kuba mutakutura kungwa omusango gwani.

⁴⁴ Emwe muri ba:na be:somwana niwe Syetani, ka omwenda okukora okurigira kwesomwana. Oyo ni mwiti kuso:ka ku bwambiro, ka atakwikara mu bye cimari, okuba ebye cimari bitamurimo. Wora a:ika ebyo rurimi, ka:ika cinu eciso:ka mu byae, kwo kuba ni wa rurimi, na ka nesemwene orurimi.

⁴⁵ Nawe okuba anye ena:ika ebye cimari, mutakunyikirisya.

⁴⁶ ?Niga kwimwe unu katura okunkomeresya eribi:bi? ?Nika:ika ebye cimari niki cinu ecibaganya okunyikirisya?

⁴⁷ Owa Nyamuanga kongwa emisango ja Nyamuanga. Emwe nikwo omukora nimurema okungwa, okuba mutari ba Nyamuanga.

⁴⁸ Abayaudi nibaindura nibamubwira ati, ?Eswe citakwaika kisi ati, Awe uri Musamaria, na ka uri no musambwa?

⁴⁹ Yesu naindura ati, Nitari na musambwa, nawe anye eniyana Rata cibaro, nawe mutakunana cibaro.

⁵⁰ Nawe anye nitakuyenja ecibaro cani. Ariwo unu kayenja no kuramura.

⁵¹ Ni cimari cimari enibabwira ati, Omu:nu akagwata omusango gwani, ataribona rufu kajanende na kajanende.

⁵² Abayaudi nibamubwira ati, Wori camenya ati, uri no musambwa. Iburaimu afu:ye na baragi. Ka:we owaika ati, Omu:nu akagwata omusango gwani, atarirabako rufu kajanende na kajanende.

⁵³ ?Awe uri mukuru kukira Iburaimu unu afu:ye? Na baragi bafu:ye! ?Owitogaga?

⁵⁴ Yesu naindura ati, Nike:kusya omwene, okwikusya kwani ni kwa kutyo era. Unu kankusya ni Rata, unu omwaika ati ni Nyamuanga wemwe.

⁵⁵ Oyo mucari kumumenya, nawe anye nimumenyere. Nika:ika ati, nitakumumenya, enijo:kuba mubei rwemwe. Nawe nimumenyere, ka no musango gwae nigugwatire.

⁵⁶ Sa:ja wanyu Iburaimu akondeywe okurora orusiku rwani, narurora nakonderwa.

⁵⁷ Mbe Abayaudi nibamubu:sya ati, ?Ucari kumara myaka makumi gata:nu, na Iburaimu wamurorere?

⁵⁸ Yesu nababwira ati, Ni cimari cimari enibabwira ati, Iburaimu anu ariga acari kubao, anye ndio.

⁵⁹ Mbe nibagega amabui okumurasa, nawe Yesu ne:ibisa, nauruka mu yekaru.