Yowana 6 - INDAGANO INYA:YA

Aba:nu 5,000 nibari:si:bwa

¹ Wejire ebyo byawa, Yesu nagenda ku ngego ya inyanja ya Galilaya, niyo eya Tiberia.

² Ecise cinene nicimuru:ba okuba barorere ebibarikisyo binu akorere ku barwae.

³ Yesu narinya ku ci:ma, nenyanja okwo aamwi na abe:igisibwa bae.

⁴ Na Ipasaka yariga iri yei, nigo amarya ga Bayaudi.

⁵ Mbe Yesu ne:namu-sya ame:so, narora cise cinene nicimu:jako, namubu:sya Filipo ati, ?Jecigure a:ki ebiryo, banu binu bararya?

⁶ A:ikire kutyo kumusaka, okuba ariga amenyere omwene cinu kenda okukora.

⁷ Filipo namuindura ati, Ebiryo bya siringi magana gabiri bitakubaswira, mu:nu wo:ne aryeko bityari.

⁸ Oumwi ku be:igisibwa bae, nuwe Anderea omumura wabo Simoni Petero, namubwira ati,

⁹ Ariwo mumura muto:to unu ari na mikate eta:nu ja sairi na biswi bibiri, ?Nawe binu niwo ki mu ba:nu ba:fu banu?

¹⁰ Yesu na:ika ati, Mubenyanje aba:nu. Awo bwariga burio bunyasi bwa:fu. Mbe aba:nu nibenyanja, obukumi bwebwe uti bisira bita:nu.

¹¹ Mbe Yesu nagega emikate, nasi:ma, nagabira banu benyanjire. Na jiswi one nabagabira rwa kutyo bendere.

¹² Wejire be:guta nabwira abe:igisibwa bae ati, Nimukofye ebiba:ra binu byasigara, casiga kuburao ci:nu.

¹³ Mbe nibakofya nibe:jusya ebibo ekumi na bibiri ebye biba:ra bye mikate jita:nu eja jisairi, binu byasigae ku banu bari:ye.

¹⁴ Mbe aba:nu wejire barora ecibarikisyo cinu akorere, niba:ika ati, Ni cimari unu niwe omuragi unu ka:ja mu:si.

Yesu naribatira ku manji

¹⁵ Yesu namenya ati, abajo:ku:ja okumugwata, bamukore mukama, nasuba rindi ku ci:ma enyere.

¹⁶ Wejire kwaba kegoro, abe:igisibwa bae nibatebera ku mwaro.

¹⁷ Nibasyabara mu bwato, bariga nibambuka inyanja okugenda Kaperinaumu. Na kwariga kwerabuye, na Yesu ariga acari kubakingako.

¹⁸ Inyanja nisa:ru:ma, omuyaga mwafu niguyemba.

¹⁹ Mbe wejire bamara okufuga uti mairi isatu amwi ina, nibarora Yesu naribatira ku manji, nafugera ku bwato, nibo:baya.

²⁰ Nawe omwene nababwira ati, Na:nye, musige ku:baya.

²¹ Nibe:kirisya okumwingisya mu bwato. Aonao obwato nibugoba ku mwaro enu bariga nibaja.

Yesu ne:igisya ebye biryo byo buanga

²² Mwejo bwejire bwaca, ecise cariga cimereguyu ku ngego yenderya ya inyanja, wejire barora ati butario bwato bundi, tari ubumwi, na Yesu ata:syabae aamwi na be:igisibwa nawe abe:igisibwa ba:gendere benyere.

²³ Nawe ama:to agandi gaso:kere Tiberia, nigagoba yei na anu ba:ri:ri:ye emikate, anu Ratabugenyi asi:miye.

²⁴ Mbe ecise wejire barora ati, Yesu atariwo, nakabee bari be:igisibwa bae, abene nibasyabara mu ma:to garya, nibaja Kaperinaumu nibayenja Yesu.

²⁵ Wejire bamubonera ku ngego yenderya ya inyanja, nibamubu:sya ati, ?Rabbi, wama:jari anu?

²⁶ Yesu nabaindura na:ika ati, Ni cimari cimari enibabwira ati, Omu:nyenja tari kwo kuba mwarorere ebibarikisyo nawe kwo kuba mwama:rya emikate nimwiguta.

²⁷ Musige kukorera ebiryo binu ebiwao, nawe ebiryo binu ebi:karao kukinga ku buanga bunu butakuwao, binu Omwana wo mu:nu aribayana. Okuba niwe oyo Rata Nyamuanga amuteeko ecibarikisyo.

²⁸ Nibamubu:sya ati, ?Cikore kutiki okukora emirimu ja Nyamuanga?

²⁹ Yesu naindura nababwira ati, Gunu nigwo omurimu gwa Nyamuanga, okumwikirisya oyo amutumire.

³⁰ Nibamubu:sya ati, ?Mbe ni cibarikisyo ki cinu awe oukora, cirore, cikwikirisye? ?Oukora murimu ki?

³¹ Basaja bari:raga emanu mwibara, rwa kutyo byandikirwe ati, abayae ebiryo byo kurya binu byaso:kere mu rwire.

³² Mbe Yesu nababwira ati, Ni cimari cimari enibabwira ati, Atari Musa unu abayae ebiryo binu byaso:kere mu rwire, nawe Rata nuwe kabayana ebiryo bye cimari binu ebiso:ka mu rwire.

³³ Okuba ebiryo bya Nyamuanga nibyebyo ebiso:ka mu rwire, binu ebire:tera eca:ro obuanga.

³⁴ Mbe nibamubwira ati, Ratabugenyi, ciyanega ebiryo ebyo kusiku.

³⁵ Yesu nababwira ati, Nanye ebiryo byo buanga. Unu kanyijako atarirumwa mweko kata, unu kanyikirisya atari:twa bwiro na katyari.

³⁶ Nawe nababwiriye ati, Mwandorere mutanyikirisisye.

³⁷ Bo:ne banu Rata kanana bari:ja kwanye, na unu ka:ja kwanye, nitarimuirisisya aanja na katyari.

³⁸ Okuba nitaso:kere mu rwire korereki nikore binu enenda anye, tari binu kenda unu antumire.

³⁹ Okwenda kwa Rata unu antumire ni kunu ati, mu bo:ne banu ananire asige kumbura na umwi, nawe nimusu:rurire ku rusiku rwa ku bute:ro.

⁴⁰ Okuba okwenda kwa Rata unu antumire ni kunu ati, mu:nu wo:ne unu karora Omwana no kumwikirisya, abe no buanga bunu butakuwao, nanye ndimusu:rurira ku rusiku rwa ku bute:ro.

⁴¹ Mbe Abayaudi nibe:toŋanira okuba a:ikire ati, Nanye ebiryo binu byaso:kere mu rwire.

⁴² Niba:ika ati, ?Tari unu niwe Yesu wa Yusufu, unu cimenyere esemwene na nyiramwene? ?Ka wori ka:ika atiki ati, Naso:kere mu rwire?

⁴³ Yesu nabaindura ati, Musige kwitoŋanira emwe abene era.

⁴⁴ Atario unu katura oku:ja kwanye, tari akuruywe na Rata unu antumire. Nanye ndimusu:rurira ku rusiku rwa ku bute:ro.

⁴⁵ Byandikirwe mu baragi ati, Bo:ne bariigisibwa na Nyamuanga. Unu wo:ne kongwa no kwiigira ku Rata, niwe ka:ja kwanye.

⁴⁶ Tari ati ario mu:nu unu ararorere Rata, tari Unu aso:kere ku Nyamuanga. Oyo niwe ararorere Rata.

⁴⁷ Ni cimari cimari enibabwira ati, Unu ke:kirisya ari no buanga bwa kajanende.

⁴⁸ Nanye ebiryo byo buanga.

⁴⁹ Basa:ja wanyu bari:raga emanu mwibara nibafwa.

⁵⁰ Binu nibyo ebiryo binu ebiso:ka mu rwire, omu:nu abiryeko asige kufwa.

⁵¹ Nanye ebiryo ebianga binu byaso:kere mu rwire. Omu:nu akarya ku biryo binu ariba muanga kajanende na kajanende. Ebiryo binu ndigaba kurwo buanga bwa i:si, nigwo mubiri gwani.

⁵² Mbe Abayaudi nibabambasyanya abene era niba:ika ati, ?Unu katura atiki okuciyana omubiri gwae okugurya?

⁵³ Mbe Yesu nababwira ati, Ni cimari cimari enibabwira ati, Mukarema okurya omubiri gwo Mwana wo mu:nu, no kunywa amanyinga gae, butarimo buanga mwimwe.

⁵⁴ Unu karya omubiri gwani, no kunywa manyinga gani, ari no buanga bwa kajanende, nanye ndimusu:rurira ku rusiku rwo bute:ro.

⁵⁵ Okuba omubiri gwani nibyo ebiryo bye cimari, na manyinga gani nico eco kunywa ce cimari.

⁵⁶ Unu karya omubiri gwani no kunywa amanyinga gani, ke:kara mwanye, nanye mu mwene.

⁵⁷ Rwa Rata omuanga kutyo antumire, anye one rwa kutyo ndi muanga kurwa Rata, nikwo kutyo one unu kandya, ariba muanga kubwani.

⁵⁸ Binu nibyo ebiryo binu byaso:kere mu rwire. Tari rwa basa:ja kutyo baryaga nibafwa. Unu karya ebiryo binu ariba muanga kajanende na kajanende.

⁵⁹ Ebyo abyaikiye mu rikofyanyisyo ne:igisya mu Kaperinaumu.

Abe:igisibwa ba:fu nibasiga Yesu

⁶⁰ Mbe ba:fu aba mu beigisibwa bae wejire bongwa niba:ika ati, Omusango gunu ni mukomee. ?Niga unu katura okugungwa?

⁶¹ Nawe Yesu namenya munda yae ati, abe:igisibwa bae abe:toŋanirira eco, nababu:sya ati, ?Eco nico ecibayabya?

⁶² ?Mbe biriba kutiki ariba mwarora Omwana wo mu:nu narinya enu ariga okwamba?

⁶³ Omwoyo nigwo ogutamo obuanga. Omubiri gutari na cinu ogwiya. Emisango jinu nababwira nigwo mwoyo nibwo buanga.

⁶⁴ Nawe bariwo abandi mwimwe banu batakwikirisya. Okuba Yesu ariga amenyere kuso:ka ku bwambiro banu batakwikirisya, na unu ariga nenda okumuromera iniku.

⁶⁵ Na:ika ati, Kwonakora nimbabwira ati, Atariwo mu:nu unu katura oku:ja kwanye, Rata atamuyae okutura.

⁶⁶ Aba ku be:igisibwa bae ba:fu nikwo bakorere nibagenda nibasuba inyuma, nibarema okuribatira aamwi nage rindi.

⁶⁷ Mbe Yesu nababu:sya rikumi na babiri ati, ?Si imwe one omwenda okugenda?

⁶⁸ Simoni Petero namuindura ati, Ratabugenyi, cije ku:ga? Awe uri ne misango jo buanga bwa kajanende.

⁶⁹ Neswe ce:kirisisye nicimenya ati, Awe uri Mweru wa Nyamuanga.

⁷⁰ Yesu nabaindura ati, ?Tari nanye nabasorere emwe rikumi na babiri, no umwi kwimwe ni Syetani?

⁷¹ A:ikire ku Yuda, Omwana wa Simoni Iskariote, okuba niwe ariga nenda okumuromera iniku, niwe oumwi kwikumi na babiri.