Yowana 5 - INDAGANO INYA:YA

Omurwae naosibwa kwitanga rya Betesida

¹ Wejire ebyo byawa, nigabao amarya ga Bayaudi. Yesu narinya mu Yerusalemi.

² Mbe mu Yerusalemi kwirango rinu ryatogwaga Rya Jina:ma, ririko ritanga, rinu ryatogwaga mu Cieburania, Betesida, ririo na biyumba bita:nu.

³ Mwibyo bama:magamo ecise ca barwae, baofu na barema na bakombo:rike.

⁵ Ariga ario omu:nu arwae, amarire myaka makumi gasatu neta:nu nesatu (38).

⁶ Yesu wejire amurora oyo ama:mire, namenya ati aramarire siku nyafu, namubu: sya ati, ?Owenda kuba muanga?

⁷ Omurwae namuindura ati, Mukaruka, nitana mu:nu wa kuntu:ra mwitanga anu amanji agaseruka, nawe anu anye eni:jira, oundi kaba antangatiye okwikamo.

⁸ Yesu namubwira ati, Imuka, witwike bima:miro byao, uribate.

⁹ Aonao naba muanga ne:twika ebima:miro, naribata. Nawe orusiku urwo rwariga rwa isabato.

¹⁰ Mbe Abayaudi nibamubwira oyo aosibwe ati, Rero ni sabato, kuganyisye okwitwika ebima:miro byao.

¹¹ Omwene nabaindura ati, Unu amosya niwe ambwira ati, Witwike ebima:miro byao, uribate.

¹² Niba-mubu:sya, Omu:nu uyo niga unu akubwira ati, Witwike ebima:miro byao, uribate.

¹³ Nawe unu aorere ariga atamumenyere kutyo ari, okuba Yesu ariga e:so:keeyo okuba aba:nu banu bariga bari ao bariga ba:fu.

¹⁴ Wejire ebyo bwawa, Yesu namusanga mu yekaru, namubwira ati, Rora wabee muanga. Utarija kukaya rindi, wasiga kugwirwa omusango mubibi muno.

¹⁵ Omu:nu uyo nagenda, nabwira Abayaudi ati, Yesu niwe amosisye.

¹⁶ Mbe Abayaudi nikwo bakorere nibamunya:sya Yesu, okuba akoree ebyo ku sabato.

¹⁷ Nawe Yesu nabaindura ati, Rata kakora kukinga woryanu, nanye one enikora.

¹⁸ Mbe Abayaudi nikwo bakorere nibeyongesya okuyenja obwenge okumwita, okuba atanyamuye isabato era, nawe atogere Nyamuanga esemwene, ne:riŋanya na Nyamuanga.

¹⁹ Mbe Yesu naindura nababwira ati, Ni cimari cimari enibabwira ati, Omwana atakutura enyere era okukora eci:nu, ataroree kwisemwene nakora, okuba binu kakora byone, Omwana one nibyo kakora.

²⁰ Okuba Rata endere Omwana, kamweresya byone binu kakora Omwene. Ka arimweresya emirimu eminene kukira ejo, korereki emwe murugu:re.

²¹ Okuba Rata kutyo kasu:rura abafu:ye nabayana obuanga, nikwo kutyo Omwana one kabayana obuanga bo:ne banu kenda okuyana.

²² Okuba Rata atakuramura omu:nu nawe ayae Omwana okuramura kwone,

²³ Korereki bo:ne bayanega Omwana ecibaro, rwa kutyo abayana Rata ecibaro. Unu atakuyana Omwana ecibaro, atakuyana ecibaro Rata unu amutumire.

²⁴ Ni cimari cimari, enibabwira ati, Unu kongwa omusango gwani ne:kirisya unu antumire, ari no buanga bunu butakuwao, amwi atari:ja mu ntambara, nawe aso:kere mu kufwa kukinga mu buanga.

²⁵ Ni cimari cimari enibabwira ati, Omwanya ogu:ja na wori one gurio runu abafu:ye runu baryungwa riraka ryo Mwana wa Nyamuanga, na banu bariryungwa bariba baanga.

²⁶ Okuba rwa Rata kutyo arimo buanga, nikwo kutyo amuyae Omwana one okubamo obuanga.

²⁷ Amuyae obuinga bwo kuramura, kwo kuba niwe Omwana wo mu:nu.

Okusu:ka kwa be kisi no kwa be bibi:bi

²⁸ Mwasiga kurugu:ra eco, okuba omwanya ogu:ja runu bo:ne banu bari mu fwa runu baryungwa riraka ryae, nibaso:kamo.

²⁹ Banu bakoraga ebye kisi barisu:kira mu buanga, na banu bakoraga ebibi:bi barisu:kira mu ntambara.

³⁰ Anye nitakutura kukora ci:nu kubwani era. Rwa kutyo enungwa, nikwo kutyo eniramura, no kuramura kwani kwimire, kwo kuba nitakuyenja binu enenda anye, tari unu antumire binu kenda.

³¹ Nikeyaika ebyani omwene, okwaika kwani kutari kwa cimari.

³² Ariwo oundi unu ka:ika ebyani, nanye nimenyere ati, ebyani binu kaika ni bya cimari.

Ebyo kwima ku Yesu (1) Ebya Yoana Omubatija

³³ Emwe mwatumiye Yoana aba:nu, omwene na:ika bya cimari.

³⁴ Nawe anye nitakwikirisya okwaika kwo mu:nu, nawe ena:ika binu korereki mukisibwe.

³⁵ Oyo ariga itara inu eyaka ni:se:ka:na, nemwe mwendere okukondererwa obweru bwae mwanya muto:to.

(2) Ebye bikorwa byae

³⁶ Nawe okwaika kunu niri nakwo ni kukuru kukira okwa Yoana. Okuba emirimu jinu Rata anae okuku:misya, emirimu ejene nijo enikora nijo ejinyimako ati, Rata niwe antumire.

(3) Ebya Esemwene

³⁷ Na Rata unu antumire, Oyo niwe kanyimako. Mucariga kungwa oburaka bwae na katyari, nakabee kurora orususo rwae,

³⁸ Amwi mutana cigambo cae cinu ci:kae mwimwe, kwo kuba Oyo antumire mutakumwikirisya.

(4) Ebya binu byandikirwe

³⁹ Omuyenja mu binu byandikirwe, okuba omwiganirisya ati, mwibyo muri na obuanga bunu butakuwao. Ebyo nibyo ebinyimako anye.

⁴⁰ Ke:nu mutakwenda ku:ja kwanye mube no buanga.

⁴¹ Nitakwikirisya ecibaro ca ba:nu.

⁴² Nawe nibamenyere emwe ati, okwenda kwa Nyamuanga kutabarimo.

⁴³ Anye ne:jire mwisi:na rya Rata, nawe mutakunkuma. Oundi ariba:ja mwisi:na ryae omwene, oyo murimukuma.

⁴⁴ Emwe omutura kutiki okwikirisya, nimwenda okuyabwa ecibaro emwe abene era, nimurema okuyenja ecibaro cinu eciso:ka ku Nyamuanga oumwi era.

⁴⁵ Mute:ganirisya ati, anye enibabu:ra ku Rata. Ariwo unu kababu:ra, niwe Musa unu omwiikanya.

⁴⁶ Kumba mu:ja mwikirisisye Musa, nanye one mwakanyikirisisye, okuba anyandikiye ebyani.

⁴⁷ ?Nawe mukarema okwikirisya oyo binu andikire, muri:kirisya kutiki ebigambo byani?