Yowana 3 - INDAGANO INYA:YA

Yesu na Nikodemu. Okwiburwa okuya:ya

¹ Mbe ariga ario mu:nu wa mu Bafarisayo, risi:na ryae Nikodemu niwe Omukuru wa Bayaudi.

² Omwene namu:jako mu ngeta, namubwira ati, Rabbi, cimenyere ati uri mwiigisya unu uso:kere ku Nyamuanga, okuba atario unu katura okukora ebibarikisyo binu oukora awe, tari Nyamuanga ari aamwi nage.

³ Yesu naindura namubwira ati, Ni cimari cimari enikubwira ati, Omu:nu ate:buywe kwiya kabiri, atakutura kubona obukama bwa Nyamuanga.

⁴ Nikodemu namubu:sya ati, ?Omu:nu katura kutiki okwiburwa akaba akokoe? ?Katura okwingira munda ya nyiramwene orwa kabiri, ne:burwa?

⁵ Yesu naindura ati, Ni cimari cimari enikubwira ati, Omu:nu ate:buywe na manji no mwoyo, atakutura kwingira mu bukama bwa Nyamuanga.

⁶ Cinu ce:buywe no mubiri nico mubiri. Na Cinu ce:buywe no Mwoyo nico mwoyo.

⁷ Wasiga kurugu:ra okuba nakubwira ati, Kube:ire okwiburwa kabiri.

⁸ Omuyaga oguyembera eyo ogwenda, nu:ngwa okuutu:tura kwagwo, nawe utakumenya enu oguso:ka, amwi enu ogugenda. Nikwo kutyo omu:nu wo:ne unu e:buywe no Mwoyo.

⁹ Nikodemu naindura namubu:sya ati, ?Binu ebitura kutiki okubao?

¹⁰ Yesu naindura namubu:sya ati, ?Awe uri mwiigisya wa Israeli, na ka utakusombo:kerwa ebyo?

¹¹ Ni cimari cimari enikubwira ati, Eca:ika binu cimenyere, eci:mako binu carorere, no kwimako kweswe mutakukwikirisya.

¹² Nikababwira ebya mu:si nemwe mutakwikirisya, ?muri:kirisya kutiki nikababwira ebya mu rwire?

¹³ Atario unu ararinyire mu rwire, tari unu aso:kere mu rwire, niwe Omwana wo mu:nu.

¹⁴ Rwa Musa kutyo aanikire injoka mwibara, nikwo kutyo Omwana wo mu:nu kumwiire okuanikwa,

¹⁵ Mu:nu wo:ne unu kamwikirisya abe no buanga bunu butakuwao.

¹⁶ Okuba nikwo kutyo Nyamuanga abendere abanyaca:ro, ndijei natuma Omwana wae umwi era, korereki mu:nu wo:ne unu kamwikirisya asige kubura, nawe abe no buanga bunu butakuwao.

¹⁷ Okuba Nyamuanga atatumire Mwana wae mu:si korereki atemere i:si eci:na, nawe amutumire korereki i:si ikisibwe mu mwene.

¹⁸ Unu kamwikirisya atakuramurwa. Unu ate:kirisisye amarire okuramurwa, kwo kuba atari:kirisisye risi:na ryo Mwana oumwi era wa Nyamuanga.

¹⁹ Kunu nikwo okuramura ati, obweru bwejire mu ca:ro, aba:nu nibenda ecisu:te kukira obweru, kwo kuba ebikorwa byebwe byariga bibi:bi.

²⁰ Okuba mu:nu wo:ne unu kakora obubi:bi katamanganwa no bweru, na ka ataku:ja mu bweru, ebikorwa byae bireme okugonyibwa.

²¹ Nawe unu kakora ebye cimari ka:ja mu bweru korereki ebikorwa byae biboneke ati, byakoreywe mu Nyamuanga.

Okwimako kwa Yoana okwo kumarisya

²² Wejire ejo jawa, Yesu nagenda mu ca:ro ca Buyaudi aamwi na be:igisibwa bae, nabao aamwi nabo nabatija.

²³ Nawe Yoana ariga nabatijisya mu Amoni yei na Salimu, okuba niyo gariga amanji ma:fu. Aba:nu nibajaga nibabatijibwa.

²⁴ Okuba Yoana ariga acari kutu:rwa mwiboyero.

²⁵ Abe:igisibwa ba Yoana nibabambasyanya no Muyaudi omusango gwo kwesibwa.

²⁶ Niba:ja ku Yoana, nibamubwira ati, Rabbi, wuriya ariga:ri aamwi na:we ku ngego yenderya ya Yorodani, unu wemireko, one kabatija, na ba:nu bo:ne abamuja:ko.

²⁷ Yoana naindura na:ika ati, Omu:nu atakutura kuramira ecigambo co:ne tari aciyabirwe okuso:ka mu rwire.

²⁸ Emwe abene muri bo kunyimako ati, na:ikire anye ati, Nitari Kristo, nawe natumirwe okumutangatira.

²⁹ Unu ari no mwenga niwe omutwasi. Nawe omusa:ni wo mutwasi ke:mereguru namungwa nakondererwa muno oburaka bwo mutwasi. Mbe nikwo okukonderwa kwani kuku:miye kutyo.

³⁰ Omwene kumwiire okukura, nawe anye kunyiire okukea.

³¹ Unu kaso:ka mu rwire katunga byone. Owa mu:si kaba ari wa mu:si, kaika bya mu:si. Unu kaso:ka mu rwire niwe katunga byone.

³² Cinu arorere na cinu onguywe, nico ka:ika, amwi atario unu ke:kirisya okwimako kwae.

³³ Unu e:kirisisye okwimako kwae, ateeo ecibarikisyo cae ati, Nyamuanga ni we cimari.

³⁴ Okuba unu atumirwe na Nyamuanga kaika ebigambo bya Nyamuanga, okuba Nyamuanga kagaba Omwoyo atakurenga.

³⁵ Rata endere Omwana, amuyae byone mu kuboko kwae.

³⁶ Unu ke:kirisya Omwana ari no buanga bunu butakuwao. Nawe unu atakwikirisya Omwana, ataribona buanga, nawe risungu rya Nyamuanga rimuriko.