Yowana 1 - INDAGANO INYA:YA

Yesu Kristo niwe Nyamuanga

¹ Okwamba ariga:rio Omusango. Omusango ariga aamwi na Nyamuanga. Omusango niwe Nyamuanga.

² Oyo ariga aamwi na Nyamuanga ku bwambiro.

³ Ebi:nu byone byakorerwe nage. Aja:tari uyo citakakorerwe ci:nu na cimwi cinu cakorerwe.

⁴ Obuanga bwariga mu Mwene. No buanga nibuba obweru bwa ba:nu.

⁵ Obweru nibwatika mu cisu:te, ka ne cisu:te citabumenyegesisye.

⁶ Abonekere omu:nu unu atumirwe na Nyamuanga, risi:na ryae Yoana.

⁷ Oyo e:jire okwimako, abwimeko obweru, korereki bo:ne be:kirisye kubwae.

⁸ Oyo tari niwe ariga obweru, nawe e:jire abwimeko obweru.

⁹ Bwariga buriwo obweru bwe cimari, bunu obwatikiraga mu:nu wo:ne unu ka:ja mu:si.

¹⁰ Ariga:ri mu:si, na i:si yakorerwe Omwene, na i:si itamusombo:keywe.

¹¹ E:jire mu butunge bwae nawe aba:nu bae batamuramiye.

¹² Nawe bo:ne banu bamuramiye, abe:kirisisye okuba ba:na ba Nyamuanga, nibo abo abe:kirisya risi:na ryae,

¹³ Banu bate:buywe kurwa amanyinga nakabee kuri kwenda kwo mubiri, nakabee kuri kwenda kwo mu:nu, nawe be:buywe na Nyamuanga.

¹⁴ Omusango naba mubiri, ne:kara kwiswe, nicirora rikusyo ryae, niryo rikusyo rya Unu ebuywe umwi enyere:ra na Rata, e:jue ecigongo ne cimari.

Okwimako kwa Yoana Omubatija

¹⁵ Yoana namwimako, na:ikirira inguru ati, Oyo niwe nababwiriye ati, Unu ka:ja inyuma yani ankirire ecibaro, okuba Omwene niwe antangatiye.

¹⁶ Okuba eswe bo:ne cayabirwe mu kuku:mira kwae, ne cigongo inguru ye cigongo.

¹⁷ Okuba ebiragiro byare:terwe na Musa, nawe ecigongo no kumasya byare:terwe na Yesu Kristo.

¹⁸ Atario unu ararorere Nyamuanga anu cikabere:ga. Nyamuanga unu e:buywe enyere, unu ari mu cifuba ca Rata, Oyo niwe amubu:risisye.

¹⁹ Kunu nikwo okwimako kwa Yoana, Abayaudi be:jire bamutumira abagabisi na Barawi, korereki bamubu:sye ati, Na:we:ga?

²⁰ Omwene e:bu:rire, amwi ataremere, na:ika ati, Anye nitari Kristo.

²¹ Nibamubu:sya ati, Mbe nawe:ga? Uri Eliya? Na:ika ati, Anye ntari niwe. ?Na:we omuragi uriya? Naindura ati, Tere.

²² Mbe nibamubu:sya ati, Na:we:ga? Nucibwire korereki cibaindure banu bacitumire. ?Owitogaga?

²³ Na:ika ati, Anye ndi buraka bwa unu ka:ikirira inguru mwibara ati, Mumugororere Ratabugenyi injira, rwo muragi Isaya kutyo a:ikire.

²⁴ Banu bariga batumirwe, bariga ba mu Bafarisayo.

²⁵ Nibamubu:sya ati, ?Ka araba awe utari Kristo, amwi Eliya, amwi omuragi uriya, kambe cinu oukora nubatija niki?

²⁶ Yoana nabaindura ati, Anye enibabatija na manji. Agati yemwe emereguyumo unu mutakumenya.

²⁷ Unu niwe ka:ja inyuma yani, anye nite:ire kugesya orukoba rwe cikwirya cae.

²⁸ Ebyo byakoreywe Betabara, ku ngego yenderya ya Yorodani, enu Yoana abatijisyaga.

²⁹ Mwejo Yoana narora Yesu namu:jako, na:ika ati, Rora, Omwana wa Ina:ma wa Nyamuanga, Unu kaso:syao ebibi:bi bye ca:ro.

³⁰ Oyo niwe nababwiriye ati, Inyuma yani ka:ja omu:nu unu ankirire ecibaro, okuba Omwene niwe antangatiye.

³¹ Nanye nariga nitamumenyere, nawe korereki abu:risibwe ku Israeli, kwonakorere nini:ja nimbatija na manji.

³² Yoana namwimako na:ika ati, Anye narora Omwoyo naso:ka mu rwire rwa injiba, namubako.

³³ Nanye nariga nitamumenyere, nawe Unu antumire okubatija na manji, Omwene niwe ambwiriye ati, Unu urirora Omwoyo ne:ka namubako, oyo niwe kabatija no Mwoyo Mweru.

³⁴ Mbe anye nindora, nimwimako ati, Oyo niwe Omwana wa Nyamuanga.

Abe:igisibwa ba Yoana nibaru:ba Yesu

³⁵ Mwejo rindi Yoana ariga emereguyu na beigisibwa bae babiri.

³⁶ Narore:rera Yesu naribata, na:ika ati, Rora Omwana wa Ina:ma wa Nyamuanga.

³⁷ Abe:igisibwa abo ababiri nibongwa na:ika, nibamuru:ba Yesu.

³⁸ Yesu ne:kebukira nabarora nibamuru:ba, nababu:sya ati, ?Omuyenja ki? Nibamubu:sya ati, ?Wikae a:ki Rabbi? Obugajuro bwaryo ati, Omwiigisya.

³⁹ Nababwira ati, Mu:je murore. Nibaja nibarora anu ariga e:kae, nibaba ewae rusiku urwo. Jariga uti saa ekumi.

⁴⁰ Anderea, owabo Simoni Petero, niwe oumwi ku babiri banu bonguywe binu Yoana a:ikire, nibamuru:ba.

⁴¹ Omwene niwe ambire okubona omumura wabo Simoni, namubwira ati, camurorere Masiya, obugajuro bwaryo ati, Kristo.

⁴² Namure:ta ku Yesu. Yesu namurore:rera na:ika ati, Na:we Simoni wa Yona. Uritogwa Kefa, obugajuro bwaryo Petero, norwo ribui.

Filipo na Natanaeli nibamuru:ba Yesu

⁴³ Mwejo Yesu endere okuso:kayo agende Galilaya. Namurora Filipo, namubwira ati, Ndu:ba.

⁴⁴ Nawe Filipo ariga:ri wa Betesaida, mu musi gwa Anderea na Petero.

⁴⁵ Filipo namubona Natanaeli, namubwira ati, Cabwene unu Musa andikire mu biragiro, na baragi unu bandikire, niwe Yesu wa Yusufu, owende Najareti.

⁴⁶ Natanaeli namubu:sya ati, ?Mu Najareti ecitura okuso:kayo eci:nu cire:si? Filipo namubwira ati, Ija urore.

⁴⁷ Yesu narora Natanaeli namu:jako, namwaika ati, Rora Muisraeli rumara unu atarimo burigerige!

⁴⁸ Natanaeli namubu:sya ati, ?Wa:menyee a:ki? Yesu naindura namubwira ati, Filipo anu ariri acari kukubirikira, anu wariri mwiti ryo mutini, ngwekurora.

⁴⁹ Natanaeli naindura namubwira ati, Rabbi, na:we Omwana wa Nyamuanga, na:we Omukama wa Israeli.

⁵⁰ Yesu naindura namubu:sya ati, ?Okwo nakubwira ati, nakurora mwiti ryo mutini, kwowakora niwikirisya? Urirora ebikuru kukira ebyo.

⁵¹ Namubwira ati, Ni cimari cimari enibabwira ati, Murirora orwire rwigukire na bamaraika ba Nyamuanga nibarinya na ka nibe:kira ku Mwana wo mu:nu.