Yakobo 5 - INDAGANO INYA:YA

Intambara yo buni:bi bwo burangirangi

¹ Mbe emwe abani:bi, mukunge murire kurwo butaka bunu buriba:jako.

² Obuni:bi bwemwe bwaborere, ne bifwaro byemwe byaribirwe amaenje.

³ Jijaabu jemwe na jimpirya jemwe jajirire obutaretare, no butaretare bwajo buriba rusingiro kwimwe, burisuba okurya emibiri jemwe rwo muriro. Mwibi:kiye ebi:nu mu siku ja ku bute:ro.

⁴ Mbe murore, omuye:ro gwa bakosi banu babagesee amasambu gemwe, gunu mwabe:mire nimubajimya, nigwo ogurira. Ne bikunga byebwe banu babagesee byengiye mu matwi ga Ratabugenyi we bise.

⁵ Murari:ye ebye kisi mu ca:ro nimukondererwa orumura nimuyama mu mitima jemwe rwa ku rusiku rwo kukomera.

⁶ Mwaramuye omurenge:resi nimumwitira ogwae, nimumwita, nawe atayajene nemwe.

Be:gumirisye mu nyako

⁷ Mbe ba:na ba:su, mwiganirisyega kukinga Ratabugenyi anu ari:ja. Mbe, omurimi kurindirira amatwasyo ga i:si ago bwana, ke:gumirisya okukinga anu kabonera iŋuba ya risunga ne ye citiku.

⁸ Mbe emwe one mwigumirisyega. Murumyega emitima jemwe, okuba oku:ja kwa Ratabugenyi kuri yei.

⁹ Musigega kwitoŋanira emwe abene:ra, ba:na ba:su, korereki musige kutemerwa eci:na. Mbe Omuramusi e:mereguyu ku rwigi.

¹⁰ Ba:na ba:su, murore abaragi banu ba:ikaga mwisi:na rya Ratabugenyi, babega co kurorerako rwa kutyo banya:sibwaga no kwigumirisya.

¹¹ Mbe, ecibatoga ba ribando banu be:gumirisyaga. Mwonguywe ebyo kwigumirisya kwa Yobu, na ka mwarorere obukarae bwa Ratabugenyi, rwa kutyo Ratabugenyi ni wo bufura bwafu ne cigongo ca:fu.

¹² Nawe, ba:na ba:su, okukira byone, mutarairiraga orwire, nakabee iri si, nakabee ciri cirairo cindi co:ne. Nawe yee yemwe ibe yee, na uri yemwe ibe uri, korereki musige kugwa mu ntambara.

Okusabwa okukora na managa ma:fu

¹³ ?Ariwo mwimwe omu:nu unu ari na inyako? Oyo asabwe. ?Ariwo unu kakonderwa? Embega jinyimbo jo kuku:ya Nyamuanga.

¹⁴ ?Ariwo mwimwe unu arwae? Oyo abirikire abakaruka ba ikanisa, bamusabirwe nibamubambaga amafuta mwisi:na rya Ratabugenyi.

¹⁵ No kusabwa kwo kwikirisya kuriosya omurwae, na Ratabugenyi arimwimusya. Araba ariga akorere ebibi:bi, ariswaririrwa.

¹⁶ Mbe, mwigambiranega ebibi:bi byemwe, musabiranega, korereki muosibwe. Okusabwa kwo mu:nu murenge:resi okukora na managa ma:fu.

¹⁷ Eliya ariga:ri mu:nu wa ntungwa jimwi ne jeswe, nasabwa muno iŋuba isige kugwa. Iŋuba ni:rema okugwa ku ca:ro myaka esatu na me:si gata:nu na kumwi.

¹⁸ Nasuba okusabwa rindi, iŋuba ni:gwa okuso:ka mu rwire, i:si ni:mesya amatwasyo gayo.

¹⁹ Ba:na ba:su, omu:nu wo:ne mwimwe akayaba okuso:ka mu bye cimari, okumara omu:nu akamusubya,

²⁰ amenyega ati, unu kasubya owe bibi:bi okuso:ka mu njira yae yo kuyaba, oyo kaonya omwoyo gwo mu:nu mu kufwa, naswikira bibi:bi byafu.