Yakobo 3 - INDAGANO INYA:YA

Omu:nu atunge orurimi rwae

¹ Mbe ba:na ba:su, mutabaga be:igisya ba:fu, okuba mumenyere ati, eswe ciritemerwa eci:na cisito.

² Okuba eswe bo:ne eciyaba kwiya ka:fu. Omu:nu wo:ne akaba atakuyaba mu kwaika, oyo ni mu:nu unu akumiye, niwe katura okuingirira no mubiri gwae gwone.

³ Mbe, ecitu:ra ebyuma mu minwa ja jifarasa, korereki jico:roberega, nicijicu:syacu:sya ne mibiri jajo jo:ne.

⁴ Rora na jijaaji. Nakabee jineneere kutiki, nijisirwa no muyaga gwa managa, nawe ejiindurwa na rigobero eto:to enu wo:ne omugofi kenda okuirore:resya.

⁵ Nyaburiko no rurimi one ni cungo cito:to, orwiku:ya bikuru. Murore akariro ni katyari kutyo ako:ca akamara amasaka ma:fu.

⁶ Orurimi ni muriro, ni:si yo bunyamusi inu yateyweo mu byungo byeswe. Nirwo orujabiasya omubiri gwone, na ka orukongesya biyangwa byone byo busimukwa, no rwene orukongesibwa no muriro gwa inyanja yo muriro.

⁷ Okuba aba:nu abatunga jintyanyi ja nyami jo:ne na jinyonyi, na binu ebi:kurura, na binu biri mu nyanja, na ka barabitungire.

⁸ Nawe atario mu:nu unu katura okutunga orurimi. Ni ci:nu cibi:bi rinu citakuingirirwa, rwijuye obusungu bunu obwita.

⁹ Orwo nirwo eciku:isya Nyamuanga Rata, ka nirwo eci:imira aba:nu banu bakoreywe mu rususo rwa Nyamuanga.

¹⁰ Mbe, okuku:ya no kwiima nibiso:ka mu kanwa kamwi ako ako. Ba:na ba:su ebyo bite:ire kubao.

¹¹ ?Ecinyo ecifwamo amanji go bwana na maruru mu mumiro gumwi?

¹² Mbe ba:na ba:su, ?omutini ogutura okutwasya jijeituni, amwi omujabibu ogutura okutwasya jitini? Amwi mu mumiro gumwi amanji gatakufwamo go munyu na ge kisi.

Obwenge bwe cimari

¹³ ?Niga mwimwe arino bwenge no kusombo:kerwa? Mbe, e:resyega ebikorwa byae mu ntungwa jo bwana, mu bwororo bwo bwenge.

¹⁴ Nawe mukaba na rifuwa ryo bururu na inyombo mu mitima jemwe, mute:ku:yaga amwi mutabeyaga no kuragirira ebye cimari.

¹⁵ Obwenge obwo butaso:kere inguru, nawe ni bwa si, ni bwa ba:nu, ka ni bwa Syetani.

¹⁶ Okuba rifuwa na inyombo bikaka biriwo, nigubao omuoranye ne misango jo:ne mibi:bi.

¹⁷ Nawe obwenge bunu obuso:ka inguru, okwamba bwerere, ka ni bwo murembe, ni bwo bwororo, ni bwangu kungwa, bwijuye ecigongo na matwasyo go bwana, amwi butana soro:re, amwi butana burigerige.

¹⁸ Nawe ritwasyo ryo burenge:resi eriyambwa mu murembe ku banu abarega omurembe.