Yakobo 2 - INDAGANO INYA:YA

Isoro:re yaganyibwa

¹ Ba:na ba:su, mutabaga na kwikirisya kwa Yesu Kristo, Ratabugenyi wa rikusyo, ke:nu nimusoro:ra aba:nu.

² Okuba mu rikofyanyisyo ryemwe akengira omu:nu unu afwae inarye ya ijaabu, ka afwae ebye cire:re, mbe no mutaka nengira afwae jinsembe,

³ Nemwe mukamukusya unu afwae ebye cire:re, nimwaika ati, Awe inyanja anu akondere, ka nimubwira omutaka ati, Awe imereguru ariya, amwi ati, inyanja anu mu maguru gani.

⁴ ?Mbe mutakusoro:ra mu mitima jemwe nimuba baramusi bo kwiganirisya kubi:bi?

⁵ Mungwe, ba:na ba:su abendwa. ?Nyamuanga atasorere abataka ba mu ca:ro, babe bani:bi mu kwikirisya, barye omwandu gwo bukama bunu aragire banu abamwenda?

⁶ Nawe emwe mwagaire omutaka. ?Abani:bi tari nibo ababe:gairisya, nibabakurubesya okubasira imbere ya baramusi?

⁷ ?Tari nibo abafuma risi:na ryo bwana rinu omutogwa?

⁸ Nawe mukaku:misya eciragiro ce cikama cinu eca:ika ati, Yendaga omwikasyanya wao rwa kutyo owiyenda omwene. Mukakora kutyo omukora kwa bwana.

⁹ Nawe mukaba na isoro:re mu ba:nu, omukora ebibi:bi, ebiragiro nibibe:tira ogwemwe ati, muri banyamusi.

¹⁰ Okuba omu:nu wo:ne abagwata ebiragiro byone, nawe akakaya mu cimwi era, mbe kajira intambara mu byone.

¹¹ Okuba Oyo a:ikire ati, Utaromeraga, niwe a:ikire one ati, Ute:taga. Mbe, ukarema okuromera, nawe nuwita, wabee munyamusi we biragiro.

¹² Mwaikega no kukoraga rwa banu abenda okuramurwa ne biragiro bye ci:bure.

¹³ Okuba unu atakufwira cigongo ariramurwa cigongo uri. Nawe ecigongo eci:ku:isya ku ntambara.

¹⁴ Mbe ba:na ba:su, ?omu:nu kabonamo:ki, aka:ika ati, ni:kirisisye, ke:nu atana bikorwa? ?Okwikirisya era okufura okumuonya?

¹⁵ Akaba ario mwana wa:su, omurume amwi mugasi, bari tuyu, batana biryo,

¹⁶ No umwi kwimwe akababwira ati, Mugende kwa bwana, mubire, mwigute, ke:nu mutakubayana binu bakenere ebyo mubiri, ?mbe okwiyaki?

¹⁷ No kwikirisya one nikwo kutyo, kukaba kutana bikorwa, kufu:ye okwene:ra.

¹⁸ Nawe omu:nu aryaika ati, Awe uri no kwikirisya, nanye ndi ne bikorwa. Nyeresya okwikirisya kwao kunu kutana bikorwa, nanye enikweresya okwikirisya kwani mu bikorwa byani.

¹⁹ Awe owikirisya ati, Nyamuanga ni umwi. Oukora kisi. Emisambwa one eji:kirisya kutyo nijiyarara.

²⁰ Nawe, awe omu:nu unu utari ci:nu, ?amwi outura okumenya ati, okwikirisya kunu kutariko bikorwa ni kwa kutyo era?

²¹ ?Saja Iburaimu atayabirwe oburenge:resi kurwe bikorwa? Okuba aso:sisye omwana wae Isaka ku cigabiro.

²² Warora ati, okwikirisya kwakoree amwi ne bikorwa byae, no kwikirisya kwae kwaku:misibwe mu bikorwa byae.

²³ Binu byandikirwe nibiku:mira binu ebyaika ati, Iburaimu e:kirisi:sye Nyamuanga, nabarirwa oburenge:resi. Natogwa omusa:ni wa Nyamuanga.

²⁴ Omurora ati, omu:nu kabarirwa oburenge:resi kurwe bikorwa, amwi tari kurwo kwikirisya kwenyere.

²⁵ ?Ka na Raabu unu ariga:ri maraya, nikwo kutyo atabariywe oburenge:resi kurwe bikorwa, okuba akumire abatatirisya, nabaisiŋanya mu njira indi?

²⁶ Okuba rwo mubiri gunu gutarimo mwoyo kutyo gufu:ye, nyaburiko no kwikirisya kunu kutana bikorwa kufu:ye.