Yakobo 1 - INDAGANO INYA:YA

¹ Anye Yakobo, unu ndi mugaya wa Nyamuanga na wa Ratabugenyi Yesu Kristo, enibake:sya emwe aba jiŋanda rikumi na jibiri jinu janyarambukire.

² Mbe ba:na ba:su wora mwagwa mu kusakwa okundi no kundi, mubarega byone kuba byo kukondererwa.

³ Mumenye ati, okusakwa kwo kwikirisya kwemwe okure:ta okwigumirisya.

⁴ Mbe okwigumirisya kukorega murimu muku:miye, korereki mube banu muku:miye na banu mukurire, na banu mutakugerukirwa ci:nu.

⁵ Nawe omu:nu wo:ne kwimwe akagerukirwa obwenge, asabwe Nyamuanga unu kagabira bo:ne kwima uri, amwi atakugonya. Oyo ariyabwa.

⁶ Nawe asabwe mu kwikirisya, kwitima:ta uri. Okuba unu ke:tima:ta kasusana na rituma rya mu nyanja rinu erigegwa no muyaga nirisirwa ei nei.

⁷ Okuba omu:nu oyo ate:ganirisyaga ati, aribona ci:nu co:ne ku Ratabugenyi.

⁸ Ni mu:nu wa mitima ebiri, atakurema mu njira jae jo:ne.

⁹ Nawe owasu unu atana cibaro akonderwega okuba kakuibwa.

¹⁰ No muni:bi akonderwega okuba kakeibwa, okuba ariwao rwo bwaso bwo bunya:si.

¹¹ Okuba risu:ba eriuruka no mumwi mwafu, niriotosya obunya:si, no bwaso bwendeko niburagara, no bure:si bwo rususo rwabwo nibubura. Mbe nikwo kutyo one omuni:bi ariotoka mu njira jae.

¹² Ari na ribando omu:nu unu ke:gumirisya okusakwa, okuba ariba aiga ariyabwa orutenga rwo buanga, runu Ratabugenyi aragire banu abamwenda.

¹³ Omu:nu akasakwa, asiga kwaika ati, Nyamuanga niwe kansaka. Okuba Nyamuanga atakusakwa bibi:bi, amwi omwene one atakusaka mu:nu wo:ne.

¹⁴ Nawe omu:nu kasakwa anu kakururwa no kukongyakongibwa no kurigira kwae omwene.

¹⁵ Okurigira okujira inda, nikwibura ebibi:bi. Ne bibi:bi ariba byakura, nibi:bura okufwa.

¹⁶ Mutabebeibwaga, ba:na ba:su abendwa.

¹⁷ Ebiyanwa byone ebyo bwana, ne biyanwa byone ebiku:miye ebiso:ka inguru, nibi:ka okuso:ka ku Rata wo bweru, unu atakuindukainduka, amwi atakucu:kacu:ka rwa rirengesi.

¹⁸ Niwe aci:buye no musango gwae rwa kutyo akarariye, korereki cibe rwo mutongoro gwa binu ayangire.

Okungwa:ra kutana muri:ro

¹⁹ Ba:na ba:su abendwa, mumenye ati, mu:nu wo:ne abega mwangu wo kungwa, nawe asigega kwangua okwaika amwi kubiirwa.

²⁰ Okuba risungu ryo mu:nu ritakukora burenge:resi bwa Nyamuanga.

²¹ Mbe mutega kura obujabi, no burangirangi bunu busagiriye, muramirega no bwororo omusango gwabibirwe, gunu ogutura okuonya emyoyo jemwe.

²² Nawe mubega bakosi bo musango, amwi mutari bo kungwa:ra, nimwibebeya abene.

²³ Okuba omu:nu wo:ne akongwa omusango, ke:nu atakugukora, oyo kasusana rwo mu:nu unu ke:rora obusu bwae mwirore kutyo ari,

²⁴ okuba ke:rora nagenda, narabirwa aonao kutyo kasusa.

²⁵ Nawe unu karora mu biragiro ebiku:miye ebye ci:bure, nagumamo, atari unu kongwa no kurabirwa, nawe ni mukosi unu kakora. Oyo arayabwaga ribando mu kukora kwae.

²⁶ Omu:nu wo:ne ake:ganirisya ati, ndi wa dini, nawe akarema okuingirira orurimi rwae, nawe ne:bebeya omutima gwae omwene, mbe idini yo mu:nu oyo ni ya kutyo era.

²⁷ Idini yo bwana inu itariko ekomo imbere ya Nyamuanga Rata njii, okujo:rora abasigwa na batumba mu butaka bwebwe no kwibaririra areme okuba na makomo ga mu:si.