Tiito 3 - INDAGANO INYA:YA

Ebya ba ikanisa

¹ Ube:cukyega okworoberaga abatungi na bakuru no kubongwa, bamaririrega okukora omurimu gwone ogwo bwana.

² Basigega kufuma mu:nu wo:ne, na kuyomba uri, babega bo:roro, be:resyega obufura bwone ku ba:nu bo:ne.

³ Okuba eswe one kara cariga ciri batamutamu na banyantongwa, na barubebeibwa, nicikorera marigire no rumura rundi na rundi, cariga bo rwango na bo rwiso, na bo busoko, nicitamanganwa.

⁴ Nawe obufura bwa Nyamuanga Omukisya weswe no kwenda kwae ku ba:nu, wejire byaboneka,

⁵ Nacionya, tari kurwe bikorwa byo burenge:resi binu cakorere eswe, nawe nacionya kurwe cigongo cae, kurwo kwosibwa kwo kwiburwa kwa kabiri, no kukorwa baya:ya no Mwoyo Mweru,

⁶ kunu aci:tururiyeko bwafu, kubwa Yesu Kristo Mukisya weswe,

⁷ korereki cibarirwe oburenge:resi kurwe cigongo cae, cibe bari bo mwandu mu kwiikanya kwo buanga bwa kajanende.

⁸ Omusango gunu ni mwiikanyibwa. Enenda awe ukome:sye kata ebigambo binu ati, banu abe:kirisya Nyamuanga bakabuke okukome:ra mu bikorwa byo bwana. Ebyo ni bya kisi ka birengere aba:nu.

⁹ Nawe wikengega jimamba jo butamutamu, ne bitabo byo kwiburwa, na inyombo, no kubambasyanya ebye biragiro, okuba ebyo bitana rinu ci:ire ka ni bya kutyo era.

¹⁰ Omu:nu unu e:kotere, ukamara okumubwira orwo kwamba no rwa kabiri, umureme.

¹¹ Umenye ati, omu:nu unu ari kutyo ayabibwe, ka anyamuye, ne:temera omwene eci:na.

Ebyo kuraga

¹² Ariba natuma Aritema kwawe, amwi Tukiko, wikome:sye oku:ja kwanye mu Nikopoli, okuba nendere okumarire:yo ji:siku ja imbeo.

¹³ Ikome:sya okusakwa Jena, nyabiragiro, aamwi na Apolo, mu rugendo rwebwe, basige kuburwa ci:nu.

¹⁴ Abeswe be:igire okwikomesya mu bikorwa byo bwana korereki basakire mu bukene, basige kuburwa amatwasyo.

¹⁵ Bo:ne banu bari aamwi nanye ababake:sya. Uke:sye banu abacenda eswe mu kwikirisya. Ecigongo cibega nemwe bo:ne.