Tiito 2 - INDAGANO INYA:YA

Omukosi wa Nyamuanga

¹ Nawe awe, yaikaga binu bi:ire okwiigisya kunu kwimire.

² Abakaruka abakuru basige kukorwa, barimo ecibaro, nibe:baririra be:ihire mu kwikirisya, na mu kwenda na mu kwigumirisya.

³ Na bakwekuru nikwo kutyo one, baribatega rwa kutyo kwiire abe:ru, batari babeeresya, amwi batatungirwe bwarwa bwafu, nawe abe:igisya binu birengere.

⁴ Korereki be:igisye abagasi abato:to ati, bendega abarume bebwe no kwendaga aba:na bebwe,

⁵ babe bo kwibaririra, na be:tongee, bakorega emirimu mu misi jebwe, babe bafura, bo:roberega abarume bebwe korereki omusango gwa Nyamuanga gusigega kufumwa.

⁶ Na banu bacari kwikura one nikwo kutyo ubabwirega okwibaririra.

⁷ Mu byone wiyeresyega rwe cirorero ce bikorwa byo bwana. Niwiyeresyega okuba wo bwima mu kwiigisya, na we cibaro.

⁸ Ube wo kwaika bwima, kunu batakutura kubonamo cikayo, korereki unu atakwimireko e:sware, atana cibi:bi ca kukwaikako.

⁹ Abagaya bo:roberega be:sebugenyi, babakondisyega, kutoŋana uri.

¹⁰ Basigega kwiba, nawe be:resyega okwiikanyibwa kwone kwo bwana, korereki bakondyega okwiigisya kwa Nyamuanga Omukisya weswe mu byone.

¹¹ Okuba ecigongo ca Nyamuanga cabonekere, cinu ecire:tera ba:nu bo:ne omweruro.

¹² Ecici:igisya okurema obunyamusi na marigire ge ca:ro, korereki cibega ci:baririye mu magoro ga wori mu burenge:resi na mu kuru:baga Nyamuanga.

¹³ Nicirindirira okwiikanya kwa ribando, nikwo okuboneka kwa Nyamuanga omukuru no Mukisya weswe Yesu Kristo mwikusyo ryae.

¹⁴ Oyo niwe e:teeyo kurweswe, korereki acicungure mu bumaya bwone, e:cumire aba:nu babe bae cimari, banu bakome:ree ebikorwa bye kisi.

¹⁵ Yaika ebyo, ukomeresyega, no kugonya na managa go:ne. Mu:nu wo:ne asigega kukugaya.